مجنون

مجنون بحبك صدقيني
لو كان دا اسمه صحيح جنان
مجنون وعقلي خلاص راميني
بيقولوا عقلي طار كمان
لو كان شرودي ف لون عنيكي
أو حتي جوة النن بان
أو نظرة منك بتداويني
وبتوه معاها ف الجنان
متقول يا آدم واعترف
سبت الخلود علشانها ليه؟
النظرة من عينها الصفا
واللمسة من إيدها الحياة
والقلب عمره ما اكتفي
وبين رموشها العقل تاه
الضمة في حضنك دفا
والبسمة ترقص ع الشفاه
والليل بنورك صار نهار
ولاحد أبدا راح يلومني
متقولوا عاشق مخه طار

سامح لطف الله