للطلبة الى لسه متخرجين زى حلاتى خيارين ملهمش تالت بالنسبة لاي طالب جامعي، يا اما تغير من نفسك وتدفع تمن التغيير دا وانت وشطارتك، يا اما تفضل ثابت وفي الحالة دي هتدفع ثمن عدم التغيير !
.
سواء كنت بتدرس في آداب، تجارة، علوم، طب، هندسة ... أو أي كلية تانية، بمجرد ما تخلص الدراسة كل اللى هتحصل عليه من الجامعة شهادة محو الأمية التعليمية مش أكتر وهتتخرج تتصدم لما تلاقي الفجوة العظيمة بين سوق العمل وبين اللى انت اتعلمته في الجامعة!
.
صحيح ممكن تدخل كلية قمة "مزعومة" وهتتخرج تضمن ليك وظيفة، هتضمن مثلا انك في اسوأ الظروف ممكن تفتحلك عيادة خاصة بيك لو دكتور بس وبعدين ايه الفرق ؟ في ملايين من دكاترة الاسنان مثلا في العالم بس مفيش الا واحد بس اللى اسمه "جي في بلاك " !
في ملايين من الدكاترة اللى بيتخرجوا بس مفيش الا واحد بس باسم مجدي يعقوب ، في آلاف الأدباء والكتاب دلوقتي بس مفيش غير نوع واحد بس من انطون تشيكوف، نجيب محفوظ ، جورج أورويل شاكسبير ، جول فيرن ، تشارلز ديكنز، جورج برناردشو ... مفيش الا شخصيات معدودة ونموذج واحد بس فريد من كل واحد ، والباقيين كلهم " ‫#‏عاديين‬ " زيهم زي غيرهم مفيش فرق، مجرد سد خانة بس بيقوموا بدور وظيفي مطلوب منهم بيعملوه وخلاص .. معندهم اي طموح اصلا من النوع اللى بيرضى بالواقع وعايز يمشي جمب الحيط ويعيش زي غيره بياكل ويشرب ويتجوز ويخلف ويموت الله يرحمه وهكذا دورة الحياة بالنسبة ليهم !
.
مش معنى انك دخلت كلية او حتى هتتخرج خلاص ان كدا دورك انتهى، انت كدا في البداية لسه ومش هتلاقي وقت تحقق فيه انجازاتك الا في الوقت دا .. السبب اللى خلي صورة آينشتاين العجوز مشهورة للعالم كله هو انجازات اينشتاين في فترة شبابه ! مترضاش تكون زي غيرك وتبقى نسخة من ملايين النسخ الموجودة في العالم ، خليك فريد من نوعك وخلي الناس هي اللى تحلم انها تبقى زيك !
.
اتشقلب واشتغل واتعلم واجتهد وابتكر واعمل حاجات جديدة وافشل وجرب تاني وافشل هتكتسب خبرة اكتر بعدها جرب ، هتفشل بس مش مشكلة دي حاجة اساسية عشان يبقى معاك خبرة وبعدها جرب وجرب وجرب لحد ما تحقق هدفك ! النجاح مش انك تبقى زي غيرك وعندك عيادة او موظف في شركة او استاذ في مدرسة .. النجاح انك تتمرد على الواقع دا وتخرج برة دايرة تفكير المجتمع الروتيني اللى بيختزلوا الطب في عيادة و الهندسة في وظيفة والآداب والتربية في مدرس.. فكك من كل دول وحقق اللى في دماغك، لانها حياتك وانت اللى هتعيشها مش المجتمع هو اللى هيعيش بدالك!
.
الحياة اما مغامرة جريئة أو لا شيء ...