بص يا ريِّس
أنته كويِّس
بس ما زال ف بلدنا فساد
محليات وناس سلطات
واللى بنغلط فيه ينعاد
ووظايف بس للى معاه
واللى بيدفع يتغنالهُ
ويبقى ولاده أحسن أولاد
لما عملنا الثوره ياريِّس
كان المُر جوه الحلق
عدَّى وزاد
كلُّه تمام
بس الفقرا
أيه أخدوه
غير الحوجه
ونار ف قلوبهم
بركان زاد
راجع نفسك
شُفنا ياريِّس
قلبك عادل
ولا شفنكش ف يوم بتميِّس
بص يا ريِّس
أنته كويِّس
لما تبص
تلاقى الواحد عنده عيال
هم تقيل
لابينفض ولابينشال
لما تلاقى اللقمه مفيش
ولا فيه دخل
ولافيه ورث
حتى الترس
بتاعه انشال
هتعمل أيه
قوللى يا ريِّس
ما انته ابويه وانته الخال
ولا هتفرح
لما تلاقى ولادك ماتوا
من هم الدُّنيا وم الاذلال
وانته صريح ولا بتنافق
ولا بتميِّس
بص يا ريِّس
أنته كويِّس
محدش فينا
يعرف حتى
أسم محافظه
ولا للمجلس
أسم وحافظه
ولافيه حد
مخلص وف عمله
غير قِلَّه وبس
لضميرها تحافظه
ولو تتكلم
وتقول شكوى
مش راح تخلص
من مسئول
مش لاقى ملافظه
مش راح تسلم
من أيده ولفظه
وأهى ناس قاعده تاكل وتليِّس
بص يا ريِّس
أنته كويِّس
مستر عطيه الخضرى
قلين –كفر الشيخ
