ياأم السماحة وطيبة القلب يا قلين
ياغالية يا أم الكفاح يا فخر للسامعين
فى كل موقع ولادك قادة تملا العين
واحنا رجال الأدب معرفش ليه ساكتين
لأجل انتمائى لها هبرز تاريخ قلين

شوفو سعد زغلول لما الأنجليز طاردوه
جم أهل قلين ع السكة الحديد نصروه
خلو المحطة حطام حتى القضيب نسفوه
وقف معاهم دراز بكل أمر طاعوه
العنف بطل وطلبو سعد بيفوضوه

كتير نقابل شباب بربابة م البكاتوش
بيعزفو ع الوتر كتير ميتخبوش
الشعر وايا الربابه أصحاب ميختلف
أدهم هرب عندهم أخفوه ولا نطقوش
شعر هنا بالأمان حيو معى البكاتوش

مطرف حفيد الفاروق قبره هنا فى شباس
عمر الفاروق أعلن الدعوة مخفش الناس
ومطرف الخير تاريخه وجهده كان فى شباس
عمار شباس يا عمير سكنك آلاف م الناس
م الألف صبحو أربعين بين عالم وشايل فاس

مينو بجيشه فى شباس ناوى على الأزلال
وكل أهل البلد واقفين دفاع أبطال
ورغم قوة سلاح المعتدين جولى مال
دفع حياته ثمن وقف الهجوم فى الحال
شرف فرنسا ف شباس انداس وفى الأوحال

مينو سحب قوته راجع الى سنهور
ومنها دغرى لدسوق طاير وكان مزعور
وصل رشيد وانتهى أمله وكان محصور
وكتب رساله لنابليون الى كان مغرور
شباس عمير السبب خلت دمانا بحور

رغم التاريخ الكبير ليلك طلعله نهار
ولبست توب التطور فى ظل قيادة الأحرار
بدون مجامله حقيقى عنوان أمل وفخار
واجب المحافظة تدعم قلين وباستمرار
علشان تضاهى مراكز محظوظة م الأقدار