بسم الله الذى لا يحمد على مكروه سواه.

بعد التوكل على الله والاستعانه به . أحب ان اشارككم فكره من بحر أفكار هدفها الأول والأخير الرقى بالمستوى المعيشى للكثيرين وحل الكثير من مشاكل شباب اختفت احلامه بمستقبل افضل . شباب يخشى الحلم بالافضل عندما يرى الواقع المر.

الفكره مستوحاه من فكره الجمعيات العاديه . 5او 6افراد عاملين جمعيه واللى يقبضها الأول والتانى وكده بس على كبير شويه.

نسميها مبدأيا ...مشروع او جمعيه الشباب

يتم انشاء جمعيه القائمين على تنظيمها من الشباب ايضا زوى العقول المستنيره.
...يتم تقنينها من الجهات الحكوميه المختصه .

فكره الجمعيه ...

كل فرد يحب يشترك فى الجمعيه هيدفع لأول مره فقط مبلغ رمزى كقيمه للاشتراك وليكن على سبيل المثال 5جنيه مثلا.
ويدفع كل فرد مشترك فى الجمعيه شهريا كبدايه ممكن نقول 10جنيه فى الشهر بعد ذياده الاعداد والاقبال على الجمعيه ممكن نقول 1جنيه كل شهر اظن مش مبلغ .

فرضا . كبدايه قدرنا نجمع الف شاب . مع انى ان شاء الله ان حصل .واثق بااذن الله فى اعداد اكبر. لكن لو فرضنا اول شهر كانو الف شاب من كل واحد كبدايه اشتراك 5جنيه مثلا و10جنيه فى الشهر الأول.
يبقى جمعنا 15 الف فى اول شهر . هنحدد مثلا مبلغ 10الاف جنيه واحد ياخدها يعمل مشروعه الخاص والأولويه فى الدور تكون حسب السبق فى الاشتراك فى الجمعيه .
فرضا انا اقترضت 10الاف جنيه من الجمعيه وده يكون الحد الاقصى .يعنى مفيش قروض اعلى من كده.
هكون مطالب بسداد ال10الاق جنيه بعد معمل مشروعى مثلا .على مبالغ دفعات شهريه .غير 10جنيه شهريه برضه كتجديد اشتراك فى الجمعيه دى لابد منها لدخل جديد ومساعده شباب جدد.
يعنى جمعيه كبيره شويه . وقروض بدون فوائد . مسترده . يبقى ساعدنا شباب . وفرنا شغل ..وكل ده بمبالغ بسيطه جدا يعنى انا كعضو فى الجمعيه لما ادفع كل شهر 10جنيه مش قصه على ما اعتقد وعيجى دورى واخد قرضى .

ممكن مع الوقت بااذن الله العدد يزيد والدخل يزيد ويتم عمل مشاريع خاصه بالجمعيه لزياده الدخل .فى البدايه يكون الافراد المنظمه للجمعيه العمل تطوعى ممكن بعد عمل مشاريع يكون لهم راتب بااعتبار انهم هيكونو متابعين للمشاريع دى .
طبعا . كل شئ زى مذكرت هيكون مقنن . ورقم حساب بنكى خاص بااسم الجمعيه وأوراق تؤخذ على الشخص المقترض . كأنها بنك لكن خاص بشبابنا.

الفكره ممكن متكنش ليا وليك لكن هتكون للى جاى افضل بااذن الله ل ابنى ول ابنك .

يعنى ..تخيل انشاء الجمعيه . وبعد 5سنين .مشترك فى الجمعيه مثلا 30الف شاب
والجمعيه ليها دخل خاص بيها من مشاريع فى مجالات مختلفه .

تخيل الجمعيه بالحجم ده واظن انه سهل جدا الوصول له فى شباس .تقدر تساعد من 40الى 50شاب كل شهر .

أظن لو تم تطبيقها بالكيفيه اللى فى بالى اللى للأسف حاسس انى مقدرتش اوصلها كامله .اضمن بااذن الله فى خلال 10سنين مش هيكون شاب عاطل اوخلافه .
تخيل شاب عاوز يعمل مشروع ومحتاج يكمل على فلوس معاه .؟؟هنساعده.

تخيل شاب عاوز يسافر بره ومحتاج برضه قرض واسلامى بدون فوائد هنساعده .
تخيل شاب عاوز يتجوز .برضه هنساعده..

طبعا لازم لتطبيق الفكره جمع شباب البلد وعرض الفكره على الجميع . واظن الوحيد اللى يقدر يعمل كده ويقدر يساعد فى اى اجراءات قانونيه تخص المشروع . ومش بس كده يقدر يساعد بجلب تبرعات اومعونات من الدوله وخلافه ..هو عضو مجلس الشعب .ايا كان اسمه

أتمنى أكون قدرت اوصل ولو جزء بسيط من الحلم اللى فى خيالى ,وتقدرو تفهمونى بااذن الله .

منتظر أرئكم ان شاء الله