الابنودى بيقول يامنة وانا بقول صابحة
صابحةدى عمتى وف يوم بعتتلى مكتوب
قالتلى فيه بعد السلام والتحية يا ابن اخويا سعيد
ياللى سبت البلد ومشيت مع الموضة
لبست ياد الجواكت متلونة الوان
وما شفت حال البلد صارت كلها احزان
راحت العمات يا ولد وراحت الاخوال
وبقيت وحيدة فى بلد كلها اغراب
وف يوم قالولى وصل ابن اخوكى سعيد
قلت يا مرحبا وطالت رقبتى كتير
اتارى ابن البلد جاى يبيع الطين
ولا جه يشوف عمته اللى رعيته سنين
ورقبتى راحت سمسمة لما مشى الخيبان
ووقفت ادارى كسفتى وشماتة الجيران
حتى ما قال اشوف عمتى ويوصل الارحام
هى البنادر نستك ولا المرا يا حمار
ركبت ياد عربية بكهربة وانوار
بعد ما كانت قعدتك بتعور الحمار
صح بناتك يا وله لبستهم عريان
بيقولوا علمتهم فى جامعةالامريكان
الله يرحم ابوك اللى مات فقران
نسيت يا واد الرقع اللى كانت ف القفطان
ولا نسيت المشى حافى وسط الغيطان
الله يرحم ابوك اللى مات فقران
كلمات ابن شباس /مصطفى أبوزيد
