كان ياما كان .........فيه واحد اسمه جحا بيشتغل قبطان مركب والناس في كل رحلة بيختاروه ولما جحا حس ان الناس مش قادرة تختارغيره قام اتغر ولكن بعض الناس فاقت بعد كده ولكن البعض دول أقليه ولكن جحا كان زكي فبدأ يوعد الناس بانهم لو اختاروه هيصلح الخرم اللي في المركب من زمان وعلشان الناس كانوا طيبين كانوا فاكرين ان جحا الوحيد اللي يقدر يصلح الخرم ده وفضلوا يختاروه علي طول الرحلات ومع ذلك الخرم لايزال بالمركب والمركب بتكون مليانه مياه لدرجة ان محدش بيعرف يتحرك فيها وكمان مياه البحر المالحه دايما مخلوطه بماء الشرب والناس عندها امراض ومصدقين وعود جحا بأنه هيصلح المركب ولا المركب بتتصلح ولا الوعود بتخلص ولا الناس عايزه تفوق وتعرف ان جحا أصلا مش عايز يصلح المركب علشان الناس تفضل محتاجين له علي أمل ان فيه تغيير ويفضل حلم الناس ان جحا ممكن يوفي بوعده في اي رحله ولكن ياتري لو الخرم اتصلح جحا هيلاقي حاجه مهمه يوعد الناس بها علشان يفضلوا يختاروه علي طول......................وياريت محدش يزعل لم مش فاهم...

الله عليك يا ابو مريم
كلام جميل وليه مغزي ورؤيه بعيده واسمحلي اغير اسم موضوعك واسميه
الحدق يفهم بكسر الحاء ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
سلامي للجميع

ههههههههههههههههههههههه
اهم حاجة يا جماعة ان الخرم يتظبط
:affraid:

كلام جميل يابو مريم ومعناه واضح زى الشمس .بس حجا ده مكار عارف الم الناس فين وبيلعب عليه بس الناس هى السبب لانه هو فرد وقدر يمتلك اهم شيئ عندهم وهو عقلهم ولذلك مفكروش يسدوا الخرم بايدهم وتواكلوا واكيد مصيرهم الغرق لانهم كانوا كسلانين
وشكرا على الموضوع ده

والله ياحسام احنا كشباب المفروض نشوف حد يخدم بجد وكفايه اننا مضحوك علينا بوعود وهميه لمدة اكثر من تلاتين سنه -ممكن ناس تزعل من كلامي ولكن بقولهم بكل حياديه يشوفوا ايه اللي اتعمل في المده دي كلها -عارف ان فيه ناس هيقولوا عمل وعمل وعمل .............لكن بالله عليكم احنا نفرق ايه عن اي بلد مفيهاش عضو مجلس شعب الناس بتموت نفسها علشانه كل اللي باين في البلد -مجاري بتدخل بيوت الناس.....طرق مفيش اردئ من كده...مدرسة ثانوي سورها مهدود له كام سنه ....والمستشفي اللي كل سنه وانت طيب عليها......وغير كده كتير .....نفسي الاقي حاجه تستحق مده اكتر من تلاتين سنه اتكلم عنها........
ياخساره الناس لسه عندها امل بعد ده كله ولسه مصد قين جحا......
الناس دول استغلوا مناصبهم علشان يكونوا ظباط شرطه وحربيه وملاك اراضي ومشاريع بالملايين وكل ده علي حساب آمال الناس وطيبتهم ونفس الموضوع بيتكرر في كل دوره ...انا مش معارض لحد ولكن عايز الناس دول يحترموا عقولنا وارواحنا اللي بتروح هدر في الدفاع عنهم واحنا بنكدب نفسنا ونقول بكره هيقدروا ويعملوا ولكن هيهات........
يوم الانتخابات ده بيكون يوم عيد الناس بتعطل شغلها والفلاحين بيستعدوا لليوم ده اكتر من استعدادهم للعيد..وتعصب ..وعداوه..وبنفرحوا لما ينجح وكأن أحنا اللي نجحنا واكثر ومع ذلك لسه لم يحين الوقت لرد الجميل للناس دي
.......انا باقترح ان يكون فيه اجنده تتقدم بكل مطالبنا مشروط فيها ان الدورة اللي جايه لازم نشوف بلدنا غير الحال ده خالص وتكون دي آخر فرصه لتحقيق مطالبنا ولو متحققتش يبقي هارد لك الدوره اللي بعد كده ونشوفوا حد يحترمنا بجد........

للامانة يا استاذ احمد فيه حاجات اتحققت في التلاتين سنه الاخيره ذي الاستاد وشويه مصالح خاصه وقليل عامه
ولكن للامانه ايضا الحاجات اللي اتحققت اقل بكتير من المنطق بالنسبه لتلاتين سنه
واعتقد انها ابدا مش كفايه
انا معاكم في الراي وجوب فتح صفحه جديده ونشوف ايه اللي حيحصل وبعد كده يكون الحساب
مع العلم ان اللي هيحاسب المره الجايه هو جيلنا احنا لان الجيل القديم كله ابتدي يروح الله يسهله
واعتقد ان الشباب اللي انا شايفه دلوقتي يختلف تماما عن الجيل القديم
حتي اللي مش محايد مننا متفق علي المبدأ ان فيه خرم لازم يتصلح وفيه تقصير حتي ولو ما قلشي كده صراحه
تحياتي للاخ حسام
والاخ ابو مريم واحمد بقوش
وادعو الجميع للمشاركه بالنيابه عنك يا ابو مريم

وليه نتكلم بالغاز احنا فى عصر الحريات مش كده ولا ايه

mido12 كتب:

وليه نتكلم بالغاز احنا فى عصر الحريات مش كده ولا ايه

عندك حق

الناس في بلادنا طيبين وعلي الفطره متربيين***ووراء اي كلمه حلوه بيروحوا ناسيين
الي محصلش في البلدمن سنين****************الي كلنا منها محروجين
وخايفين نجيب صحاب لنا زائرين********يطلعوا يقلوا علينا ناس في العسل نايميين
طيب ايه الحل يامتعلمين*************ننام في العسل ولا نصحي من الكسل

كلمات واحد مبيحبش العسل المغشوش لانه فيه سكر جلكوزبيضر الصحه
ابوحمزه