يرحم زمان ستي وجدي كان الجواز خد فيه وادي،
والعائلة تحضر وكبرها مكنش عرفي ولا وادى،
الابن كان أهله يحبوه وفى الكبر دايمآ يلقوه،
مكنش حد يخاصم حد ولا في واحد يقاطع أبوه،
بقا الجواز عرفي وورقة واى حاجة ومش فارقة،
ولا مأزون ولا حتى شهود نرجع نقول خطف وسرقه،
راح فين زمن الجلبية والمه حوالين طبلية ،
دلوقتي محدش بقا فاضي غير للفلوس والعربية،
شباب كتير بقا متكاسل لبسين خواتم وسلاسل ،
أسهل حاجة ميعرفهاش يدوب يعاكس ويراسل،
احترت واحتار تفكيرى حتى الحلاقة بقت ميرى،
البس ضيق ومحزق ولا تعرف احمد من ريرى،
بقت الموضه فى كل مكان والمشجر على القمصين ،
والطرحه يلبسها الصبيان والبنات لبسين بنطيل
يمين يرد على سؤالى ليه البنات لبسو رجالي،؟؟
دلوقتي لو ماشى فى سكه معرفش سيد من سالي،
يا بنات بلدي اعملو معروف فى ناس كتير مشية وبتشوف،
لبس الشارع غير البيت والمسطور غير المكشوف،
اسمع منى ده كلام ده خطير ده كلام جد مهوش فوزير،
بقا البنات يتخنوقه كمان ويمسكوه سنجه وجنزير ،
اللي لبنتو جايب محمول طول النهار والليل مشغول ،
ولا عارف بتكلم مين وبتخرج من غير متقول،
مقلتش بنتي صغنونة ولا بنت طيشه ومجنونة اسألها ديمآ
وا لغيها والأم كمان تبقى حنونه ،
انا مش بهلس ولا عيب ولا فى كلامي متسيب
انا نفسي أشوف مصر جميلة وأشوف كمان شعبها طيب،
يا ناس يا هوووو أصل انا مصري ومصر دي بيتي وقصري،
من خيرها عشت انا وتربيت و عمري يوم منكر اصلي .