انا شفت منظر في رمضان اللي فات اليوم الوحيد اللي خرجت فيه الشارع قبل المغرب رحت قعدت على سلم الأستاذ تيسير جنب السعيد خلاف بتاع الطعمية :
جات بنت عندها حوالي تسع سنوات نحيفة جدا الحقيقة انا عارف ابوها ، قالت للسعيد عايزة بربع جنيه طعمية اعطاها خمس طعميات صغيرين ، قامت بعدهم ثم قالت له بمنتهي التلقائية احنا ستة انا وابويا ومرات ابويا ( لأن امها ميتة ) واخواتي وستي نبقوا ستة ، علشان خاطري اديني ست طعميات علشان كل واحد يأخد واحدة ، السعيد قالها بتلقائية هو انتوا حتفطروا طعمية بس قالت له ايوة ( إحنا بناخدوا ست ارغفة من المجلس ) كل واحد رغيف وطعمياية ، وقعدت تتحايل على السعيد علشان واحدة كمان ،
المشكلة ان السعيد كمان ظروفه صعبة وهنا لم اشعر بنفسي الا والدموع تنهمر من عيني .المشكلة اني عارف ابوها وعارف انهم فعلا كذلك وانها مش بتكدب ، ده فعلا صحيح وهما كدة فعلا . ولو غابوا يصرخوا الف سنة محدش معبرهم ولو ابوهم ده مرض محدش حيعالجة بالكتير حيلموله من الجامع 100 جنيه بعد صلاة الجمعة ولو مات أعراضهم حتهان جدا والمجتمع حيدوس عليهم وحيقول عليهم حرامية واشكال وسخة وسكان العشوائيات وواطيين .
كيف وصلت مصر لهذا الحال ؟
الإجابة في المليارات المسروقة . الإجابة في الأعراض المهتوكة ، الإجابة لواءات الشرطة اللي بيدخلوا البلد مخدرات كل يوم بإنتظام وبخطة محكمة برعاية اسرائيلية .
الإجابة في الأراضي المسروقة ، الإجابة في إن احنا سكتنا كتير وانضحك علينا كتير . كفاية بقى كفاية .
إن مظاهرة الجمعة المليونية غدا هى تأكيد على حقوقنا في المليارات المسروقة وفي الأراضي المنهوبة وان الحكومة الحالية حكومة حسني مبارك وممكن هذه الحكومة تعيده في اي وقت يا جماعة الموضوع في منتهي الخطورة

اولا يا اخي لي عتاب عليك لان السلم اللي جنب السعيد هو سلم الحاج علي داوود وليس سلم تيسير اما باقي الموضوع فهو جميل ويستحق القراءة

ههههههههههههههه
والله واحشني موت أنا مش عارف ازاي احنا اتفرقنا كدة دا كلام ؟
مبروك الثورة يا استاذ حمدي وربنا يستر والأمور ما تبوظش من قبل اسرائيل وامريكا واعوانهم في مصر

إنا لله وإنا إليه راجعون
ربنا يستر ونتخلص من كل الظلم
والدم اللى دفعه الشباب يجى بفايدة

انا هحكيلك رد بسيط قوي ، انا حضرت اجتماع كان عامله المحافظ في شهر 10 / 2010 في نادي المعلمين في قلين مع السادة الأفاضل أعضاء مجلس الشعب وأعضاء المحليات المحافظة والمركز وبعض الناس اللي لهم طلبات ، المحافظ قال أي حد له مظلمه يقدمها بعد كده اتكلم السيد عضو مجلس الشعب المحترم وأخذ يشيد بالمحافظ وبالحكومة وبالحزب الوطني وأبلغ السيد المحافظ نيابة عن أبناء مركز قلين جميعا أن مركز قلين بلا مشاكل وكل الخدمات متوفرة في عهد سيادته ايه رأيك فيه بربع جنيه طعميه لو قلنا لحد كده حد يصدقنا

اسف يمكن التاريخ مش ده بس دي كانت آخر زيارة للمحافظ قبل الانتخابات الأخيرة

والله قصة تبكى لها القلوب قبل الاعين يا استاذ محمود ورنبا يلطف بنا جميعا .

لا تخاف علي الثورة يااخ محمود فالشباب يتعامل بلغة العصر وارجوا منك تصحيح المعلومة بتاع السلم ضروري لرفع الضرر عنا

الأستاذ حمد ي ما تنساش اني المحامي بتاعكم
ما تقلقش من موضوع السلم لان السلم في الشارع اصلا وليس جزء من البيت
البيت معروف بتاع الحاج علي الله يرحمه أما السلم فهو ملك الشعب هههههههه
الله يرحمه الأستاذ عبد العزير ابو يوسف لما حصلت الموقعة بتاع المباحث سنة الفين ونزلوا قبضوا على البلد كلها قالي والله لازم الإنتخابات الجاية اجي احتل بيت سيدي بالعافية علشان اشوف عمليات القبض على الناس في الشارع الرئيسي بنفسي مش أقعد أنا جوه في حوض الجديد والأستاذ تيسير يتمتع في الشارع هنا ههههههههه