لليا رأي يا جماعه تعالوا نتجمع علي حاجه كلنا متفقين عليها
( الاحتفال بنجاح ثورة شعب مصر )
عايزين نحدد يوم نتجمع كلنا ونحتفل بنجاح الثورة بس من غير منهاجم حد ولا نشتم بعض ولا نتهم بعض بالخيانة والرشوة وكل الحاجات اللي بتمني انها متبقاش بينا في شباس وياريت يكون ده في اقرب وقت بس نعملها بحب من غير محاولة البعض انه يظهر علي حساب بعض
ا ايه رأيكم يا شباب
خلونا نبدأ بحاجه احنا كلنا متفقين عليها
يا ريت اعرف رأيكم

والله رأي جميل يا أستاذ جمال وأنا بأضيف اليه النقاط الآتية :
1- فين اللي بيكتبوا شعر عن شباس يقولوا شعر فيها ويوصفوا شوارعها ورموزها وتاريخها اللي احنا كلنا فخورين بيه والناس تشجعهم من غير ما نحقد على آبائهم ولا عليهم ولا يحزن الشيوخ على عمرهم اللي ضاع في ظل مبارك
2- عايزين المواهب الرياضية في البلد تيجي المهرجان ده وتظهر مواهبها اللي اندفنت في البانجو والحشيش .
3- عايزين نعمل انشطة شعبية ومهرجانات
4- عايزين المربيين الأفاضل اللي زي سيادتك واستاذتنا الأفاضل يعلموا الأطفال معني الرأي الآخر وقيمة الشوري
5- تعرف يا أستاذ جمال ؟ هناك الآن حوارات كتيرة جدا حول مجلس الشعب ومين اللي حيكون عضو مجلس الشعب في حين في وجة نظري ان المجلس الشعبي المحلي حيكون أهم الف مرة من عضو مجلس الشعب لان الدستور الجديد سوف يكفل لهم لا مركزية القرار والميزانية ودي اهم شئ
6- فيه قصة ظريفة بينت لي حاجات كتير لو حضرتك حبيت انا ممكن احكيها لحضرتك عرفتني مشاكل كتيرة في شباس واصابتني بالإحباط في فترة من الفترات لكن الآن للأسف في الوقت اللي الدنيا بقت ربيع والجو بديع احنا خارج البلد وتقريبا سبعين في المائة من عقليات البلد ونشطائها خارج البلد

اشكرك يا استاذ محمود علي روحك الجميلة المحبه بجد لشباس من غير هوي او رغبه في منصب ( دا انت حتي مش عايز تترشح عمدة المنتدي ) احب اسمع القصة الظريفة دي الاول

السلام عليكم :
اسعد الله أوقاتكم جميعا و بعد .
استاذ /جمال
هل تعتقد ان النتائج التي حققتها الثوره حتى اليوم , تجعلنا نقف و نسعد و نحتفل ?
هل تعتقد بأن تنحي الرئيس المخلوع , أسقط النظام ?
هل تعتقد بأن وزارة أحمد شفيق بما تشمله من وجوه مثل وزير العدل و الخارجيه و الداخليه و البترول و غيرهم من أقطاب النظام المباركي اللذين زورو الانتخابات و أهانو كرامة الشعب و قتلو الشباب و نهبو ثروات البلد ,,و فعلو بالشعب و البلد الأفاعيل بالأمس القريب ,,,
هل تعتقد بأن وجود هؤلاء في الحكم يجعلنا نفرح و نحتفل ?
هل تعتقد بأن احمد شفبق الذي كلفه المخلوع اللامبارك و الذي طالما افتخر بانه تلميذه النجيب , و الذي تهكم على مرأى و مسمع من الدنيا على شباب الثوره في التحرير قائلا بأنه سيرسل لهم بسكوت و بنبوني و مصاصه ,, وجود هذا الشخص على رأس الوزاره يجعلنا نعتقد بنجاح الثوره و نتداعى للاحتفال ?
ألم يقر وزير العدل الحالي تزوير الانتخابات البرلمانيه ووصفها بالانتخابات النزيهه ?
ألم يشارك محمود وجدي في ضرب المتظاهرين في التحرير ?
ألم يتهم وزير الخارجيه المتظاهرين بالعماله و الخيانه و كان يحتفظ بصوره للمخلوع في مكتبه حتى مطلع هذا الاسبوع ?
ألم يزل كل اللذين قتلو شباب الثوره و جرحوهم بالالاف في مناصبهم و أحرارا طلقاء ?
ألم يزل كل محافظي مبارك و قيادات مصر التي صنعها مبارك هي التي تحكم ?
باختصار :
ذهب المخلوع بثروات مصر ولم يذكر مسؤول اسمه على سبيل الحرص على أموالنا المنهوبه او حرياتنا المسلوبه او شهدائنا و دمائهم الذكيه المهدوره و مسؤليته عن كل ذلك و غيره من الكوارث الموروثه ,,,?
لم يذكر مسؤول اسم الشريف الذي له اليد الطولى و انا أعنى ما أقول عنه ,, له اليد الطولى في مسار تاريخ مصر منذ 50 عاما ,,, و لم يذكر اسم سرور ولا عزمي و لا هلال و لا جمال و لا بتوع الجمال و البغال ,,
لم يذكر مسؤل من القائمين على أمور مصر الان اسم يوسف والي الذي دمر زراعة مصر و صحة شعب مصر ,,,
لم و لم و لم و لن ......
لأن كل شيء على ما يرام ,,, ذهب المخلوع ولازالت وزارته ,, و حزبه ,,, و داخليته و خارجيته ,, ...
ذهبت وزارة إعلامه لانه لا يحتاجها الان ,,,
سلم مهامه الى الجيش و هذا الواقع حتى الان ,,,لجنة تعديل الدستور تقوم بتعديل المواد التي أمر بتعديلها ,, و ألغو ما أمر بإلغائه ,,,,
قال هيكل : ان مصر الان تحت حكم شرم الشيخ ..
قال بلال فضل : نقلته الثوره الى شرم الشيخ ,,,
الكل يعرف أن الثوره أسقطت الرئيس و فقط....
أمن الدوله لازال قائما ,, الحزب الوطني لم ينتهي ,,, تم تهريب المليارات من مصر...
السؤال لك أستاذ /جمال
كيف تعتقد بأن الثوره نجحت و حققت أهدافها و تدعو للاحتفال ?!

استاذ /محمود حشله
ارسلت لك رسالة خاصه أسألك :
هل المواد التي يجري تعديلها في الدستور الان يمكن أن يكون لها دور في تحديد مستقبل مصر و ذلك من حيث أن تكون جمهورية رئاسيه او جمهوريه برلمانيه ,, و لم ترد .....

انا لا احتاج الرد الان ,, فبعد مرور شهر على بدء الثوره نسي الشعب أهداف الثوره و أصبحو يتقاتلون بالاراء فيمن يصلح عضو برلمان و من يصلح رئيس لمصر ,,,

للاسف ذاكرة شعبنا كذاكرة السمك ,,,
ينسى سريعا .......

و الحمد لله انني لن أحضر الاحتفال
شكرا لكم

السلام عليكم استاذي جمال وأستاذي الضوء الشارد واساتذتي في المنتدي جميعا :
1- أولا القصة علشان الأستاذ جمال والإخوة جميعا وبإختصار : في غضون عام الفين واربعة طور المحامون في شباس لقاء اسبوعي كان أهدافه في البداية نقابي ثم وسع بعد ذلك من أنشطته بناء على اقتراح احد الزملاء أننا نحاول ان نستخدم قدراتنا على الحوار والجدل واحترام المسئولين لنا اننا نقدم خدمات للبلد وقررنا ان احنا نروح لرئيس مجلس المدينة نطالب ببعض الخدمات وكان الله يرحمه الأستاذ كمال مغيزل موجود ورغم انه لم يكن يحضر الإجتماع لكن وجدنا انه الشخص المناسب كسياسي مخضرم انه يتحدث بإسمنا ونكون جميعا من خلفه وفعلا ذهبنا لمجلس المدينة والحقيقة اننا في البداية لم نكن نعرف ماذا نقول فواحد اقترح مسألة الموقف وانه لازم ينزل لحد الجامع وآخر اقترح مراجعة ملف المستشفي وبيان ما إذا كانت مؤهلة لعمل عمليات صغيرة زي اللوز والزائدة الدودية ودي حاجات حتخفف من على كاهل الناس الغلابة . فرئيس مجلس المدينة ( كان طيار تقريبا ) نادي على رئيس القرية اللي كان متواجد قدرا وعنفه جدا . الحقيقة الراجل عرق وبقت حالته صعبة خالص . ده شجعنا اكتر واتكلمنا عن مشاكل السفر من شباس لقلين والمفروض يكون فيه اتوبيس والحقيقة اتكلمنا كتير وكل واحد عبر عن اللي هو عارفه وطبعا معلوماتنا كانت قاصرة جدا لاننا طبعا كنا متعودين على التهليل والتكبير والتسبيح وخلاص وكنا نظن ان دي هى المصلحة العامة .
طبعا رئيس القرية اتحجج بأن الموقف لا يمكن ينزل عند الجامع لان الطريق مش مرصوف ( وكن في الشتا والطريق وحش خالص ) وأن المجاري منعت الرصف . ففيه واحد رد وقاله الحتة اللي بين االأزهر والجامع خلصت من المجاري خلاص ومفيش مبرر لعدم تحجيرها وبالنسبة للمشتشفي قال حاضر يا فندم حأشوف الموضوع ده فورا .
- اليوم التالي فوجئنا برئيس القرية جاي لغرفة المحامين في قلين وطلب مننا بعد عتوبة كبيرة طبعا اننا نتعاون والكلمة المشهورة ( غسيلنا النظيف ) قلنا له احنا مستعدين للتعاون وطالما انت بتعمل الصح ايه اللي يخلينا نروح هنا ولا هناك . قال طيب ادوني يومين تلاتة بس وحتشوفوا التغيير وانتوا كدة بتساعدوني لاني مقدرش اروح اي مكان الا بناء على شكوي لان شباس لها وضع خاص .
- بعد عدة ايام اتصل بالأستاذ كمال مغيزل الله يرحمه وطلب منه اننا ننتظره في غرفة المحامين علشان حيجيب سيارة ميكروباص ليأخذنا لنري المستشفي والشغل اللي بدأ في الموقف وفعلا رحنا معاه المستشفي وجدنا الدكتور مجدي في إنتظارنا ووجدنا حجرات المستشفي مملوءه بالمرضي وكلهم عاملين عمليات اللوز البواسير والزائدة وبعض العمليات البسيطة الأخري زي الدمامل والحاجات دي لدرجة ان واحد من المحامين هزر وقال هل فعلا انتم عيانين ولا انتوا بس عاملين كدة علشان نشوفوكم . ههههههههههه
وبدأت عملية تحجير للمسافة بين الأزهر والجامع على قدم وساق وفعلا اتحجرت الحتة دي وبدأت العربيات تنزل .
في الإجتماعات اللاحقة لهذه التطورات قررنا اننا نبدأ نتعقب الفساد في كل مكان في البلد في المدارس في الوحدة المحلية جمعية تنمية المجتمع لابد من تفعيلها ونتدخل في بيت المال وقررنا اننا نضم للإجتماع بعض اعضاء مهنيين من نقابات اخري مثل الأطباء والمهندسين والمعلمين .
المهم في القصة : بعد عدة ايام حضر رئيس الوحدة المحلية الى غرفة المحامين وقال انا اريدكم ان تساعدوني قلنا له في ايه ؟ قال دلوقت انا عرفت ان البلد مستكملة مرافق المدينة يعني فيها كل مرافق المدينة وهى مؤهلة رسميا انها تكون مدينة لكن باقي قرار فقط من وزير الداخلية فهل تستطيعوا ان تساعدوني في الحصول على هذا القرار ؟ فسألناه وما الفرق في كون البلد قرية او مدينة ؟ قال المدينة ميزانيتها مليون جنيه والقرية مائتان وخمسون الفا . قلنا والله احنا كل امكانيتنا هى انفسنا . فإحنا ممكن نروح لمكتب الوزير ونقابل السكرتارية بتاعته ونحاول لعل أن الله يوفقنا والحقيقة ان الراجل بدا متعاونا جدا .
في اليوم التالي فوجئنا بمخبرين امن الدولة يسألون عنا وعلمنا بعد ذلك ان فيه ناس اشتكتنا في مباحث امن الدولة وبدأت التهديدات والحاجات اللي حضرتك فاهمها وكانت النتيجة ان كثير منا قال الموضوع كدة حيكون فيه مشاكل ( انا ما قلتش كدة ) وانتهي الموضوع وطبعا الموقف بعد ما خفنا رجع تاني والمستشفي اتصادرت وودخلنا في مرحلة ما بعد الفين وخمسة ودي كانت نهاية فرقة عزيز عيد المسرحية وكانت تحية كاريوكا تتقاضي اجرا لا يتعدي خمسة قروش

حبيبي الضوء الشارد السلام عليكم
فعلا حضرتك ارسلت لي رسالة تسألني عن مدي تأثير التعديلات الدستورية في كون مصر سوف تكون دولة برلمانية او رئاسية :
1- اولا احب ان اعتذر لسيادتك على عدم الرد الفوري لأن الرسالة وصلتني على الخاص وانا مش بأعرف ارسل على الخاص وطبعا دا نظرا لكوني من الجيل القديم يعني بأستعمل النت بصعوبة كمان لم أشا ان أجيبك في موضوع عام على المنتدي لان حضرتك لم تسألني في موضوع عام فلم أشأ ان أفتئت على خصوصيتك . فأرجو ان تقبل اعتذاري
2- بالنسبة للإجابة على سؤال حضرتك فبإختصار إن ما يحدث حاليا هو عودة بالدستور المصري الى مرحلة ما قبل التعديل يعني العودة الي دستور واحد وسبعين مع وضع بعض أحجار العثرة في طريق السلطة التنفيذية إن حاولت التمديد لرئيس الجمهورية اكتر من مرتين والإشراف القضائي وإلغاء الإحالة للقضاء العسكري لغير العسكريين ( وطبعا اتمني لو تعرضوا لمسألة العمال والفلاحين بالإلغاء )
3- طبعا قبل التعديل وبعده فإن مصر لا يمكن تصنيفها على انها دولة ذات نظام برلماني وهو النظام الذي يقوم بإختصار على رئيس محدود السلطات ووزارة يتم تشكيلها من البرلمانيين على ان تشكلها الإغلبية أو كتلة الأغلبية ( يعني الناشئة عن تكتل حزبين او اكثر في كتلة واحدة لتتحقق الأغلبية ) وكذلك لا يمكن تصنيفها على أنها دولة ذات نظام رئاسي مثل الولايات المتحدة مثلا او مثل جنوب إفريقية لانه تظل لرئيس الجمهورية سلطات متشابكة مع البرلمان والقضاء والصحافة في حين ان النظام الرئاسي يقوم على مبدأ الفصل الجامد بين السلطات يعني كل سلطة لا تملك الكثير تجاه السلطة الأخري سوي في حالات محددة وبإجراءات متشددة جدا .
4- بالنسبة لموضوع الإحتفال في شباس بالثورة فإن كان لي ان اقول رأيي تحت مظلة الديمقراطية ( هههههههههه) فأنا اري ان الناس تحتفل فالإحتفال نفسه تظاهره سياسية ولها مدلول وهى رفض الوضوع السابق وتشجيع الثورة واستمرارها وامتداها الي شباس عمير التي لم يكن أحد يظن ان لها رأي وأن فيها شباب متعلم وأن فيها مثقفين ومواهب . هذا الإحتفال يجب ان يحمل شعار أن الجيل القديم عليه ان يرحل . فليرحلوا الي طيارات الحقول وليستمعوا تحتها بالطراوة والشاي اللي على القضب أو فليشاهدوا التليفزيون ( قناة الحكايات وميلودي افلام عربي أم الأجنبي ) ولكن لا يجب ان يقرروا مصير شباس بعد اليوم إن الشباب بين العشرين والثلاثين هم القيادات الآن ولو انا في شباس الآن كنت اقترحت واحد منهم يترشح في مجلس الشعب والباقي يشغلوا مناصب المحليات والجمعيات وكل المواقع السياسية القيادية

أنا أرى أنه كما كان شعار الثورة (سلمية سلمية)
فإن شعار الحكومة هو هو، ( سلمية سلمية ) ولكن لوأد الثورة

لقد تآمر المشير طنطاوى، واللواء أحمد شفيق، واللواء محمود وجدى، وكلهم من العسكر، وأحمد أبو الغيط، على وأد الثورة، والتدرج في الرجوع إلى نفس النظام السابق بشكل سلمى، ودون مواجهة مع الثوار، من خلال ترك هيكل الحزب الوطنى قائم ومستعد للعمل فورا مع كادرات جديدة تنتمى إلى نفس النظام السابق، وترك العديد من بؤر الفساد في أماكنها، بل وترك الرأس الخبيث يستعيد قوته إلى حين.

الأخ الفاضل الضوء الشارد و الواضح طبعا من كلامك إنك محامى أحييكم طبعا على المجهود الرائع اللى عملتوه إنت وإخوانك من النقابة .أنا كتبت فى أحد الاقسام فى المنتدى موضوع عن تحرير شباس .المقصد أنتم إقتصرتم فى إجتماعتكم على فئات معينة من القرية زى ما حضرتك قولت وأنا أقصد بها الحترام طبعا و الله مش الاستهانة زى مهى مفهومة فى البلد سواء محامين ,أطباء, مهندسين.فكان من الممكن تعرض الموضوع على الملأ وصدقنى كان فيه ناس كتيرة هتقف معاكم وتدعم موقفكم الجميل الهادف طبعا لمصلحة البلد وصدقنى أغلبية الناس دى طبعا كانوا هيكونوا من الفلاحين وأنا مش بقلل من قيمتهم لا بالعكس إنا عارف إنهم رجاله وأكيد إنت عارف قد إيه البلد إحتمعت فى صعوبات قبل كده وحلتها وغير الفلاحين فى شباب فى كل أرجاء القرية كانوا هيدعموا موقفكم .ثورة تونس بدأها فرد وثورة مصر بدأها شباب . متخيلتوش لو كنتم نشرتم الموضوع دا على الملئ مش جايز كنتم السبب فى الثورة دى من 2004 مش من2011 وعلى العموم أنا مازلت عند إقتراحى فى موضوع تحرير شباس إن لازم كل فئات البلد تتحد وتكون يد واحدة وشاب واحد ورجل واحد حتى نستطيع التعبير عن موقفنا بصرامة وحرية بدون خوف وبدون قيود.
وجزاك كم الله خير طبعا على حسن الاستماع.

الاخ / كمال الدين
السلام عليكم و رحمة الله و بركاته و بعد :
بداية أشكرك على اهتمامك و متابعتك و انشغالك بقضايا وطنيه و أرجو ان يتسع صدرك لي لتوضيح بعض النقاط :
1‏ ‏- أنا مش محامي و لا موظف حكومه ولا موجود في مصر اساسا .,,
2‏ ‏- الظلم و الافترا كان واضح وضوح الشمس من زمااااان , مش بس من 2004 .
3‏ ‏- حضرتك ذكرت ان البلد اجتمعت كتير قبل كده و حلت مشاكل كتير ,, انا معترض جدا ,, و اعتقد ده مش صحيح اطلاقا ,,,وده رأيي الشخصي ,,, البلد كانت بتجتمع فقط من أجل مرشح الحزب الوطني اللي خربها و قعد على تلها ,, و انا لا أقصد شخص محي القطان اللي كان دايما مرشح الوطني , ..لو كان الحزب رشح حد غيره برده كانو هيجتمعو عليه و ينتخبوه ...ده كان اجتماع البلد أو بالاصح إجماع البلد دائما منذ تأسس الحزب الوطني في السبعينات ...
وده لا يجوز أن تصفه بأن البلد كانت بتجتمع عشان تحل مشاكل , ده ينفع نقول عليه كان الاجتماع على نصر الظلم و نصر سياسات الحزب الوطني الفاسده ,,,
و لو كنت كلمت حد من الالاف اللي كانت بتجتمع و تتجمع كانو هيقولولك دي مصلحة البلد ,,, و النتيجه ان البلد كلها (مصر) راحت في داهيه و اتنهبت و اتسرقت ..الى اخره من المصايب اللي بدأت تظهر و تتفهم للعامه ....
4‏ ‏- البلد هتتحد و تبقى إيد واحده و تعبر عن رأيها بصرامه ....
دي اخر حاجه انته قلتها ...
امته ده ? هيتحدو امته ? و هيعبرو عن رأيهم بحريه امته ?
طب بالله عليك قول .. مصر طلع فيها 20 مليون في يوم 11 فبراير يدعمو الثوره بمظاهرات .. طلع منهم كام فلاح من شباس ??
انا ما كنتش للامانه في مصر بس ربنا شاهد اني لو كنت في مصر ما كنتش خرجت من التحرير الا شهيد ...
و عشان انا ما كنتش موجود كنت باحس بحرج اني أطالب الناس تروح التحرير , عشان ما يقولوش ما تروح انته , أو يقولو اشمعنا احنا هنروح ......
بس ارجع و شوف و إقرا مواضيعي اللي كنت باكتبها هنا في المنتدى من قبل الثوره بزمن لحد ما الاستاذ جمال عباده طلب من الشباب الاحتفال بنجاح الثوره و انا قلت لا ...
قلت لا , الثوره ما حققتش اهدافها لسه ,,, الثوره مانتهتش لسه ,, الاحتفال بنجاحها هيموتها ,,, و فاتني اني أقول ان اللي عايز يحتفل يروح يحتفل في التحرير عشان تنجح الثوره و تحقق أهدافها و يسقط النظام بالفعل ....
واضح انك مش هتوافقني انها فعلا لسه ما حققتش اهدافها و انك شايف ان الاطاحه بمبارك و فضح ممارسات الحزب الوطني كان الهدف ..........

مش كده ?

سامحني ..

شكرا جزيلا

ياريت يكون فيه ناس كتير زى الضوء الشارد فاهمه ومستوعبه اللى حاصل لان ده اكيد هيكون له فوائد كتير وايجابيات لان يحدث الان هو اعطاء الشعب بعض المسكنات حتى يتم تخفيف الالم ايام او شهور وبعدها يعود الجرح غائرا كمان كان بل انه سيكون اعمق بكثير وعلى فكره انا محاسب مش صيدلى

حرام عليك يا محمد
و الله حرام عليك ...
و الله ماعرفت ابطل ضحك لحد ما أدمعت

نهارك زي العسل

متشكر جدا

محمد ابوبكر كتب:

ياريت يكون فيه ناس كتير زى الضوء الشارد فاهمه ومستوعبه اللى حاصل لان ده اكيد هيكون له فوائد كتير وايجابيات لان يحدث الان هو اعطاء الشعب بعض المسكنات حتى يتم تخفيف الالم ايام او شهور وبعدها يعود الجرح غائرا كمان كان بل انه سيكون اعمق بكثير وعلى فكره انا محاسب مش صيدلى

ليه التشاؤم ده يا عم الصيدلى اقصد المحاسب هههههه
اولا انا متفق معاك بخصوص رايك فى الضوء الشارد وتحية خاصة من الاراضى المقدسة الى قبائل الزولو
ثانيا بقه يا عم المحاسب احنا لو سلمنا ان الحكومه بتدى مسكنات وبتماطل عشان تتستر على الفساد اللى منتشر فى جميع الهيئات والمصالح بلا استثنا يعننى وشر البلية ما يضحك انها توصل لوزير العدل نفسه لما خمسة وستون قاضى ومستشار يقدموا بلاغ للنائب العام انه كان بيفرض عليهم احكام ينطقوا بيها فى قضايا معينه وقيس على كده كتييييييييير ولكن
احنا فين
وايه اللى اتغير فينا ان كنا بنقول هنتغير
يعنى لو ده حصل زى ما بتقول وشوية ونرجع زى ما كنا يبقى اكيد العيب للاسف فينا احنا ويبقى احنا اللى المفروض نتغيير ونبدا بنفسنا بمعنى
الموظف المرتشى اصبح مرتشى عشان لقى اللى بيرشيه
والمدرس الفاسد مبيراعيش ربنا فى تلامذته عشان بيلاقى اولياء الامور بيتحايلوا عليه قبل الدراسة بشهرين عشان يقبل الولد فى المجموعه يبقى هيشرح ليه ويتعب نفسه
ولما كان عسكرى ميسواش مللللليييم احمر يوقف اى حد شكله مش عاجبه وياخده تحرى كان بيعمل كده عشان عارف انه مستسلم وهيقول انا عاوز اعيش وخلاص

لو كنا هنقبل بكده تانى يا بكر ونقبل الاوضاع دى تتكرر يبقى الضوء وليس بشارد هيكون عنده حق لما يقول
سلملى عالثورة والله يرحم الشهدا

لكن لا احنا لازم نبقى احسن ولازم نربى ولادنا ان ليهم حق وليهم كرامه وليهم راى وليهم بلد لازم يعيشوا فيها بكرامه وبعزة نفس وميقبلش ابدا اى حد يحجر عليه او على رايه مهما كان ومهما كانت سلطلته

يا بكر لازم احنا اللى نتغير منستناش الحكومه تتغير من اجلنا عشان اهل زمان يا صاحبى قالوا الحداية مبتحدفش كتاكيت

قشدة

حياك الله يا استاذ / محمد عز العرب
و بعد
اسمح لي أن أوضح بعض النقاط:

الواقع يقول ان الثوره قامت لتغيير النظام ,
الى الان لم يسقط النظام و الكل يعرف ذلك ,,,

و لله المثل الاعلى .. فان تغيير النظام و تغيير الشعب . يشبه تمام الجهاد الاصغر و الجهاد الاكبر .. و لكن الجهاد الاصغر لم ينته بعد .. و هناك فرصه لازالت سانحه ان أفاق الشعب و استمر في التظاهر و الاعتصام حتى يسقط باقي النظام ولا عذر لأحد و بخاصة انه لم تعد هناك خطوره على حياة المتظاهرين و المعتصمين ...

طلبت من الدكتور أبو صهيب أن يعرض صفحه جديده لأحداث تجري في ميدان التحرير الان , و لكن هناك تعتيم اعلامي شديد و تام عليها ,,, بمعنى ان سياسات الوطني لم تنته بعد ...

هناك سياسات خبيثه تجري الان و بفعاليه شديده جدا تهدف الى إلهاء الشعب و محاولة انهاء الثوره و موتها و منها أن ينشغل الشعب بصراع الأمن و فقدانه و الثقه في الشرطه التي قتلت و جرحت و عذبت و حصلت في النهايه على ضعف الراتب مكافأه ,,
و منها ان ينشغل الناس بتثبيت في الوظيفه و تقديم طلبات الحصول على وظائف ,,
حتى الجامعات , حل اتحادات الطلابيه و شحن الطلاب في صراعات جديده داخل الجامعه ...

ركز يا بو حميد ..

شكرا جزيلا

يا جماعة الثورة لسة بتبدأ لم تنتهى بعد .
النظام مازال هو هو . بل النظام الحالى أشد عنفا ومكرا
ولو عايز تتأكد ممكن تشوف الفيديو ده بس

تحذير :الفيدو ملئ بالألفاظ البذيئة
والفيديو ده متصور امبارح . هو اللى بيعمل كده الجيش ولا أمن الدولة ؟؟
ولو دول بلطجية فين اللى أجرهم ؟؟ وفتحلهم السجون ؟؟ وحتى لو هم بلطجية اللى بيحصل فيهم ده يرضى ربنا؟؟ ولا يرضى مين؟؟
طيب لو هم مش بلطجية دول مين؟؟ متظاهرين ؟؟ طيب بيعملوا فيهم ليه كده؟؟ عشان بيطالبوا بحقنا؟؟
يا جماعة الحكومة مازالت موجودة بكل قوتها حتى اسألوا مدير أمن البحيرة اللى بيقول احنا أسياد الشعب واللى يمد ايده على سيده تتقطع ايده قصدى يضرب بالجزمة :


واللى هيقوللى ان الراجل ده اتنقل بعد ما قال الكلام ده يوم 25 فبراير هاقوله أولا شوف الخبر ده:
اللى بيقول فيه مدير أمن البحيرة بعد ما ضحكوا علينا وقالولنا انه اتنقل
: لم يصلني قرار رسمي حتى الآن .. و الفيديو مؤامرة للإطاحة بي
وده اللينك http://elbadil.net/مدير-أمن-البحيرة-بعد-قرار-نقله-لم-يصلن/

وأقوله ثانيا ان الراجل ده المفروض يبقى مع سيده هو العادلى مش يتنقل .

يا جماعة الناس اللى بتنزل ميدان التحرير دى بيطالبوا لينا بحقنا وبتبقى النتيجة :
زى ما قالت نوارة نجم

وعليه أنا بأضم صوتى لصوت الضوء الشارد وبأقول
ارجعو الى الميدان
حتى تسقط حكومة شفيق ياراجل النصاب الكذاب المهرج

انا معاك فى كلامك بس انا اللى مخوفنى وعلى فكره ده طبيعى انى اخاف اننا نسكت ونقول كفاية وبعدين نلاقى نفسنا اشترينا وهم اسمه الحريه والديمقراطيه انا متفق معاك بس ده لايمنع اننا يكون عندنا شوية مكر سياسى وبدل ما هم بيحاولو يلتفوا على الثوره ويجهضوها نكون احنا واعيين للحاصل عشان نتفادى حدوث التفاف على الثوره وعشان كمان الناس اللى ماتت عشانى وعشانك وعشان ملايين غيرنا يناموا مرتاحين مش كده ولا اييييييه؟

حبيبى الشارد:
أنا لسة شايف طلبك حالا
اليوم ان شاء الله هاخصص موضوع لاحداث التحرير

على فكره الرد السابق على تعليق محمد عز العرب

إخوانى أنا أتفق معكم فى أن الثوره لم تحقق بعد أهدافها ولكن هناك نقطه أود أن أشير إليها وهى دور الإعلام المصرى فى وأد الثوره .فهل إعلامنا الحالى بمعارضيه ومنافقيه قادر على مساعدة الثوره على الوصول إلى أهدافها.أم أن هذا الإعلام يعمل حتى الأن وفق مصالحه الشخصيه من العاشره إلى التاسعه وما حدث أمس من المذيع التليفزيوني اللامع محمود سعدحين ترك العمل لأنهم خفضوا راتبه الي مليون ونصف في السنة بدلا من تسعة مليون وما قيل أن قناة دريم قطعت إعادة حلقه هاجم فيها إبراهيم عيسى رئيس الوزراء أحمد شفيق.
وأعتقد الأن أن الإنترنت أصبح هو الوسيله الوحيده التى يستطيع أن ترى الرأى والرأى الأخر.

بمناسبة التعتيم الجبار يا شارد :
العقيد عمر عفيفى( محامى الناس ) اللى عايز يعرف مين ده يكتب اسمه فى محرك البحث
المهم الراجل ده كان المفروض يطلع الاسبوع الماضى فى الاتجاه المعاكس مع فيصل القاسم على الجزيرة . وفعلا تم الاعلان عن الحلقة طيلة أسبوع ,لكن تم الغاء الحلقة : وقال العقيد عمر عفيفى:
تم تهديد شيخ قطر بأحداث قلائل بواسطة المخابرات المصرية والموساد وبضغط أمريكي للتعتيم علي ما يجري في مصر
وقد استجاب شيخ قطر تحت الضغط والتهديد لذلك
تلك المعلومات صارت تتردد في مكاتب الجزيرة بواشنطن
وتم ألغاء حلقة لي مع فيصل القاسم كانت مقررة الثلاثاء الماضي تحت الضغط والتهديد
ورغم أنه أعلن عنها طوال الأسبوع الماضي.

واللى يشوف الجزيرة اليومين دول يعرف ان مفيش أخبار عن مصر خالص
وهو ده طبعا اللى كنا عايزينه (قاطعوا الجزيرة) قال ايه بتثير الفتنة!
متزعلش بقى يا شارد الجزيرة لبت رغبتنا تحت ضغط أمريكى اسرائيلى مصرى صهيونى

[img][/img]
ارحل يا شفيق لو سمحت
https://www.facebook.com/pages/ارحل-يا-شفيق-لو-سمحت/144087558987978

استئناف امدادات الغاز المصرى إلى اسرائيل

اللى مش عارف أهمية الغاز اللى مصر بتصدره لليهود يشوف الفيديو الصغير اللى فى اللينك
بيقول استيراد الغاز من مصر بيوفر 10 مليار دولار

يااااااااااه 10 مليار دولار ؟؟