وجدنا منذ قليل اخبار تقول ان مجموعة من الناس تقوم بحفر قطعة ارض ملك لمجلس قرية شباس عمير فذهبنا الى هناك فوجدنا كراكة تقوم بالحفر تمهيدا للبناء وقد قام خمسة من الشباب بالتوجه نحو الحفر فقام بعض الاشخاص بالقول "القطعة دى خاصة بنا وملك لنا ولدينا اوراق بها وسوف نقوم ببناء مسجد " .
كيف وهذه القطعة خاصة بمجلس قرية شباس عمير وقد خصصت لتصبح موقف خاص بالقرية وقد قام الموظف المسؤل من قبل مجلس القرية بالتوجه الى مركز الشرطة بقلين وقد اخذوا اقواله وكلنا نعرف ان الدولة الان فى حالة فوضى وعدم استقرار .
ولكن دعونا ننتظر ماذا ستؤل اليه الايام من أحداث وهل ستقوم قوة من القوات المسلحة بوقف مثل هذا العمل هذا ما ننتظره ؟؟؟؟؟؟

ايه يعنى تفاصيل الموضوع يا احمد ومين دول وهى فين يعنى الارض دى اصلا فى اى منطقه بالتحديد

الارض دى بجوار المعهد الازهرى قصاد بيت الحاج قطب نجم و بجوار بيت الاستاذ عيسوى حامد

يا اخوان القطعه دى طلع بها قرار بتخصيصها موقف شباس عمير الرسمى وده كان قبل 25 يناير باسبوع تقريبا لكن الاحداث عطلت الموضوع وامس قامت عائله الحوامد بالاستيلاء عليها. القطعه دى بجوار المعهد وامام منزل الاستاذ مصطفى قطب نجم وبجوار سور الاستاذ محمد حسن مغيزل

صور قطعة الارض يتم البناء عليها اليوم

هذه الصورة الساعة 8 صباحاً


هذه الصورة من نصف ساعة فقط

لا تعليق هى دى البلد و الثورة و المصلحة العامة اللى الكل عاوزها.
كانوا يقدروا يعملوا كده قبل الثورة . ماشاء الله على نتائج الثورة

ولا معلقش ليه فين شباب البلد دلوقتى على المنتدى بس ؟ مش البلد كلها كانت مستفادة من الموقف ده . مش دى من المصلحة العامة. فين الاستاذ محمود حشلة مستشارنا اللى كان لازم يقول لنا إيه الاجراء القانونى فين عمدة المنتدى اللى المفروض الان يعد العدة لوقف هذه المهزله الشباسية فين ياخوانا الناس فين أبو صهيب اللى كل همه كان الثورة . فين الضوء الشارد الكبير . فين الاستاذ محمد عز العرب . ياشباب كل اللى يقدر يعمل حاجة يعملها بيعملوا أساس مسجد عشان يبنوا فوقه بيت.

مشكور يا اخ احمد على الصور
ملحوظه يا جماعه الارض دى املاك دوله منذ زمن بعيد
يعنى ملكك وملكى وملك الناس كلها. عشان محدش يقول وانتم مالكم

يا اخ كمال حتي لو فرضا أملاك شباس العامه كلها تم الإستيلاء عليها هل هذا معناه إن ده من عيوب الثوره و نقول إن ده نتاج الثوره ونحسس الناس إن النظام القديم هو ال كان بيحافظ ع املاكنا و أظن إن الإنفلات الأمني والحزب الوطني هدفه إنه كل يقول نفس كلامك ده _ والأخ حسام دور الضوء الشارد ال خارج مصر زي حضرتك وأبو صهيب ال خارج شباس أو دوري إيه في موضوع زي ده _ كان المفروض تنادي أخوك وأبيك وأخي وعمي وكل أهلونا ف القرية مش نلمح بشخصيات ف المنتدي فقط _ وياريت نعرف نوقف العمل ده ولو حتي نشتكي أو نقف بنفسنا عشان ده ملك العام لايجوز الإستيلاء عليه

فعلا يا كمال الثورة ليس لها ذنب بل ال بيحصل ده ولازم كلنا نقف بس للاسف كل واحد بيخاف فى الاوقات دى يعنى لو مثلا لو راح وقف هيقولوا ده مين وشغال فين والباقى معروف .
بس فيه ناس راحت وقفت للناس دى واعتقد لو الناس ال استولوا على هذه القطعة من الارض لو كانوا قلبهم على مصلحة البلد كان الاولى ان يحافظوا عليها مش هيخدوها ويبنوا فيها وليس مبرر لهم انهم يبنوا جامع لان لو اعتقد ان كده يبقى حرام ولا ايه وده يعتبر مال عام

أنا اللى ذكرت أسماء ياعبده
دوركم إنكم تقفوا وتتكلموا وتواجهوا زى ما بيحصل فى كل المواضيع وبتردوا عليها بحدية لما الموضوع يتعلق بمحى ولا إخوان .
إنما المرة دى الموضوع بيتعلق بشباس ومحدش سمع ولا حتى ربع تعليق وآدى إنت أهو يا سيدى لما إتكلمت ................ مش عارف أقولك إيه والله أخاف على شعورك تزعل.

لأ مش بزعل يا أخ كمال بس هل ده مبرر إنك تتكلم ع الثوره بهذا الأسلوب وكأنها جريمه أو كارثة حصلت ل مصر ؟ وأظن إن كلامي عن الضوء أو أبو صهيب كان بناءا ع اسلوب الحوار ال إتذكرو فيه وكأنهم عشان بيعلقوا ع محي أو إخوان فلازم يعلقوا ع كل المواضيع وأظن إن مش شرط كل واحد يعلق ع اي حاجه وخلاص وعموما يا أخ كيمو إنت وال أخ حس يعلم الله أني لم أنتقدكم لمجرد الإنتقاد أو المعارضه أو لشئ شخصي _ ولكن بجد أسلوبك يا أخ كيمو عن الثورة بجد زعلني وحسيت إن النظام القديم نجح ف النقطة دي ولسه بيحاول يحسس الشعب إنهم هيندموا ع نعمة النظام القديم ال كانوا فيها _ ويا أخ بقوش ليه لايخرج مثلا الف شاب ويعتصموا ف هذا المكان وبكده محدش هيقول ده معروف مين وبيعمل كده لي :

الاخوه الاعزاء كان المفروض الصحوه دى تحصل مع كل قطعة ارض املاك دولة تم الاستيلاء عليها وليس هذه القطعة فقط وسوف اذكر لكم ايها الشباب بعض ما تم الاستيلاء عليه مثلا منزل الحاج هنداوى بقوش كله املاك دولة منازل عائلة الكاشف الاستاذ محمد الكاشف والحاج عز واخوته ومسجد الكواشف املاك دولة مكنة القطان وقطعة الارض البور خلفها املاك دوله البيت الجديد الذى بناه الحاج عبد المنعم القطان عند بوابة مدرسة عثمان بن عفان (الثانويه سابقا) املاك دوله ومنزل الحاج عبدالمجيد عطالله املاك دوله القطعة التى ذكرها الاستاذ احمد بقوش املاك دوله
ولكم ان تعلموا ان كثير الاماكن بشباس عمير من املاك الدوله تم الاستيلاء عليها والبناء فوقها
ولكن الموضوع باختصار ان هذه القطع جميعا يقوم من وضع يده عليها بدفع ثمنها الي ادارة املاك الدوله فى ابو غنيمه ولا يعتبر هذا استيلاء على املاك الدوله
وهذه القطعه خاصه كانت عليها مشكله بين عائلة الحوامد المقيمين بدسوق و مجلس قروى شباس عمير على اعتبار ان المجلس كان يرغب فى اقامة موقف سيارات عليها ولكن واضعي اليد قاموا برفع قضيه فى المحكمه لضمان حقهم فى ملكية هذه القطعة وقد ذكر الاستاذ احمد انهم لديهم اوراق تدل على ذلك
وما داموا يقيمون مسجد فهو ايضا مصلحه عامه

يا اخ كمال لك التحية اولا ارجو ان تفرق بين الثورة وبين اذناب النظام والله يا اخي انا اعيش في الخارج منذ 19 سنة تقريبا لم اجد احتراما للانسان المصري مثل هذه الايام اي بعد الثورة لقد اثبتت للعالم بأننا قيمة كبيرة جدا ولكن ماذا نفعل حيث كتب علينا ان لا يتم شئ على اكمل وجه ربما هذا قدرنا ولولا وجود اذناب النظام لما شوهت بلدنا ..........
فلنقف جميعا يد واحدة ولا نتشتت فيذهب دم الشهداء هباء

مع كامل احترامى لك يا استاذ جمال هذه القطعة مخصصة موقف واعتقد انهم بيقولوا هيبنوا جامع وده طبعا مش مبرر انهم يقوموا بالبناء عليها واذا فعلا قد حكمت المحكمة لهم لماذا قام مجلس القرية بابلاغ الجهات المسؤلة واعتقد ان اغلب المناطق التى ذكرتها حضرتك يا استاذ جمال قد حكمت لهم المحكمة .

هي المنطقة دي فين بالظبط ياشباب ومين ال بيبني فيها

وضحة من الصور يا عبده ركز هتعرف فى اى مكان بالظبط

يا بقوش أنا بدخل من الموبايل ومش واضحه والصور هعرف منها مين ال بيبني فيها يا كابتن !
قشطه

القطعه دى بجوار المعهد وامام منزل الاستاذ مصطفى قطب نجم وبجوار سور الاستاذ محمد حسن مغيزل

يا بقوش حيرني معاك كمان وكمان يابني بسأل مين ال بيبني فيها _ هو سر ولا إي
قشطه يابقوش

يا بقوش حيرني معاك كمان وكمان يابني بسأل مين ال بيبني فيها _ هو سر ولا إي
قشطه يابقوش

لأ كده بقي أكيد سر
كده أنا عرفت مين
ياناصح ما أنا عارف العيله
كده بقي هشد ف شعري منك
بس لو فيها مشكلة إنك تذكر الشخص نفسه يبقي براءة يا كابتن

والله ما اعرف يا عبده بس تقريبا اغلب العائلة كلها واقفة هناك

يا استاذ جمال انت قولت منزل عائله الكاشف اللى منذ القدم املاك دوله
مظبوط كلامك فعلا املاك دوله واحنا مغتصبنها ووكلينها وبنين تحتها سجن
واى حد بيقرب من الحكومه بنحبسوه وكمان مسكين على الحكومه ذله وكسرين عينا ولذلك سابوا الارض

يا أخ حسام هذا الأسلوب ماعهدته عليك من قبل فهذا ليس أسلوب الراقي الذي تعودنا عليه _ فلك حق الرد بكامل الحرية والتعبير لكن بأسلوبك الذي تعودنا عليه مع أستاذك

مع احترامى لك استاذ جمال فان هناك معلومات غلط ذكرتها لان اعرف ان بيت جدى الحاج هنداوى بقوش ليس كله كما تقول املاك دولة وان هذه الارض من قديم الزمان وهى ملك لهؤلاء الاشخاص وقد دفعوا ثمنها من قبل ان يتم تسليمها لاى جهة رسمية وده طبعا من زمان قوووووووووووووووووووووووى .
ولكن قطعة الارض المستولى عليها الان قد استلمتها الدولة واعطتها لمجلس قرية شباس عمير وقد قام بتخصيص هذه القطعة لتصبح موقف يخدمنا جميعا .

فالسؤال لماذا لم يظهر هذا الورق من قبل الذين يقولون انه لديهم ؟؟؟؟؟؟

بعتذر للجميع
على الاسلوب

أولا يا حسام انا مش متعود منك علي الاسلوب ده
ثانياً انا ذكرت بعض الأماكن أملاك الدولة اللي في نفس وضع القطعة دي
ثالثا برضه للأمانه في عرض الصحيح قلت ان الناس دي دفعوا ثمن الأرض لمصلحة أملاك الدولة بأبو غنيمه أنا مش شايف اني أسأت لأي حد عشان تتعصب كده يا حسام .......... ولو حضرتك قريت طرحي تاني هتلاقي الكلام ده فيه
أما يا عبد الرحمن ماضي القطعة دي مكانها غرب منزل الأستاذ عيسوي حامد وشرق المعهد الديني وهي ملك أبناء عم الأستاذ عيسوي محمد حامد والأستاذ أحمد حامد المحامي وصاحبها حاليا أسمه الأستاذ عبده حامد مدرس في مدارس دسوق ويسكن بدسوق
أما يا أحمد بقوش انا لم اتعرض بأي مغالطات لبيت جدك هنداوي ولا أقدر عشان هم أهلي وانت عارف لكن انا ذكرت بعض القطع فقط لأن عرضك للموضوع لايوضح هذه الأشياء وصور للأعضاء وأغلبهم من الشباب أن هناك استيلاء علي أرض أمللاك دولة وهذه ليست الحقيقة ولكن اسمه البناء علي أرض وضع يد من أملاك الدولة
طبعا مع عدم موافقتي علي ذلك وهذا للعلم ولكن ما ذكرته انت من انهم يبنون مسجد (وهو خدمه عامة ) يجعلنا لانرفضه بالمقارنه بما تم علي قطع أخري من بناء مساكن ( لا أقصد طبعا القديم منها ولكن أقصد الحديث والذي كان في نفس تلك القطعة وتم ضمها أيضا للمجلس المحلي للقريه واسال علي هذا وهي القطعه التي بناها الحاج عبد المنعم القطان علي الطريق العام بجوار مدرسة عثمان بن عفان وحدث هذا البناء والمنتدي ده شغال ولم تذكر هذا الاستيلاء
أرجو يا أحمد أن لا نسيس هذا المنتدي لا تتهم أحد دون أحد ولا تعرض رأي قد يفهم منه أنك مع أحد ضد أحد ولكن انصحك بتوخي الخير لبلدك أولا لسبب بسيط ياأحمد هو أي حد من أبناء شباس عمير سيكون في أي منصب يمكنه من خدمة أهل بلده لن يتأخر ( أي حد يا أحمد ) ومش حد بعينه يا أحمد ( الثورة قامت )
ويارب يا أحمد بقوش تكون انت مرشح شباس عمير في انتخابات مجلس الشعب القادم ويارب تجتمع شباس عمير عليك لأنك في رأي المتواضع أفضل بعلمك وثقافتك من كل الأسماء المطروحة ولو اترشحت يا أحمد أنا أول مؤيديك

شكرا جزيلا يا أستاذ جمال ع الفكر العالي ده

بعد التحيه
أولا كل كلمه قالها خالى جمال صح
وثانيا أنا أعلم ان والد أ/ احمد فى المجلس وهو اعلم وبيحب مصلحة البلد
ثالثا ليه الناس بتوع مصلحة البلد لم يقفوا لأى أحد أخذ أرض أبو غيمه والكل يعلم ان صور محمد حسن ملك ابو غنيمه وده معمول من 3أو4 سنين وليه مافيش حد وقف للحاج قطب نجم وهو بانى البيت الجديد وأخذ من الترب بيتاع الميتين...وغيرها
والله يا جماعه لو حد تبع محى كان عمل ده ماكان أحد واقف ولا متكلم كده
بس دوله عشان حوامد مش اكتر!!!!!!!!!!!!!!

والله العظيم انا قارى الموضوع من اول ا/ احمد ما كتبه ولم اعلق عليه الا بعد ما سألت ناس كبيره وقالوا ان الارض دى مللك الحوامد وبدفعوا اموال كل سنه لأبو غنيمه زيهم زى اى حد بس محى كان منعهم من البنايه عليها بدليل انهم بنوا جزء صغير منها من3 سنين ووقفوا وكانوا وضعوا اساس عليها قبل كده..
وجزاكم الله خيرا

مع احترامى لاراء الجميع فان قطعة الارض المستحوز عليها كيف هى ملك للحوامد وقد تم تخصيصها موقف من قبل المجلس الشعبى المحلى ولماذا لم يقوموا بالبناء عليها سابقا واذا كان فعلا محى مانعهم انهم يبنوا عليها او يخدوها كان ممكن يخدوها فى الفترة من 2000 الى 2005 وأعرف ان لو كان اندفع فعلا فلوسها واتسددت مكنشى اتسلمت لمجلس القرية اما قطعة الارض التى بجوار مدرسة عثمان فهى كانت ملك للحاج احمد القطان والد محمد القطان وبعاها للحاج عبدالمنعم القطان فلا اعرف حكايتها حتى افتى فيها ام حكاية ابى ال شغال فى المجلس فربنا يكرم ال بيروحوا يشتكوا وال عاوزين يصلحوا من البلد وال عاملين فيها شيوخ وبيتكلموا بلسان الدين وهم اول من يخالفوا الدين ...

بعد التحيه
انا اما ذكرت الكلام ده يا ا/احمد انا لم اذكر ان هذا هو راى الدين
وبعدين انت مش فقيه ولا عالم عشان تقول ان انا ابعد الناس عن الدين؟؟؟
ولم اسمحلك اصلا انك تتكلم بالطريقه دى ..
وانا لما ذكرت الكلام ده مش دفاع عن الحوامد ولا غيرهم بس انا ذكرته لان اكتر الناس الموجودين على المنتدى مش قاعدين فى البلد فلما حضرتك تذكر لهم الكلام ده اكيد تشوه صورة الناس دى فى انظرهم وتبين لهم ان انت وبتوع محى خيفين على مصلحة البلد يعينى!!!!!!!!

مع احترامى لك انا ما قلتش ابعد الناس عن الدين وانا لم ادعى انى فقيه ولا غيره بس لما جماعة ربنا كرمهم ومربيين دقنهم وبيتكلموا بإسم الدين ويروحوا يشتكوا الموظفين بلا وجه حق يبقى دول شيوخ وانت عندك شك ولا حاجة ان احنا خايفين على مصلحة البلد ولا انت لوحدك بس ال خايف على مصلحة البلد !!!!!!!!!!

اولا مين ال اشتكى مين انا لا اعرف شىء عن الموضوع ده
ثانيا انت راجل متعلم مش عشان واحد مربى دقنه وحش يب كل الناس ال مربين دقنهم وحشين صح ولا غلط

ياباشا انا مقولتش على كل ال مربيين دقنهم انا قلت على ناس عرفهم كويس اعتقد ان الجماعة ال بقول عليهم ناس كتير غيرى عارفه مين هما .

ماشاء الله على الحوارات و النقاش والثقافة و الفكروالتعبير وتاريخ البلد المحفور فى عقول الناس.
هعلق تعليقات بسيطة بخصوص ردود بعض الافراد وهخصص.
أخى فى الله عبد الرحمن كل نظام وكل حدث وكل ثورة بيكون لها إيجابيات وسلبيات ومفيش إتنين يختلفوا على الكلام ده وإيجابيات الثورة مشاء الله عليها شباب إستشهدوا وصورتنا إتحسنت فى بلاد كتييروأثبتت الثورة إن الشعب هو الاساس وإنزالت رؤوس الفساد ودا هو الاهم اللى الكل مبسوط بيه. أنا يا أخ عبدة مزعلتش لحظة واحده بسبب الثورة بالعكس أنا كنت واخد فكرة غلط إن الشعب جبان لكن وفكرتى إتغيرت من جذورها . لكن خلينا نتكلم بلسان الواقع وهكلمك عن أبسط شئ حصل بعد التغيير ( الثورة المضادة ) ومتقلش انهم أتباع الحزب الوطنى ولا هسميه الوثنى زى ما بتقول لانهم ناس بدوا يحسوا بناقوس الخطر الذى بدأ يدق أبواب بيوتهم وقف الحال اللى حصل والناس كانت مفكرة إن كل شئ هيتغير فى لحظة وإرتفاع نسبة الجرائم و البلطجة ومتقلش برده أتباع الحزب الوطنى وكل يوم مصلحة عامة تعمل إضراب وحال الناس يتوقف إنت بره البلد ياعبده زى حلاتى لكن بص بعنيك كويس على بقى يحصل للناس ومتسمعش بأذانك بس. وأرجو تتقبل بكل سعة صدر.
أما حبيبى عبد الرؤوف إنت لسه فى مقتبل العمر ووخداك الحماسة قوى وإنا فكر بعقلك شويه ياعبده وبلاش كلام التباعية و التعصب مع أوضد حد اللى ناقشنى فيه قبل كده الاستاذ جمال . خلينا هنا داخل المنتدى إخوان وخارجه لكن الكلام اللى لسه راسخ فى عقلك دول تبع محي ودول تبع فلان بلاش الصيغة دى بقة يااخى إنساها إحنا فى عصر الثورة .إنت حر إنتخب اللى انت عاوزه وغيرك حر ينتخب اللى هو عاوزه . وخيلنى اقول للأستاذ جمال برده مرة تانية وسامحنى ياأستاذ جمال جيلكم هو السبب فى كل اللى حصل لعقولنا . مهو لو كل والد كان لابنه يابنى إختار براحتك وفكر فى المصلحة العامة بس مكنش حصل كده لكن تورث العادات و التقاليد هو السبب .أرجو من الاستاذ جمال الجلوس مع عبد الرؤوف شويه .

أخي الفاضل كمال الدين متفق معك تماما أن للثورة سلبيات ولكن غير متفق أنك تتجاهل دور أمن الدولة والحزب الوطني ف الثورة المضاده ولك أن تعرف رأي ف هذه الثوره الذي إحتقظت به لنفسي لكي لا أحبط شباب المنتدي من وجهة نظري البسيطه أن هذه الثوره الجميله لم تقم ع وازع ديني وأنما قامت ع وازع زغيف العيش والحرية والديمقراطيه و هي مطالب مشروعه ولكن لو قامت الثوره ع وازع الدين وأن الشعب يريد تحكيم الشريعه لشعرت بأنها ستنجح نجاح كامل ولو تتذكر أن النبي وأصحابه تم حصارهم 3 سنوات في شعب ابي طالب حتي أكلوا ورق الشجر حتي إنتصرو بعد الصبر لأنهم كانوا يدافعون عن دين
ولكن حتي ولو قامت ع مطالب مشروعه فندعوا من رب البرية أن يحفظها وأن يولي علينا خيارنا

معاك يا عبود بس برده المطالبه بالحقوق واجب شرعى ورد الظلم واجب شرعى وكل مطالب الثوره عادله ومشروعه ومعاك فى انها لم تقم فى الاساس على وازع دينى بحت وهو تطبيق شرع الله لذلك المطلوب الان هو تعديل النيه وبالصبر كله هيجى ان شاء الله

بغض النظر عن الشد والجذب بين البعض ..فاعتقد ان المسجد او الموقف الاثنين مصالح عامه طيب ايه المشكله لو سابوها تبقى موقف وخاصة ان المساجد كتير فى المنطقه دى.. لان القائم على البناء فى الحالتين مش مستفاد الا اذا؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ وانا بعتب على حسام على الرد بتاعه لان ردوده السابقه كانت كويسه جدا ..وانت يا بقوش ايه اخر التطورات.معلش تعبينك معانا .

بعد التحيه انا بشكر الاستاذ جمال عباده على الكلام الجميل بس انا عايز اقول انا الارض دى ارض ابو غنيمه فعلا بس دى كان من سبع سنين لم الاستاذ عبده حامد بنا فيه اوقفه عن البناء محى القطان وقال له انها املاك دوله وطبعا يا احمد ان مجلس القريه قد خصصه موقف لان محى القطان قال البس طرحه والف البلد بهالازم الارض تكون املاك دوله اذا الحوامد بنوا فيه وكانت القضيه فى المحكمه منذ سبع سنوات لم حكمت قامت هيئة المساحات بقياس القطعه وكله سليم وكابتن احمد البلد كله بتبنى على اراضى الدوله

ما معني أملاك الدولة في شباس عمير
السلام عليكم اخواني الأعزاء ، أسمح لنفسي بمناسبة أني تعاملت مع هذا الموضوع من قبل في أحد القضايا أحب أن أوضح هنا ما فهمتة من موضوع املاك الدولة في شباس عمير .
كما تعلمون حضراتكم فإن شباس عمير وجزء كبير من محافظتي كفر الشيخ والغربية كانت قد انتشرت فيها أمراض الملاريا والكوليرا في الأربعينات من القرن الماضي . وكما تعلمون سيادتكم ان الملاريا تنتشر عن طريق البعوض ، والبعوض يتكاثر ويكثر في الأوساط التي توجد فيها مياه راكدة ، وكانت محافظة كفر الشيخ من المحافظات التي تنتشر فيها البرك والمستنقعات وهذا ما دعا إلي تسميتها منطقة براري أي ينمو فيها أشجار الغاب والأشجار الأخري علي البرك التي تكون في الغالب تحتوي على الملح واللي من حضراتكم كبير شوية يفتكر الملاحة اللي كانت في ارض العصاروة وكنا نصطاد منها سمك وكان آباؤنا واجدادنا يحضرون منها الملح ( قرامي قرامي ) .
مع انتشار الأوبئة رأت الحكومة أنه لمحاصرة هذه الأوبئة يجب ردم البرك والمستنقعات ، وبالفعل مدت خطوط سكة حديد مؤقتة داخل القرية لنقل ردمة من الحقول المحيطة الى داخل البلد إلي اماكن المتستنقعات وقامت بردمها بدون استئذان من اصحابها ظنا منها انها تعمل لمصلحتهم وهذا صحيح إلي ان انتهي الردم . حتي الآن الأمور مية مية . بعد ذلك صدر مرسوم من الحكومة ( كان النقراشي باشا هو رئيس الوزراء على ما اذكر ) بتحصيل تكاليف الردم من الفلاحين ولم يقر أن الأمر متعلق بالامن القومي للشعب كله وأرفق بالقرار ان من يمتنع عن دفع تكاليف الردم التي هى في الحقيقة أعلي حتي من قيمة الأرض في هذا الوقت تصبح ارضه ملكا للدولة .
طبعا الناس لم يكن لديها هذه الأموال ، الناس ما كانتش لاقية تاكل ، ومع ذلك صدر القرار بمصادرة كل الأراضي التي تم ردمها في شباس عمير وتم انشاء إدارة لأملاك الدولة في قرية ابي غنيمة مركز سيدي سالم ولذلك سميت املاك ابو غنيمة وسميت أرض أبو غنيمة بل وسمي بعض الناس في شباس عمير بأبي غنيمة ههههههه .
ثم نسيت الدولة الموضوع أو قل انها كانت مشغولة في قمع الناس وتعذيبهم وانهاء الحياة الديمقراطية وتلقي الهزائم العسكرية واحدة ورا التانية زي الصعيدي اللي خد عشرين قلم على قفاه على سهوة في فترة الخمسينات والستينات . ثم عادت المطالبات في السبعينات والثمانينات والتسعينات والعقد الاول من القرن الحالي .
في الثمانينات من القرن الماضي كانت هناك قطع كثيرة ليس لها اصحاب في كثير من الأماكن في شباس عمير وهذه وضع الكثير اليد عليها وقاموا بعد ذلك بتقنين اوضاعهم بالشراء من هيئة املاك الدولة بأبي غنيمة وحدثت كثير من التجاوزات لكن هذه التجاوزات لم تكن موجهه ضد الدولة وإنما ضد الملاك الأصليين لان الدولة ليست على حق في هذا . من هذا يا إخواني يتضح ان أملاك الدولة في البلد ليست وقفا ولا ارضا متروكة بل هى ملك الناس كل الموضوع انهم عجزوا عن دفع ثمن الردم بسبب الفقر الذي تسبب فيه البهايم اللي حكموا مصر على مدي ثمانين عاما . ولولا هذا الردم لكانت المياه الآن امام منزلنا في عزبة السبيل ( سميت بهذا الإسم لانها كانت مرسي سفن ههههههههههه يعني كان زمان حاملات الطائرات بتضرب في البلكونة بتاعتي ) وطبعا البحر سميت بذلك علشان كان عنده نهر ههههه وكان حوض الجديد القطعة خمسة وعشرين كلها أبو غنيمة
قال الشاعر عن شباس في احدي الليالي وهو راكب الطائرة وعائد الي شباس :
هذي شباس وقد بانت مآذنها : وذاك صوت نداء الشيخ محمود
هذي جداول حوض كنت أطرقها : حوضا جديدا وحوضا ليس بجديد
ذياك مشروع لا ندري نهايته : عزب السبيل وأصوات الأغاريد
هذي فواكه يوم السوق نطعمها : هذي عناقيد جيئت من عناقيد
هذا حماري الذي قد كنت أركبه : لم يشتك ابدا أو يأب تقييد
ستي فهيمة تزهى بي كعادتها : ما عدت ألقى يا ستاه تمجيد
وأبي يعلم درس الضاد في الصبح : وفي المساء يعلم درس تجويد
إني أحبك يا شباس وكلما : طردوني منك وقفت غير بعيد

تسلم يا استاذ محمود على التعليق الجامد ده وبرده عندنا عند الازهر كان فيها ميناء بس حرام كنا زمنا بنصيف وكنا زمنا ساكنين على البحر ..

قطعة الارض دى بتاعة الحوامد وانا جلست مع بعض الاشخاص منهم وقلولى كده

رغم دخولي المنتدي اكثر من مره ,دي اول مشاركه ليه في منتداكم الجميل لان الموضوع شدني ان اقرأ كل التعليقات للمشاركين.واي كان سبب المشكله واي كان حيثياتها فان اكثر ما اعجبني في الموضوع هو اعتذار الاستاذ حسام وهذا ان دل فانما يدل علي حسن الاخلاق وادب الحوار ورقي المستوي الفكري للشباب.وايضا اشكر الاستاذ محمود علي توضيحه للجانب القانوني للموضوع وعلي خفه الظل وحسن الحوار.وارجوا ان يضع الشباب في ظهنهم قبل كتابه اي شئ اننا اهل بلد واحده ومهما كان الخلاف ما دام انه لا يمس للدين والعرض فانه يمكن تداركه ويجب ان نتذكر دائما ان شباس بلد تربطها علاقات صهر ونسب متشابكه جدا فكل العائلات تقريبا اقرباء فيجب علينا توخي الحظر قبل نسب اي تهمه لاي شخص فمن المؤكد ان هذا الشخص احد اهلنا باي صوره (أب,عم ,خال,نسيب ......الخ)

هزود بس يا استاذ محمود ان المياة دي هي السبب في انتصار شباس عمير علي الحملة الفرنسية ( بس مش فاكر حكاية قرامي قرامي ) دي يا متر

السلام عليكم أستاذي جمال عبادة ، انا بس افتكرت ستي رئيفة في مرة كنت بأصطاد في الملاحة وبعدين جيت في الحر وطبعا خدت علقة مظبوطة فرحت غضبت عندها فسألتني قلت لها كنت في الملاحة قالت لي كنا بنجيبوا منها الملح قرامي قرامي ودي جمع ربما قرماية أو قرمة مش عارف بس هى جمع تكسير حبيبي يا أستاذ جمال وسلامي للأستاذ محمد اخو حضرتك الراجل اللي خدمنا في يوم من الأيام من غير أي علاقة مباشرة .
حبيبي الأدمن الف شكر علي المجاملة الكبيرة دي .
جزاكم الله خيرا يا أخ أيمن
الإخوة جميعا مسألة الموقف مش المفروض اننا نتقاتل عليها دي مسألة نفكر فيها ونشوف لها حل . المشكلة اننا كان عقلنا مغيب فترة طويلة ، مثلا كان فيه أفكار بتقول اننا نعمل كارتة قلين شباس طريق الكردي ليه ؟ علشان قزمان مش معانا في الإنتخابات . فأدبا لها مفيش عربيات مش موضوع مصلحة البلد وفي الحالة دي كان الموقف حيكون عندنا ولما قزمان بقت مع مرشحين شباس . خلاص العربيات تعدي علي قزمان .
الآن عايزين مجلس شعبي محلي من الناس المحترمة قادر على المواجهه ومنتخب وله قدرة على ايجاد حل للمشكلات دي وإن شاء الله البلد حتكون أحلي بلد في الدنيا وحيبقى سهل علينا اننا نعزم واحد من اصدقائنا خارج البلد في الشتاء

استاذى وحبيبى
طبعا مش غريب ابدا عنك خفة الدم المعهوده وانت عارف انى بحبك من زمان هههههههههههه يمكن من ايام القرامى او قبلها بقرمايتين كده هههه مساك زى العسل
وانا اؤيد حضرتك بخصوصو موضوع الموقف او الجامع اننا المفروض نشيل من دماغنا حكاية التعصب والانتخابات ويكون المصلحة العامة هى هدف الكل وا ن شاء الله يكون عندنا مجلس محلى فاااهم ويلاقى حل للمشكله دى وطبعا ده دورنا يا استاذنا اننا نختار المجلس الفاهم ده والا هنقوم وراهم ونعمل ثورة بقرامى الملح

وتحيه خاصة لاخوية وصاحبى ايمن العالم ومعاه فى رايه الجميل والمتزن

قشدة

دا اللي حياخد قرماية في دماغه يا أخ محمد في الثورة دي مش حيقوم تاني
قشطة عليك يا باشا

الف شكر يامحمد وان شاء الله اشوفك عن قريب
مشكور جدا ي استاذ محمود