كنباوي علي طول
Kanabay for ever






حزب الكنبة هو حزب يضم فى عضويته كل من كان يشاهد ثورة شعب مصر فى 25 يناير من خلال كنبة بيته ولم يقم الا لعمل كوب من الشاى
وحزب الكنبة يضم مؤيدين ومعارضين للثورة ويسألون اسئلة وساحاول ان ارد عليهم بدون الدخول فى فذلكة سياسية

السؤال الأول: مين شباب 25 يناير؟
الاجابة: مافيش وصف محدد للشاب ال 25 يناير...لو قصدكم على ممثلين الثورة..فامافيش برضه ممثل معين..ودة لان الثورة دى جديدة علينا ,,لأننا متعودين ان الثورة شخص...هوجة عرابى..سعد زغلول..جمال عبد الناصر ومحمد نجيب..اما الائتلافات ومجلس الثورة فهى مكونة من نشطاء وحركات سياسية لضمان نتائج الثورة مثل الجمعية الوطنية للتغيير وشباب 6 ابريل والاخوان المسلمين وحركات تانية سياسية وحقوقية مثل كفاية


السؤال الثانى: امال مين وائل غنيم؟
وائل غنيم شاب مصرى يعمل بشركة جوجل الامريكية ومن مؤسسى جروب كلنا خالد سعيد...وهذا الجروب قام بمشاركة حركات سياسية كبيرة فى الاعداد للثورة وهذا الجروب والمشتركين فيه ساهموا فى قلب قضية خالد سعيد لقضية رأى عام واعادة تشريح جثته والعمل على دفع الشباب للخروج الى الشارع فى وقفات احتجاجية صامتة على كورنيش الاسكندرية وكورنيش النيل بمصر وهذا الجروب هو من اختار يوم 25 يناير وجمعة الغضب


السؤال الثالث: بس وائل غنيم طلع ماسونى
حتى لو طلع ابو لهب انت فارقة معاك فى ايه؟ ركز معايا وائل ماقالش انه بطل ولا عايز يبقى جيفارا..وتشويهه دى خطة الحزب الواطى من زمان..يخلى الثورة شخص وبعدين يشوهه..زى ما حصل لنعمان جمعة رئيس حزب الوفد السابق وايمن نور من حزب الغد والبرادعى..نفس الاسلوب البيئة بتاع الحزب الواطى..ومش عارف انتوا يا حزب الكنبة ليه بتقعوا فى نفس الخطأ..وبعدين انت عارف يعنى ايه ماسونى اصلا؟


السؤال الرابع: بس هو فعلا مزقوق من الامريكان علشان طنط جارتنا ابنها ملازم فى المرور عارف كل حاجة
طب وائل غنيم جاسوس..تحب نرجع مبارك؟


السؤال الخامس: طب هو مبارك مش راح شرم..هم عايزين ايه تانى؟
اولا مين هم؟ لو انت مش شايف انك جزء منهم..خليك سلبى وماتعترضش عليهم..اشمعنى يعنى كنت سلبى ومبارك بيورث ابنه مصر ومسلمها لاحمد عز؟..اعتبرهم زى مبارك يا اخى..ولا علشان هم ماعاندهمش امن الدولة تعترض عليهم ومبارك كنت عامل نفسك مش واخد بالك..طب ايه رأيك بقى ..دول اللى شالوا مبارك..تانى حاجة حسنين هيكل التعلب السياسى بنفسه طلع على القناة المصرية اللى تحت سيطرة الجيش وقال مبارك يحكم مصر من شرم..ولا انت بتفهم اكتر من حسنين هيكل وشباب الثورة والجيش اللى سامح بكل دة يتقال..اعمل لك كوباية شاى تانية وركز


السؤال السادس: انا زهقت ما تخليهم يبطلوا يروحو الميدان..مش طالبة زحمة
اكيد لما مبارك وامن الدولة والداخلية ما يقدروش عليهم هم مش هسمعوا كلامك ولا كلامى ولا كلام اى حد الا ما تتحقق مطالبهم...وميدان التحرير اكتسب شهرة عالمية وكل الدنيا مبهورة بينا...انت كدة كأنك بتطلب من الصين تشيل السور العظيم بتاعها علشان سادد عليهم منظر البحر..وبعدين زهقت من ايه؟ دى ثورة مش كرنفال الكربة ولملم


السؤال السابع: بس عيب اللى عملوه فى مبارك ..دة كبيرنا
ممكن اعتبرة كبيرنا لو كنا عصابة...يعنى مش محتاج اوريلك كم الفساد والنهب ويكفى ان محمد حسنين هيكل قال على القناة المصرية اللى هى تبع الجيش ان موضوع الضربة الجوية دة كلام مضحك وانه ازاح ابطال اكتوبر كما تزيح المرأة الغيورة ضراتها..وانه كان بياخد 800 900 مليون جنيه من مخصصات قناة السويس لنفسه...تانى حاجة تقدمه فى السن لن تعفيه من المسائلة ولا المحاكمة...ومش من المنطقى رجل استهزأ بشعبه وقال على المعارضة خليهم يتسلوا ونطلع نلطم ونقول له خد الدوا يا ريس ولا لما يلاقى حزبه لاهف كل مقاعد البرلمان ويشكر عز على الهواء على نزاهة الانتخابات ..واقول معلش اصل سنه كبير


السؤال الثامن: بس مش هو اللى بيعمل كدة..دة ابنه واللى حواليه
وهو صغير مش واخد باله ان الوزرا دخلوا الحزب ورشحوا نفسهم فى مجلس الشعب وبيسرقوا؟..اذا كنت انا عارف وانت عارف..هو مش هيعرف؟


السؤال التاسع: طب ايه موضوع حكومة تكنوقراط دى؟
تكنوقراط يعنى ناس محترمة ليها خبرة فى مجالها ولا تنتمى لحزب ومحبوبة بين الناس..كأنك مسكت احمد زويل التعليم


السؤال العاشر: الاخوان الاخوان..يا خرابى..القرضاوى جيه ..احييه احييه
انشف ناشف كدة وماتقعدتش تلطم زى اسرائيل وبطاقتك فى ايدك انزل وانتخب


السؤال الحادى عشر: طب انتخب مين؟
الثورة قامت علشان ماحدش يبقى وصى على حد ويقول لك انتخب مين..اتعب شوية واقرا البرامج الانتخابية وانت على الكنبة


السؤال الثانى عشر: يعنى عاجبك اللى حصل فى مصر دة؟
لو قصدك على التلاتين سنة بتوع حكم مبارك اكيد مش عاجبنى..لو قصدك على الحرق وتهريب المساجين برضه مش المتظاهرين..مين اللى طلعهم..انا مش النيابة ولو ردك ان المباحث هى اللى طلعتهم يبقى انت رديت على نفسك خلاص وعرفت مين اللى كان خارب البلد


السؤال الثالث عشر: طب والمطالب الفئوية
واضح انك ناسى الاعتصامات اللى كانت قدام مجلس الشعب..المطالب دى من زمان وهى شغالة وماحدش عبرهم..ابتدوا من قبل الثورة وانضموا للثورة ولسة مكملين


السؤال الرابع عشر: بس دى هتخرب البلد
اللى خرب البلد جهاز امن الدولة اللى كان معين ناس فى نقابات العمال وكل النقابات وماكانتش بتجيب للناس حقوقها


السؤال الخامس عشر: ايه الثورة المضادة؟
الثورة المضادة انك تلاقى حسام البدراوى عضو الوطنى السابق بيعمل حزب اسمه 25 يناير..وانك تلاقى اشاعات عمالة تطلع من رجالة صفوت الشريف لافقادك الثقة فى الثورة والشباب اللى عملوها فتختار واحد كنت تعرفه من النظام القديم..الثورة المضادة انك تلاقى رجالة امن الدولة بتولع بين الناس وتبعت الرجالة والبلطجية تسرق وتقتل وتقومك على الداخلية فى نفس علشان الثورة ما تنجحش وتتمنى عودة حد من النظام القديم على اساس انه فاهم فى البلد


السؤال السادس عشر: يعنى بعد الثورة كيس المكرونة هيبقى بكام؟
يا ريت نبص لابعد من كيس المكرونة والفرخة..25 يناير المطالب كانت عيش..حرية..عدالة اجتماعية..لو حاسس ان الكلام دة ميأكلش عيش..هاقولهالك بالطريقة اللى انت تفهمها..لما مديرك ما يدفعش رشوة علشان المسئول الفاسد هرب بعد الثورة او اتقبض عليه..الفلوس الزيادة اللى مع مديرك دة مفروض يشبرئك بيها او يكبر البيزنس فتكبر انت معاه او يرخص الاسعار علشان
المنافسة فكيس المكرونة بتاعك هيرخص


السؤال السابع عشر: يا عم امريكا واسرائيل وايران هتحتلنا بسبب الثورة
اسرائيل بعد اول يوم من الثورة وهى عاملة زى النسوان وعمالة تلطم..على الغاز ومعاهدة السلام وبان قد ايه هو ضعفاء..وبعد الضغط الشعبى الغاز انقطع عنهم.زولما فتحوا بقهم زيادة الجيش سمح بعبور سفينيتين ايرانيتين فاتلموا خالص وابتدوا يدوروا على غاز عندهم..وبالراحة كدة مع بعضينا..بن اليعازر مدير الموساد السابق قال على مبارك كنز استراتيجى لاسرائيل..ليه؟علشان مبارك كان بيغذى فينا فكرة الرعب من اسرائيل بقالوا تلاتين سنة..دة غير انه كان بيديهم 40 % من الغاز الطبيعى بتاعهم. بتلت الاسعار العالمية..وبعد ما قفلنا الحنفية..عملوا ايه؟ ولا حاجة..وامريكا تحتلنا ليه..طب والكونجرس واعداء اوباما السياسيين هيسيبوه مثلا ومايستغلوش الظروف..انشفوا بقى وشوفوا الدنيا بتقول علينا ايه منهم اوباما نفسه اللى عايز يحتلنا..اما عن ايران..فهى اصلا مش عدو وعندها ثورة..ومن الاخر لا ينصح باحتلال دولة قامت فيها ثورة وتعداد سكانها تمانين مليون


السؤال الثامن عشر..ايه العلمانية ولعياذ بالله
العلمانية مش معناها الكفر والالحاد..فصل الدين عن الدولة تشريف للدين والمثال واضح وقريب..لما شيخ الازهر اتدخل فى السياسة وفتى بعدم جواز صلاة الجمعة وقت الفتن لاجهاض جمعة الغضب والبابا شنودة لما قال ولادنا مايتظاهروش ودة كان تأييد منهم لمبارك..ايه اللى حصل؟ ماحدش سمع كلامهم ....وبقى ايه منظر الازهر وكنيسة الاسكندرية؟ مش كان احسن مايتكلموش
ومايتدخلوش فى السياسة؟..شفت لما السياسة بتدخل فى الدين ايه اللة بيحصل؟..شفت ايران مثلا لما رجال الدين ايدوا الثورة المصرية وبعدين قتلوا المتظاهرين المؤيدين لنفس الثورة؟
ومشكلة العلمانية انها كلمة بقت سيئة السمعة من تأثير النظام


السؤال التاسع عشر: طب انا ليه حاسس بالقلق
منطقى جداً...دى اول ثورة تشوفها...والوضع جديد ولازم تقلق ولازم تتفائل..اسرائيل فقدت حليفها الاول والشعب فاق..وانت لازم تبتسم وتشكر الشباب اللى ماتوا علشان انت تخلص من عصابة مبارك


السؤال العشرين: طب انا مين وتبع ايه ونزلت المظاهرات ولا لأ واخدت لك كام رصاصة؟انا اسمى امين ونزلت او مانزلتش دة بالتعبير السياسى "شأن داخلى" وكل ثورة وانتم طيبين... يا رب نكون خلصنا...

جامدة جدا

قشطة

برده فنان زي ابن خالك الهمام
خلينا بقه
نخش المنتدي عشان نشوف كلام يتقرا صح
الله ينور عليك وعلى ابن خالك
ماهو انتوا شاربين السياسة شرب

السؤال الحادي والعشرون : انا ليه حاسس بالنكد
لما تلاقي مصر كلها بتتكلم علي الثورة وبتترحم علي الشهداء وبتقرا الجرايد واخبار الفاسدين والمرتشين وسارقي اراضي الدولة والموافقين علي ظلم وضيم الشعب من مبارك وعز والعدلي وعزمي وسرور و...... غيرهم من مصاصي الدماء والمطيبيتيه بتوعهم أعضاء مجلس الشعب الفاسدين الذين رضوا بإقتسام خيرات مصر مع الحراميه الكبار أسيادهم ........ دا كله وتلاقي ناس غلابه في شباس عمير مش فاهمه مضحوك عليهم لسه بيتخانقوا عشان عضو مجلس شعب كان أحد عناصر هذه المنظومة الفاسدة مفيش بلوه بتطلع في الجرايد إلا واسمه فيها ولسه عايزينه تعمل ايه

السؤال اتنين وعشرين
هو يحيي الجمل ده شغلته ايه ؟ شغلته يقرفنا ؟
السؤال الثالث والعشرين هل فعلا ما يقوله الأخ 25 يناير ان لسة شباس عمير فيها مناقشة بخصوص انتخاب اعضاء ( وليس عضو واحد ) ومرشحين سابقين في الحزب الوطني الله يجحمه ؟ لو كان فيه فعلا حوارات من هذا القبيل يبقى فعلا بلدنا معمول لها عمل سفلي ومش حيطلع غير بطبلة وزمارة .
السؤال الرابع والعشرين
هل تم شهر اي جمعية خيرية في شباس عمير من تاريخ الثورة حتي الآن ؟ وايه الأفكار اللي بتشغل بال الناس ومانعاهم من الحركة الخيرية . كانوا بيقولوا امن الدولة . وكانوا بيقولوا أعضاء مجلس الشعب علشان خايفين احسن الناس تحبهم . طيب ما عادش فيه امن دولة ولا أعضاء مجلس شعب . ايه يا جماعة فين الهمة ؟

يا احبائي دعونا نعيش الحرية والتي هي احترام اراء الاخرين طالماكانت بطرق مشروعة
شباب الثورة قبل بنتائج الاستفتاء وهو يعارضها هذه هي الحرية
مش كده والا ايه
علي راي فؤاد المهندس

محمودالنجار كتب:

برده فنان زي ابن خالك الهمام
خلينا بقه
نخش المنتدي عشان نشوف كلام يتقرا صح
الله ينور عليك وعلى ابن خالك
ماهو انتوا شاربين السياسة شرب

ابو ريماس .. حبيب قلبى
احنا مش شاربين السياسة شرب
أبسونتلى

احنا واخدينها ملفوفة فى سيجارتين


قشطة

ابو ريماس الغالي
الله يبارك لك
احنا شاربين السياسه الله يرحمه عمي محي
استاذ الاساتذه
يا فنان

ماشى يا إبن الحاج حسنى بتذاكر من ورايا....... الله ينور مقال جميل ....باشا

الأستاذ محمود حشلة
تم اشهار جمعية خيرية جديدة في شباس عمير بإسم الجمعية المصرية للإصلاح بهدف
1- نبذ الخلافات السياسية بين أبناء شباس عمير
2- دعم العمل الخيري والجمعيات الأهلية القائمة ( كل في مجال عمله ) ومعاونتها علي أداء رسالتها الخيرية لخدمة اهالي شباس عمير
3 - نشر الوعي الثقافي والسياسي والديني
4- إذكاء روح الحوار البناء
5- رعاية المتفوقين من ابناء شباس عمير
6 - رعاية حقوق الإنسان
7- قبول كل الأفكار التي من شأنها رفعة القرية وتحقيق العدالة الاجتماعية
وقد توزعت أنشطة الجمعية علي لجان :
1- اللجنة الاجتماعية
2- اللجنة الثقافية
3- اللجنة الرياضية
4- اللجنة الدينة
5- لجنة المتابعة
وسوف تعقد الجمعية اجتماع موسع يوم الجمعة القادم بالمضيفة بعد صلاة العصر والدعوة موجهه لكل ابناء شباس عمير للإشتراك في الجمعية وحضور الاجتماع

أستاذي الفاضل جمال عبادة
أنا قرأت هذا العنوان صباحا في المكتب وكنت أريد أن أرد عليه ولكني مش عارف اقول ايه قلت بالليل في البيت ممكن ارد بس والله أنا مش عارف لحد الآن أتكلم أنا مش قادر اصدق عيوني بأن هناك في شباس عمير جمعية تحمل هذه الأفكار العظيمة والأهداف النبيلة . الحمد لله رب العالمين أننا عشنا هذه الأيام ولكن اسمح لي يا أستاذنا الفاضل أن أحذر من عوامل الإحباط التي سوف تحاول جاهدة إجهاض هذه الخطوة الجبارة وأنا متأكد إنكم سوف تتجاوزون هذه العوامل جميعا إن شاء الله وعلينا جميعا من الآن أن نفكر كيف تنجح هذه الجمعية وكيفية تفعيلها وتفعيل نشاطها . الآن بدأ وقت العمل إن شاء الله وليكن هدفنا وجه الله الكريم ولنجدد النية في كل خطوة والله الموفق .
- هذه الخطوة والخطوات المماثلة أو المنافسة وهى منافسة محمودة سوف تجعل شباس عمير تتقدم سنتين عن جميع قري ومدن مصر لأن المصريين سوف يتحدثون عن العمل الخيري بعد إنتخابات الرئاسة وهنا سوف نكون قد سبقناهم بسنتين وعليكم الآن يا أستاذنا أن تبدأوا بالتفكير في كيفية احداث سبق آخر ولا نتوقف أبدا عن السبق والله معكم ولن يتركم أعمالكم .
- هذه الجمعية هل هى ملك كل أبناء شباس عمير ؟ هل هى تريد الخير لكل أبناء شباس عمير ؟ أنا أؤكد نعم إن شاء الله طالما فيها الأستاذ جمال يبقى كدة تمام
- الله ينور على الثوار