ابناء الشعب المصرى العظيم
انا المواطن المصرى اللى اتسحلت وجوعت واتعريت واتذليت واتقهرت واتعذبت واتحبست واعتقلت واتظلمت ونهبت ابسط حقوقا عيانا بيانا فى وضح النهار وعلى اعين الناس واصبحت بلا قيمه ولا شخصيه ولا هويه اعترف والاعتراف سيد الادله اننى كنت بامثل طول الفتره اللى فاتت دى وبادعى كل الحاجات اللى قولتها دى وكنت عايش احسن عيشه وبالبس احسن لبس وباكل احلى اكل واتوظف احسن وظائف وباخد احسن رواتب وان مصر اغنى دوله واقوى اقتصاد وكل االتهم اللى اتهمت بيها الناس الطيبين من النظام السابق وحكومته كلها تهم باطله وهم ذمتهم انضف م الصينى بعد غسيله
ومع يقينى بعدالة ونزاهة القضاء المصرى الذى اعلن صباح اليوم الثلاثاء 5/7/2011عن براءة عدد كبير من رجال الاعمال ووزراء كانوا اضلعه رئيسيه فى كيان النظام السابق من تهم الفساد واهدار المال العام لذلك لم اجدا بدا من الاعتراف بجريمتى وباعترف ان انا الحرامى الحقيقى انا اللى سرقت اموال الدوله وانا اللى زورت الانتخابات وانا اللى اخدت فلوس الغاز وصفقات الاسلحه وانا اللى تاجرت بدم الغلابه والفقراء وانا اللى بابلطج على الشرطه وعلى اى حد يقف فى طريقى وانا اللى بعت قضية فلسطين والعراق والسودان وانا اللى ممشى امن الدوله على مزاجى وان الثوره دى عملتها عشان ادارى على جرايمى وانتهاكى لحقوق الحكومه وسلملى على البدنجان
اعتراف المواطن المصرى
