القصيده منقوله وارجو قرائتها كامله لانها مرتبطه ببعضها
مرة قعدت وواحد صاحبى
قمنا فتحنا التليفزيون
شوفنا الست مذيعة الحلوة
ف اول حلقة من برنامج
"بعد الثورة معانا زبون"
كان الضيف واحد م النخبة
اسمه فلان ابن المجنون
بعد الوطنيات كالعادة
قاللك بكرة الجمعة يا سادة
عايزين ننزل كام مليون
بس ياريتنا ننزل بدرى
ده التحرير بالحجز الفورى
ومش مضمون
قامت الست مذيعة اندهشت
ليه يا سيادتك
بكرة هننزل كام مليون
قال علشان تكمل ثورتنا
عايزين دولة من غير دين
من غير طعم كمان ولا لون
والدستور الاول طبعا
قبل ما يحكمنا المأمون
عايزين حق شهيدنا الغالى
مهما يكون
عايزين نضمن حق الناس دى
ف الشامبو قبل المعجون
قامت الست اتعدلت فجأة
بكل خباثة ضحكت جدا
تقولش ابوها شحاتة ف عزو
وجايب جون
عندك حق سيادتك فعلا
اصل الثورة لما انفجرت
قام سرقوها ناس بدقون
لحظة سيادتك
ومعانا واحد ع التليفون
ايوة اتفضل مين ويانا
احنا يا ست الكل اللى سرقناها
من غيرنا احنا
عمر الثورة ما كانت قامت
انتم مين ؟
احنا الاخوة المتحدون
طيب شكرا
ومعانا واحد تانى ع الهاتف
مين ويانا
واحد شاعر بالمطحون
ايوة اتفضل
رأيك ايه؟
رأيى بكل صراحة يا فندم
ان الجوهر والمضمون
واضح جدا
لو حركنا الصورة شوية
بنفس الزاوية
ممكن نعرف ايه هيكون
وانا وبكل تواضع منى
كنت كتبت قصيدة تعبر
عن احساس 80 مليون
وبقول فيها
" آدى الثورة
وآدى الخواجة
وآدى الديباجة
وآدى اللى واقف على راسه كاب
وآدى الميدان
وآدى اللى كان
وآدى الشهيد
ومفيش عتاب"
فجأة الخط اتكهرب منه
وبخابثتها الست مذيعة سألت عنه
قطع الخط ياالف خسارة
خلصت اول حلقة بسرعة
وباذن المولى
راح نتقابل ليلة الجمعة
/////////////////////////////////
صاحبى سألنى
فاهم حاجة
قولتله طبعا
مش محتاجة
طاب وضحللى
قومت عدلت هدومى بسرعة
وقولت بسيطة
مش محتاجة اى كتاب
ادى الثورة
وادى الخواجة
وادى الديباجة
وادى اللى واقف على راسه كاب
ضحك وقاللى
شكلك نايم
او مش فاهم
يابنى دى ثورة وقامت
اصحى
انا مش باٍسأل عن اسباب
قولتله عارف
ان الثورة قامت بدرى
بس غلبها النوم ف السكة
نامت تانى
قامت ليه
قالوا علشانى
واسأل ليه بتنام يا جماعة
يقولو عشانى
وبكرة هنعمل ثورة جديدة
طيب ليه
بردو عشانى
بحلق صاحبى
قولت استنى
انا هاشرحلك
بس استحمل
اصلى باكسر ف الالمانى
زعق فية
ايه جابنا لالمانيا يا عم
شكل جاهل او بتخم
قولت اتلم
مش بردو الثورة دى عربية؟
واحسن عربيات المانى
ابسطهالك
ادى الميدان
وادى اللى كان
وادى الشهيد
وفلفل اخضر وحبهان
صاحبى رفسنى برجله وقام
قاللى يا عم كفاية حرام
قولت استنى
اصبر تفهم
لسة حكاية لستعصام
اشرح تانى
يا بنى دى حاجة بسيطة وسهلة
ركز فيها
ادى الثورة
بعد ما نمنا صحيتا صرخنا
صرخةو صحت
وبقالنا صوت
وقولنا تانى
مفيش سكوت
سقط النظام
والجى احلى
والحلم ممكن
وراسنا تعلى
لاقينامنهم اطرش واعمى
ولاقينا هايف ومالوهش لازمة
وادى الخواجة
بادين طويلة
قاعد معانا متقولش عيلة
لما نظام العيلة اتهد
كانت الثورة مفاجأة تقيلة
فكر يعمل ايه من تانى
ادى السلفى والنصرانى
والعلمانى
والليبرالى والاخوانى
قاللك خبط كله ف بعضه
والبرسيم يدخل من ناحية
يطلع همبورجر تيوانى
تنح صاحبى وشكله اتحول
قولت اكمل
قاللك ناس من عند النوبة
قبل ما توصل للتحرير
عند بتاع الكشرى ابو دقة
اللى ف امبابة
وف بلكونة الاخت عبير
وييا فلول الوطنى الحية
وناس م الجيزة والطالبية
وناس من طنطا وكفر الشيخ
بعد دراسة ومؤتمرات
قالوا حكاية الاخت كاميليا
قالوا ع الراجل ابو جلابية
وييا ابو يحيى
وييا جاسوس م اللى ما تتسمى
حرقوا كنيسة والف ضحية
بس صراحة محدش صدق
طاب دلوقتى اشمعنا حيحرق
ليه محرقشى ف يوم الثورة
رد علية
لسة متنح
يخرب عقلك
عقلك عتمة
زى حكومة الحاج عصام
صاحية ونايمة
بلدك تولع مش مهتمة
بردو هاكمل غصبن عنك
لازم تفهم
يمكن لما هتفهم افهم
ركز بس شوية معايا
مش محتاج منك تفكير
وادى الديباجة
وكلام كتير
شالوا المنافق جابوا الحقير
واحد يشعلل
واحد يروج كلام خطير
ودا اللى طالع عشان بيخدم
ودا اللى يحلف مهوش اجير
ودا اللى كان قبل اللى ثورة
كلاف حمير
وادى اللى كان شغالعشان
يشكر ويمدح
كلب الوزير
والناس غلابة
عنيها عميت
وودانها طرشت من الشخير
وصاحبى بلم
وفجأة شعلل
ف وشى تف
ومنيش مكمل
انا المغفل
لانى باسأل
وانا يعنى منك
فهمت حاجة
هديته حبة
وقولت اسيبه
دلوقتى يعقل
بلاش سذاجة
يا صاحبى ركز
لازم هتفهم
انا قصدى خير
والله اعلم
مش محتاج افهم واتجنن
افضل عايش جاهل احسن
يابنى استنى هانت جداً ً
اما اللى واقف على راسه كاب
رفع التحية
وقال كلامكم يا ناس مجاب
حازم وسايب
من غير حساب
حريص وقافل شباكه لكن
للكلب سايب ييجى الف باب
شايف وساكت
غلطات وواضحة
ولا عمره عاب
كلام كتير
تنفيذ مفيش
لا عمره ودة ولا عمره جاب
عملنا ثورة
وقلنا حرة
وادى الرموز
عجل وجاموز
جوة السجون
فزدق ولوز
وفراخ وموز
وادى المحاكمة
عدل ونزاهة
ومفيش مناورة
مش بردو ثورة
واللا ابتكار
كلام حقيقى ومش هزار
كان المغفل
حماره جنبه
ساب المغفل حبل الحمار
وبعد ساعة طلع النهار
دور منادى بقرش صاغ
يسأل جيرانه
قالوله حاسب
وبلاش تجيب وجع الدماغ
ايه يعنى ضاع منك حمار
ونعيده تانى
ملايين تثور
ويقول عشانى
عايزين نتايج
ونقول نثور
انتاج اجور
يقولو طور
وبغل هايج
لو كنت فاهم ارفع اديك
لو مش فاهمنى هاصبر عليك
والصفحة خلصت نكتب ف غيرها
انا بن بلدى
ناخد وندى
واللقمة مرة
مش لاقى خيرها
وادى الخواجة
وادى الديباجة
وادى اللى واقف على راسه كاب
وادى الميدان
وادى اللى كان
وادى الشهيد
ومفيش عتاب
ميدان مهان
وكل واحد يعمله ثورة
الاخ عايز معجون سنان
والاخت عايزة عطر ولبان
وناس غلابة مش لاقية تاكل
لا هية فاهمة دستور ونازل
وبلطجية وامن فاشل
والطفح كوتة مع الفلافل
ولا هية فارقة ديموقراطية
ولاعلمانية
وشهيد ضحية
ومصاب ضحية
والدنيا زحمة
ولا فيش قضية
ما ترحمونا يخرب بيوتكم
وطلعونا بقى من دماغكم
سيبونا نحلم ببكرة مرة
مش بردو ثورة
ومصر حرة
واللا الكلام ده كلام سماسرة
فاهم يا صاحبى
صاحبى لقيته ادانى ف وشى
قبل ما يمشى
واضح انه مبيفهمشى
اذا كنت انا مش فاهم حاجة
وادى الخواجة
وادى الديباجة
وحكاية هبلة واخر سذاجة
وسؤال يحير مالوش جواب
ثورة شباب
وناس تموت وتعيش كلاب
عريس يفرح ف الدخلة خاب
والرؤية وردى على الهباب
وف النهاية
اخر كلامى
مع احترامى
لدم شهدا
ويا الف حسرة على اللى راحوا
والحق ناخده يوم الحساب
وده اعتذارى لكل واحد
ضميره فاكر يوم الميدان
وان كنت غلطان
ادى اسفى
لأم الشهيد وام المصاب
