كتب عمر حاذق فى الدستور
عذرا ايها اللواء لقد افسدت كل شئ
هذه كانت اخر جمله كتبها ادمن صفحة اللواء محسن الفنجرى على الفيس بوك
على فكره هو طلع فنجرى فعلا بس فنجرى بق
اقتطفت من هذا المقال تلك القصه التى اعلم تماما مدى صحتها فالشرطه فى مصر غير مصدقه انها من الممكن ان تحترم الشعب وتتعامل معه بادميه ويشعرون الان ان هناك خصومه وثأرا شخصيا بينهم وبين الشعب فاما ان يعودو كما كانوا وكما تعودو واما لا يمكن ان تنجح هذه الثوره وستعم الفوضى البلاد وهذا هو هدفهم . هذه قصة احد مصابى الثوره
"بسم الله الرحمن الرحيم. أولا انا من مصابي الثوره اتصابت يوم 28 يناير في ميدان التحرير تحديدا عند سور مجلس الشعب اتصابت في عيني الشمال من رصاصه مطاطيه ادت الي تهتك في العصب البصري والرصاصه مازلت موجوده في عيني والتقارير معايا بتثبت كل ده وعملت اكثر من عمليه علشان يحاولوا يخرجوا الرصاصه وللاسف ماعرفوش اما بعد أثناء مروري في شارع العشرين فيصل وكنت راكب توك توك ومروح علي بيتي وقفتنا عربيه شرطه من الجديده ومسكني الظابط من الحزام وبينزلني بطريقه مهينه انا في الاول قولت ده اكيد بيشبه عليا وفاهم غلط فقولتلوه في ايه بالراحه انا لازق بلستر علي عيني طبعا فقالي اسكت ياض انتا ايه اللي معورك كده قولتلوه انا من مصابي الثوره قالي اهلا تعالي انتا متصاب فين قولتلوه في التحرير قالي التحرير اللي كونتوا بتنطوا علي بعض فيه قولتلوه عيب كده قالي انتا هاتعلمني الادب ياروح أمك فوريته التقارير اللي معايا قعد يشتم الثوره ويقولي وريني بقي الثوره هاتعملك ايه قولتلوه الثوره ديه علشاني انا وانت قالي طب اركب ركبوني بطريقه مهينه وفتشوني واخدني علي القسم (قسم بولاق الدكرور) وعملي مذكره سب وقذف وتعدي علي السلطات وقالي انتوا كلكوا شويه عيال سيس ده انتوا مش قادرين علي شويه بلطجيه سيس عاملين فيها ثورجيه قالي امضي قولتلوه لا انا مش هامضي قالي حقك ماتمضيش انتا حر قال لامين الشرطه وديه الحجز قولتلوه ده انا بروح اي مكان بيكرموني قالي ماحنا هانكرمك برضه بس بطريقتي انا فمشيت مع امين الشرطه قولتلوه انتا هادخلني الحجز قالي خش بقي انتا مش عامل ثورجي ادخل اتعامل بقي مع المساجين وريني الثوره قولتله الله يسهلك ياشيخ انا مش عارف اقولك ايه طبعا بيت في القسم ورحت النيابه والحمد لله اول ماروحت النيابه وكيل النيابه قالي معلش يامحمد انا مش عارف اقولك ايه بس اللي هاقدر اعملوه ان انا امشيك وانتا اعمل اللي انتا عايزه وبجد انا مصدوم واالله وهيه ديه الشرطه اللي بهدلتنا طول 30 سنه الثوره ديه قامت علشانا وعلشانهم هما عايزين ايه ومين بالظبط اللي بيحكمنا .ولو اخر يوم في عمري مش هاسيبه بس هيه ديه الشرطه اللي عايزنها ترجع ده احنا من غيرهم بقي احسن لو هما عايزين يرجعوا كده علي العموم اشتكيته في المديريه والوزاره وقولتلهم الكلام ده قالولي معلش وحسبي الله ونعم الوكيل".
