مصرنا بتصرخ الوحده يا ولادى
مصرنا بتصرخ ولاحياه لمن تنادى
يا خلق هووه كترت سكاكينها
والسهد ويا الهم ف عيون مساكينها
وبياعين الوهم كترت دكاكينها
واللى يتلسع م النار
بينفخ فى الزبادى
مصرنا بتصرخ الوحده يا ولادى
مصرنا بتصرخ ولاحياه لمن تنادى
احنا اصحاب البلد
واحنا اللى مالكينها
احنا اللى دمنا من النيل
ولحمنا من طينها
ازاى نسيبها تضيع
ويقولوا بايعينها
ازاى نسيب التعالب
وازاى نمكنها
وازاى نسيب الفتن
تكتر اماكنها
ازاى نكون ولادها
بسهوله سايبينها
مصرنا بتصرخ
الرحمه يا اولادى
مصرنا بتصرخ الوحده يا ولادى
مصرنا بتصرخ ولاحياه لمن تنادى
امكم بتضيع بيقطعوا ف شرايينها
ايه الغباء دا يا ناس
ساكتين وسامعينها
يارب تحفظها وتعينها
وتمسح دموع الالم
بين عينها وجفونها
دى امكم يا هووه
مش كوره فى النادى
مصرنا بتصرخ الوحده يا ولادى
مصرنا بتصرخ ولاحياه لمن تنادى
يارب يا مهلك
اهلك عدوينها
يارب يا ظاهر
اظهر عناوينها
يارب يا جامع
اجمع محبينها
ووفقها تختار رئيس
مننا ومنها
يا خلق هووه بلدنا
واحنا اللى عارفينها
واحنا اللى حاسينها
واحنا اللى بقلوبنا
واعمالنا نقدر نحسنها
لو تفرقنا المصالح
تقطع المصالح وسنينها
والله بنحب البلد
وحبنا مش عادى
مصرنا بتصرخ الوحده يا ولادى
مصرنا بتصرخ ولاحياه لمن تنادى
