ثورة مفاجأة


الموضوع لاهُو فجأة
ولا بالنسبالي مفاجأة
عشت المر سنين بطويها
ضعف الحيلة بيقلب جرأة
********************
لما تضيق الدنيا ف وشك
نِفْسَك تحيا أيوة ف نِفْسَك
بكل كرامة بكل أصول
ولا بتآمن يوم علي عشك
*********************
ده بيغشك ودا بيهشك
ودا بيلاعبك هشك بشك
يهبر عيشك ويقول حقي
ولو هتطالب عصا هتنشك
**********************
لما تقوم الثورة ... مفاجأة؟
دمي بيغلي سنين م الحرقة
لما بخاره يقب ويطلع
عمرها يا ابني ما تبقي مفاجأة

سامح لطف الله

http://c4wr.com/blog/?p=5711