النشرة الجويه

الرياح جامدة وقوية
واللي فيه هوه فيه
ربي عالم إنه ظالم
بالوعود يضحك عليه
***
أحلي فترة يبتسملك
وبكلامه يخف حملك
والعسل ف لسانه يقطر
بالسلام علطول يقابلك
***
أصل صوتك راح يهمه
والحنش نايم ف كمه
ولما بكرة راح تقابله
يقرصك ويحط سمه
***
الحرارة نازلة نازلة
قاطعة بينا لأ وعازلة
بعد كرسي البرلمان
مقابلة باردة آه ورزلة
***
السحاب ف الجو عالي
راح نغربل ياليالي
واللي في الغربال هيبقي
صوتي ياخده ولن أبالي
***
راح تمطر من سمايا
وحبي هبدر ف الحشايا
لابد زرعي راح يرعرع
واحرسه لو بالعصايا
***
شمس مصر لابد ترجع
جرح جنبي لسه بوجع
والأمل ف القلب صاحي
لاجل نورك تاني يطلع

سامح لطف الله



http://gate.ahram.org.eg/User/Topics/6021/%D8%A7%D9%84%D9%86%D8%B4%D8%B1%D8%A9-%D8%A7%D9%84%D8%AC%D9%88%D9%8A%D8%A9.aspx