التعلب فات ما قفشتش ديله
لص و كامن جوة ف خُصه
قال أموالكم دي هتخصه
من جنيهاتكم في التأمين
تِعْبَان لابِدْ يلهف بُرْصُه
قال معاشاتكم كده هتزيد
وهبر الهبرة وفط أكيد
ملح وداب جوة الكباية
خد طيارته وكت بعيد
من شيخ منصر خد تصريح
قتل الحلم ف قلب جريح
لو جبتوه تلاقوه إتنفض
زي بلاط ايش تاخدي يا ريح
عمو الغالي لملم حاله
حس الفيلم الله يا جماله
رتب ورقه قبل الهيصة
سارق الفقرا ويقول ماله
إنصب جلسة وقول يا محامي
واسمع رد القول الحامي
والعصفور ساب قفصه الفاضي
قاضي يقول والقلب أهُو دامي
فوق الشاشة شوف تسجيله
من كام شهر هتصحي لقوله
يديك حقنة أخدت منوم
تعلب فات ما قفشتش ديله
ليكي يا مصر سألنا العون
من حرامية وظلمة ودون
من آلافات ناهبين خيرات
وعايشة يا بلدي مهما يكون
سامح لطف الله
