مش هسيبه ابن اللذينه
الميدان كان فيه جنينه
فسحة حلوة كمان أمينة
الزهور حواليك جميلة
تبهج العين الحزينة
إمتي مصر تفوق وتصحي
بالزمن تمشي السفينة
إمتي خيرها يخش جيبي؟
إمتي هنعيش ف السكينة؟
الميدان هوه الميدان
نُور علينا طل بان
أحلي صحبة من زمان
كله عايز مصر لينا
ثورة قامت قمنا جينا
نغزل الأحلام سفينة
ترفرف الأشواق في قلبي
والشراع مفرود علينا
شافوا لمه بين إيدينا
الأبالسة إتلموا بينا
والجِمال ف هجوم علينا
والحصان وسط المدينة
والرماح ويا السيوف
مين ما شافشي تعالي شوف
الحجارة أمام رصاص
والبنادق ناشرة خوف
وناس بتضرب ناس تلاقي
والدما تروي الشراقي
والشهيد روحه في كفه
لاجل مصر يموت فدائي
والنيران غطت ميدان
فوق سطوح قناص جبان
علموه يظبط نشان
ألفه وإدولوا النيشان
صابني ف العين الشمال
جريت أخَبَط حالي حال
إلحقوني وإنقذوني
مال عليا أخويا شال
واللي راح يا عيني راح
طِبْ ما يداوي الجراح
تاري عند إبن اللذينه
اللي نشن بالسلاح
***
باقية ليا عين يمين
عايز أشوفه هوه مين؟
كل ما أسمع مليونية
تلقاني في الصف اليمين
فين يروح أو فين يجينا
دكتور سنان ضايعله عين
كاتمُه تاري حوه قلبي
وقلب أمي كمان حزين
جربوا فينا القنابل
يضربونا بالغازات
ساعت ندوخ ونموت ساعات
واللي يسقط إيد تشيله
تصرخ بلادي ضنايا مات
في الظلام أنا شفت دايرة
ويا عيني رايحة جاية
دي الماسورة بندقية
والزناد ع العين ونشن
رغشته ف الإيد تتنشن
واللاسلكي قال أوامر
يله إضرب يله أكشن
***
شفت ومضه م السلاح
وإنطفا النور اليمين
نور عنيا التانية راح
وتاري مين هيجيبه مين؟
تاري عند إبن اللذينه
ريس الجوقة الحزينة
اللي طفي نور بيوت
واللي سارق مني قوت
واللي داس قلبي وعدي
عمره مني ما راح يفوت
***
اللي خاطف نور عنينا
مش هسيبه إبن اللذينه
واللي يهدر دم مصري
يبقي ضدي ولو أخينا
سامح لطف الله
http://www.misrelgdida.com/shababna/80514.html
http://c4wr.com/blog/?p=7336
