يناير 1977/2011

أبويا بعتني أتعلم
وعرفت منه كتير
إمشي علي جنب يا إبني
وإبعد عن كل خطير
سامحني يا بويا خالفتك
وكتبت الشعر سطور
ورفعت اللوحة بيدي
مكتوبة حروف من نور
يتقول للظالم إوعي
خلي الطابق مستور
إياك من لمس رغيفي
وعليا تلف تدور
***
وعشان تدخل في الصورة
كتبنا بنبض دمانا"
هتمد البوز ف خزانة
تلهف م البق غدانا
والشعب الطيب ساكت
تلهف بالمرة عشانا"
وإتغاظ م الكلمة الريس
وكلابه علينا تدور
ويجيبنا ف نص ليالي
أمن الدولة المتشمر
نترمي في السجن ليالي
الدنيا علينا تتحسر
وملف إترص يا خالي
والأسم عليه بالأحمر
والهمسة ما تلمس ورقة
بيتك مفتوح للعسكر
نكتب في دماغنا كلامنا
علي غيرك إياك يظهر
سبحانه مغير حالنا
لشبابنا بننحني أكتر
***
رفعتوا لمصر تيجانها
عليتوا لبلدي رايات
فجرتوا الكلمة تعبر
ولساني نطق كلمات
وسنين محبوس ف القمقم
سجاني تركني ومات
معزم ع الباب ومتمتم
وعايزلي خبير شفرات
ع الفيس بتفكوا الشفرة
والثورة تقود ثورات
ويا"عمرو" هقولك كلمة
وإحفظ مني الكلمات
يا تعيش حر ف أوطانك
يا نقول إستشهد مات

سامح لطف الله

http://gate.ahram.org.eg/User/Topics/7480/-%D9%8A%D9%86%D8%A7%D9%8A%D8%B1-.aspx