الحلم
عالمنا التالت .. متلّت غضبان

قاعد ومشلتت

عايز فرمان:

هل يقدر يصرخ ويدُور ويغيّر

ولا يخبّي حلمه فْ كهف النسيان

ولا يدخن شيشتُه وأرجيلتُه وحيرتُه ..

.. ويفضل يحلم بالريح تباريح

ويغنّي وهمُه وشيخوختُه حقيقه بصحيح

أصلاً هوّه مفيش حيلتُه

غير كوم أحزان

يا ناس

في وطنّا وطنكم

إنتم غصبٍ عنكم

لا بد نساعد بعضينا

ونمد ايدينا وقلوع مراكبنا فرحه ترسّينا

على شط الحلم

نلقى دنيتنا

عالمنا ..

عالمكم

غصبٍ عنكم

عالم تاني

مولود .. فرحان