ليه بعد ثوره متحضرة
عضمها ينخر فيه السوس
والناس كدا متغيره
، واتحكمت فيها الفلوس
الناس ع المبدأ بتدوس
وتعظم في الجنيه وتبوس
وكتر الهبر، وكتر الهبش
والشيطان سكن النفوس
وانتهازيه جابتنا ورا
وفوضى اتعملت لنا مخصوص !
........................
بياع بيسرق مشترى ،
وعَفى على الناس يفترى
.. ركاب بتضرب كمساري
، واللي يهزأ عسكري
، واللي بيسرق بالإكراه
.. على السريع والدائري
.......................
واللي بيبنى في غير ملكه ،
.. واحتل أملاك أميريه
واللي بني من غير تصريح
، وبالدراع .. وصل ميه
، وكهربا من غير عداد ،
ولا حد قاله .. منين ديه ؟!
.......................
وعشان فيه حمى قلاعية
وبعضنا خاف م اللحمة
السماكيين عقدوا النية ،
ورفعوا الأسعار ف الزحمة
، بتوع الفراخ بعد شوية
.. وبنيه أسود م الفحمة
باعوا بأسعار مؤذيه !
.......................
وأصحاب محطات البنزين
بتبيعه في السوق السودا
.. أصبح بيتباع في الدكاكين
وخلاص بقت عاده وموضه
وكذا الأنابيب والكيروسين
وبعوده يا ثوره بعوده !!
.............................
وإضرابات ، ومرض لعين
اسمه : وقفات احتجاجيه
بيخَسروا بلدهم ملايين
عشان زيادة في ماهيه
.. مطلوب هيبة دوله قويه
، وردع للفوضى دا هيه
وطظ ف اللي عمل مقموص
كله بقانون .. وأحقيه
يا عزيزي كلنا لصوص ،
.. نصحصحوا ضميرنا شويه ؟!