لو دمنا هيهون عليك
اتسمرت منا العيون
وفتحنا ليك كل الودان
لو دمنا هيهون عليك
هنرص صورتك ف الميدان
جنب المبارك والرشيد
جنب اللي باع جنب اللي خان
وف وشكوا مليون شهيد
أرواح ترفرف ع الميدان
تبرد نيران لو قلتلي
دم الشهيد عمره ما هان
نطق اللسان طلع الكلام
بالورقة مرصوص البيان
راحت ياريس كلمتك
خطفت ديابة محبتك
وقفلت صدرك بالقميص
وقفلت قصرك بالبيبان
فاكر ياريس وقفتك
في وسطنا ف قلب الميدان
من غير حرس ولا ديدبان
قلوبنا منا بتحرسك
وعشمنا فيك زلزل كيان
في النني شايلينك حرس
في القلب ساكن من زمان
لو دمنا هيهون عليك
وتحط حاجز ع البيبان
مش راح أصوت تاني ليك
ولا عمر مصري يبات مهان
سامح لطف الله
