أكيد هتموت
أنا مصرى
أنا فاهم ومُش بهلول
مانيش أهبل ولا مخبول
مانيش أحزاب
ولا أخوان
ولا سلفى
ولا أنا فلول
أنا مصرى
أنا واعى ومش مسطول
أنا عايش فى طين بلدى
مانيش عايش على المحلول
ويامه الدُنيا
وفوق راسى كانت بتبول
ولما الدنيا تتأزم
بلاقى حُلُول
وبستحمل وأنا صابر
ولو حظى بباب مقفول
أنا مصرى
ومهما الدنيا تتعوج
أنا معدول
أنا مصرى
مانيش مذلول
أنا متغاظ ولازم أقول
يردوا كلام يِلَوَعنى
ورد بجد يفزعنى
يموت الفين
وايه يعنى
عيار فالت
ما أهو شيطانهم
طرف تالت
وأنا بصرخ
ولاحدش بيسمعنى
ولاحدش يقول مَعْنى
هتتقطَّع هتتقطَّع
ولو نايم
ولو قاعد بتتمَطَّع
ولو عامل بتستنطع
ولو عايز فيها تبرطع
هتركب قَطر هتموت
هتركب برضه سياره
هتركب برضه عبَّاره
ولو تركب فى طياره
ولو تركب على حصانك
ولو كاروا وبحماره
اكيد هتموت
وهيردُّوا بكلام ملتوت
ماهو الريِّس
ماهوش ملطوط
تقول حقى
هتتاخد وتتحاسب
وبالشلوط
خلاص اكتم ياسى الهلفوت
بدون اسباب تموت هتموت
ولا مسئول
وراح تفضل
كدا دايما قاعد معلول
يروح حُسنى
يجى مرسى
وهتكلم
مانيش مشلول
هقول ثوره
واقول تانى
واقول تالت
واقول رابع كمان ثوره
وهفضل أقول
ماهوش عارف
يلملمها
ولاعارف يكممها
لكن عارف يذل الناس ويحرمها
يموتهم ويقتلهم
بأى وسيله يحسمها
وأهى ضاعت
خرايطنا
وضاع غيطى وضاع بيتنا
واهو ضاعت معالمها
يموت بالقطر كام واحد
وكام ييجى قطر
مش واحد
بنتباعد ونتفرق
ولامره بنتواحد
ماهوش عارف
يسبها لغيره يحكمها
ويرجع وضعها معدول
_________________
عطيه خضرى عطيه
