حرام عليكم أُمكم
متجمَّعين
راح تُخنوقوها
وتدبحوها كُلُكم
بتكسّروا
وتحطَّموا ولا همكم
ميغُور رئيس
وتغُور حُكومه
ايه لازمته
بتحطَّموها
وتكسَّروها
ولاعدش حب فى قلبكم
يا اخى داهيه
تحرق دمكم
مش هى دى
مصر اللى كانت
يوم بتسهر
علشان توفر امنكم
مش هى دى
مصر اللى كانت
يوم بتحزن
لو مره حد يُغُمكم
مش هى دى
مصر اللى كانت
يوم تعلِّم
وما كانش حد يُخُمكم
خلاص كده
ضاع الحياء
من وِشكم
ولاعادش شىء بيهمكم
حتى امكم
طاب فين
وصية ربكم
يا خلق هووه
كُل اللى يُحكم منكم
ماهوش مُخَلَّد
واللى هتفضل أرضكم
واللى هيفضل أمكم
والباقى هوه ربُكم
حرام عليكم مصركم
خيرها لكم
بوسو ترابها
استغفروا
قولوا يارب
وربنا يغفر لكم
واللى ما يخاف
ع البلد
يبقى عدو ليها ولكم
دول كلمتين
وقلتهم ليَّا ولكم
ما انتوا خواتى
وكمان صحابى
والله جد بحبكم
