الجوع كافر
بقول الفقر مش عيبة
ولا خيبة ولا ويبة
دا يحني الضهر من طوله
ويكسر هيبة الشيبة
سنين وأيديا في أرضي
أصون أرضي كما عرضي
ومن عرقي بتتشرب
ومن خيرها دوا مرضي
إذا وصلت لشيء سافر
وصار الجوع دا جوع كافر
ولقمة بتيجي م الصندوق
بقايا أكلكو الفاخر
وريحة طبخكم هلة
وقايد ناري ع الحلة
وكام زلطة وكام طوبة
أغمس م الهوا ذِلَّة
مسيري ف يوم وهطلعلك
علي كفي شايل قبرك
ومن جوفي النفس صارخ
يهز الكرسي في قصرك
مفيش حد يلوم جايع
لقهر سنين خلاص بايع
تودع نومك الهادي
وهتنادي مفيش سامع
سامح لطف الله
