السكوت هوَّه الجريمة
عام وكامل عدي بيَّا
لقمة بالجبنة القديمة
النهاردة عيش وحاف
إختفت بنت اللئيمة
بيقولولي قال يا ريس
بكرة أحلي حياة كريمة
مش مصدق م اللي شايفه
فكرة بايخة مش سليمة
جزمتي وطالع لسانها
هدمتي بالية وقديمة
بكرة لحمة و الفراخ
نكته هايفة كمان عقيمة
***
فين بحوركم والطحينة؟
والعسل والفخفخينا؟
والكلام مدهون بزبدة
ونهضة جاية لو تجينا
شفنا منها سد نهضة
دخان قدوركو كمان عمينا
يوم ماجيتوا جتنا وكسة
نور وميَّه قطعتوا بينا
الحساب وقت الحساب
إرحلوا وسيبوا السفينة
عام وكامل عدي بينا
بسمتي صارت حزينة
***
بيقولولي جاي معانا؟
الخروج هيكون جريمة
قلت ليهم جاي بعيلتي
أشتكي الدنيا الأليمة
السكوت ف اليوم دا لأه
السكوت هوَّه الجريمة
سامح لطف لله
