سلمية!!!
سلميه إيه ورموش عنيكي دبَّاحين؟
صواريخ وطالعة للسما من فوق خدود
والحلم جوة العين مخازن للبارود
حارسه الخدود صاينة الحدود
بتلاغي عيني الغمازات
خندق وصايد دبابات
وعنين بتشبك ألف قلب ف خيط طويل
والشعر جامح ف الفضا زي الحصان
والقد يتمخطر يميل يأسر آلاف
بيقولوا سلمي لمَّا بتهز الكتاف
جرينوف ومتعبي الرصاص
إرفع إيديك سلِّم وخاف
ما تعدوا يله القوة ورباط الخيول
عايزينِّي تاني إيه اقول
سلِّم خلاص وارفع إيدين
فُضوا إعتصامكو وروَّحوا
م الصنف دا عندي الآلاف
سامح لطف الله
