عندما كنا جميعا نؤيد الحزب الوطنى المتمثل فى مرشحنا والمرشحون جميعا يلهثون لينتموا له طمعا فى المساندة الأمنية والنجاح والخدمات دون النظر عن انتماءاتنا ومدى كراهيتنا للحزب الوطنى واعضائه قد اقول ان هذا منطق مع انه غير شريف
اما ان نتحول الآن للدفاع عنه وكاننا جزء منه ويقوم مثقفينا بخداع بسطائنا ان مصلحتنا هى الأهم والأمة فى وادى وشباس فى وادى هذا ليس منطقيا وغير شريف
وانا اقولها عن نفسى ما ايدت يوما الحزب الوطنى فى شخص عضو مجلس شعب ولا حتى مجلس محلى وهذا موقفى منذ عرفت السياسة واظن ان من ابناء شباس عمير الكثير مثلى يكرهون الحزب الوطنى ولكنهم قد يحبون مرشحهم وهذا ما حدث فى عام 2005 وقف جميعم مع محى مع انه ليس مرشح الحزب

نحن قوم اعزنا الله بالاسلام
فان ابتغينا العزه بغيره ازلنا الله

لم افهم مقصدك يا محمد ارجو التوضيح اكثر

يا أبا الزهراء
لو قلت انك بتكره الحزب الوطنى هيقولوا عليك خاين ومتآمر مع المكسيك علشان تقلب نظام الحكم فى مصر
ولكن عشان تبقى وطنى لازم تاخدلك 50 جنيه وتروح تحط صوتك وتمسكلك مطواة وتقف قدام اللجنة تبلش أى حد مش هينتخب الحزب الوطنى ومحدش يقول محصلش . علشان احنا مش عمى . بكده
بكده بس هتبقى وطنى .
لكن لو طلعت على الجسر وقلت يا جماعة انا مش عايز الحزب الوطنى علشان أنا شايف انه حزب بيفسد فى البلد بقاله 30 سنة . 30 سنة بيفسد . هتطلع متآمر وعايز تخرب البلد وهيطلعلك سيد وهناء بتوع قناة المحور ومعاهم واحد يقول أنا أعرف أبو الزهراء وأنا كنت معاه وكنا متفقين نفجروا الهيلتون أو سميراميس

لفت انتباهى مقولة سيدنا عمر فى البروفايل بتاعك وحسيت انها فعلا واقع احنا عايشين فيه احنا لما ابتغينا العزه فى غير الاسلام ازلنا الله ولن تكون لنا العزه الا فى الاسلام ايا كان الجزب اللى هيحكم او اللى حاكم بمؤيديه بمعارضيه طالما بعيد عن الاسلام فسيظل فاشل ولنا الله

أنا عندى اقتراح تانى يا حمو
المفروض دلوقت ازالة طاغوت أكبر من طواغيت الدنيا كلها . اللى مش راضى يزول . وأعتقد أن لله حكمة فى كده . عشان يتذل شوية فى آخر حياته .
ربنا بيقوله ( لتكون امن خلفك آية)

سيبك من الجزيره الوحشه دى هناك برنامج يذيع الحقائق حصريا على قناة المحور بتاع سيد وسيده (هناء وسيد) حتموت على نفسك من الضحك حتلاقى واحده طلعه تقول إنها تدربت مع الإخوان فى أمريكا على يد الإسرائليين بس الوطنيه نقحت عليها وعلشان ولاد الكلب اليهود ميعرفوهاش خبت وشها وواحد تانى هرب من ميدان التحرير علشان الإخوان منعيين حد يطلع من الميدان وإنهم بيكلوا من كنتاكى والخدمه جوه الميدان خمس نجوم وإن فى الميدان 20000 قطعة سلاح بس مبيعرفوش يضربوا بيه علشان كده كل الشهداء من داخل الميدان ............وفى النهايه نحمد الله أن أعطانا نعمة العقل لنميز به بين الحقائق الحصريه التى يتحفنا بها الإعلام المصرى الصدوق وبين الأكاذيب التى تذيعها الجزيره على الهواء مباشرة. ولتذهب دماء هؤلاء الشهداء الذين إستشهدوا من أجل مصر إلى الجحيم بس المهم( مصلحة البلد)

هو فعلا اتزل يا مصراوى لانه مكنش بيحلم ابدا او حتى يخطر على باله انه يجبر ان يقدم التنازلات دى وهيكون لمن خلفه ايه باذن الله



قشدة

خير رد على الجميع هو اتفاق معظمنا على هدف واحد وهو كرهنا للنظام والحزب والقنوات المصرية المنافقة

أيوا والله يا دكتور أيمن الحزب الوطنى أقصد مصلحة البلد أهم من أى دم ومن أى كرامة فى الدنيا . ومفيش حد شاف عربيات الشرطة والمطافى والدبلوماسية اللى كانوا بيدهسوا الخارجين على مصلحة البلد . أما سيد وهناء دول يعنى مش بيناموا علشان مصلحة البلد احنا اللى خونة

يا جماعة فيه خبر جميل خالص أجمل من كل ده
رشيد محمد رشيد
اللى ممنوع من السفر وتجمدت أرصدته اتصل امبارح لقناة المصرية من دبى وقال انه سافر بمساعدة المسئولين وانه عرض عليه الوزارة تانى ولكنه رفض

ونحن اتفقنا على هدف واحد وهو الاستقرار وعدم التجديد ومحاربة كل القنوات القذرة التى تلعب بالشعب المصرى وان نقضى عليها ونفضحها ان شا ء الله .

اذا كانت الخيانة هى ان تكون ضد مبارك والحزب الوطنى فانا خائن لأبعد درجة واذا كان الغباء هو ان لا استمع للقنوات المصرية ولا سيد وهناء السمرى بتاع مبارك فانا اكثر الناس غباءا فلا يا معتز كريمة ولا سيد هناء ولا هناء مبارك
نعم لمنى الشاذلى وقناة الجزيرة والعالم وباقى القنوات اللا مصرية وشكرا
مصراوى
د ايمن
محمد الجرن
مما اجد من تعليقاتكم توافقا مع نفسى وما بداخلى

جزاكم الله خيرا يا أخ سيد أنك فتحت هذا الموضوع
ما هو الحزب الوطني ؟ كيف نشأ ؟ ومن هم اعضاؤه ؟ وكيف انتهي وعندما انتهي من كانوا أعضاؤه ؟
أنا أؤكد لسيادتك انه بمجرد سقوط حسني مبارك سوف يسقط الحزب الوطني .
طيب عندما يسقط الحزب الوطني ماذا تتوقعون أن يقول أعضاؤه عنه ؟ هل ممكن يا أبا الزهراء ان تتوقع ماذا سيقول أعضاؤه عندما يسقط عنه ؟
أنني اترك الإجابه عن هذا السؤال لإبداعاتكم .

فيه مشكلة دلوقت يا أستاذ محمود
لو ان الحزب الوطنى ظل ماسك البلد الكام شهر الباقيين ممكن يغير اسمه ويندس مرة تانية ويثبت أقدامه فى البلد

استاذى الكريم هيقولوا نفس الكلام اللى اتقال على حكومة نظيف وانها حكومه فاشله ولم ترتقى لمطالب مجلس الشعب الشريف النزيه ولا مبارك مكنش هنا ولا كان واخد باله كان مسافر ويمكن كان فى الحمام
يا جماعه احنا كلنا ضد مبارك وضد الفساد والحمد لله بدات جزوره تتاكل وختاما بمبارك ان شاء الله ولكن اللى بيحصل فى التحرير من غموض حركات قفزت على الثورة وارادت سرقتها لاغراض شخصيه واضحة جدا وليس حبا ف ىالوطن كما يزعمون لكن الناس اللى مش لاقيه تاكل تعمل ايه الناس اللى مش لاقيه رغيف العيش تعمل ايه
طيب يا استاذ محمود ما هى ملامح الفتره القادمه من وجهة نظرك ؟؟؟؟

لا ادرى ماذا سيقول اعضاء الحزب الوطنى عنه بعد سقوطه لأنهم لهم وجوه عديدة والواحد منهم له الف وش وبيعرفوا يكذبوا كويس جدا

الأخ محمد سألتني عن وجهه نظري ورغم اني مش بأحب اني أعمل نفسي بأتنبأ بشئ لان محدش يقدر يقول بالظبط ايه اللي ممكن يحصل لان الموضوع نفسه كان مفاجئ حتي للناس اللي عملته لم تكن تتوقع نجاحه لكن على كل حال أقولك على بعض توقعاتي :
1- انتهاء عهد حسني مبارك طوعا او كرها
2- يحاول عمر سليمان ان يحكم سيطرته على البلاد تمهيدا لاتباع سياسة البطش والقهر فيما وفي البداية سوف يظهر بوجه حسن أمام جميع القوي وسوف يعمل اي شئ في سبيل احكام سيطرته على الحكم بما في ذلك التنازلات ( ربما يستقيل أيضا خلال هذه الفترة )
3- يفشل عمر سليمان لانه لا يستطيع الموائمة بين الداخل الرافض لعلاقة مع امريكا واسرائيل والخارج الداعم لذلك .
4- خلال هذه الفترة يكون الدستور الجديد ومجلس الشعب الجديد أخذوا طريقهم والأمور استقرت .
إنما المؤكد الآن أن كل أعضاء الحزب الوطني انتهوا تماما وكذلك قيادات الشرطة القديمة وامن الدولة والخارجية .
ده أحد السيناريوهات المقترحة وعلى كل حال الشعب حياخد حقه حياخد حقه حياخد حقه .

يا خبر ابيض
لسة مخلصناش الكلام
الأمانة العامة وحسني مبارك استقالوا من الحزب

الله ينور يا كبير ههه انا كده هسميك المتنبى ههه طبعا من باب المزاح فالله سبحانه وتعالى اعلى واعلم بس توقعك فى محله لان مبارك تقريبا اتقصقص كل ريشه واستاقلت الامانه العامه للحزب

ههههههههههههههههه انا هخاف منك بعد كده

الله اكبر الله اكبر الله اكبر
اسقطوا جميعا وتهاووا الى الجحيم ايها العملاء

لم يستقيل حسني مبارك من رئاسة الحزب ,,,,,
اللي اتشال هوه صفوت الشريف ,, الذئب العجوز ,,

و لكنه لازال رئيس مجلس الشوربه....
و اتشال جيمي ننوس عين مامته ,,,
و لكن لم يترك حسني رئاسة الحزن الواطي اللاديمقراطي,,,

فيما يخصص حجج النظام لضرورة بقاء الرئيس لاجراء تعديلات دستوريه فهذه مغالطه تاريخيه لان الدستور يحتاج اعادة صياغه و ليس تعديل ...

تحيا الثوره و تحيا مصر
و يسقط النظام و يسقط حسني مبارك

يسقط حسنى مبارك
يسقط الحزب الوطنى
يسقط اعضاء مجلس الشعب والشورى
يسقط اعضاء المجالس المحلية
يسقط امن الدولة
يسقط المحافظون
يسقط النظام