من دافع ليس بشخصى او ذاتى اتمنى ان يكون ممثلنا عن دائرة قلين
المحامى والمحكم محمود حشلة ليكون صوتنا القوى فى المجلس لما له من تاريخ فى نصرة الضعفاء واسترداد الحقوق ورفع المظالم ولم نشهد عليه طوال فترة عمله اى تجاوزات اخلاقية او غير انسانية مما نجده فى المحامين عامة فهو يختلف وترك مهنة المحاماة كراهيه فى الظلم واعتقد انه ان الآوان ان يرجع اما ليكمل رسالته فى الدفاع عن الناس واسترداد حقوقنا
وشكرا
وده مجرد اقتراح من وجهة نظرى

اه يا أبو الزهراء عشان جارك بقي
ههههه
أعتقد أن استاذي الفاضل محمود مش هيوافق ولا إيه يا متر ؟

مش مسالة جيرة
ده استاذى واخى الكبير وارى انه يصلح لأنها مسئوليه والمسئولية ليست الا للرجال

سيبك من الحركات دي يا أبو الزهراء
شكلك طمعان ف عضو مجلس محلي
ههههههههههه
بهزر يا أبو الزهراء ومش ناوي تيجي هنا بقي ولا إي

قبل كل شئ مع احترامى الشديد للاستاذ محمود ولا اعتراض على شخصه
ولكن يا استاذ سيد ماحدود علاقاته خارج شباس عمير انا مش عارف بجد هو معرف خارج البلد ولأ بس لازم نكلم بواقعيه شويه لازم الشخص اللى هيمثلنا بس يمثلنا بجد ياجماعه بالله عليكو عشان احنا تعبنا من البيمثل علينا
لازم يكون له شعبيه خارج البلد
أو حل تانى ياسيد بس ياريت ياجماعه تكون الحلول دى سريعه
نتفق مع اكابر العائلات فى قلين البلد انهم يكون منهم واحد عمال واحنا مننا واحد فئات يعنى العضوين يكونو من شباس وقلين عشان ميكنش فى مشاكل تانى لو حد عرف يجمع الموضوع ده ويوحد البلدين هنستريح كلنا

بدون مجاملة ولا تزويق كلام

اخى الكبير ( الأستاذ محمود).....

الراجل المناسب فى المكان المناسب

abo_akram2410 كتب:

بدون مجاملة ولا تزويق كلام

اخى الكبير ( الأستاذ محمود).....

الراجل المناسب فى المكان المناسب

والله احمد بيه اخويه بيقول كلام زى الفل
استاذى وحبيبى سعادة المستشار محمود بيه حشله
ومثال للفكر الراقى والشخصيه المحترمه المحبه للخير والعمل الاجتماعى

قشدة

اخى عبد الرحمن وحشنى والله وبعدين انا ليس لى اى مطمع سياسى انت عارف انى بحب العمل المادى بس
اما اشرف الصعيدى كلامك موضوعى ولكن ليس مساله معروف او غير معروف وانما ايمانا بالشخص لما يمتلكه من قدرات نستطيع ان نقنع بها نحن غيرنا ونتفق عليه ويكون من بيننا حتى تشعر انت كانك تجلس فى المجلس وتقول كلامك انت على لسانه ومن ناحية المعارف طبعا ده راجل محامى وله علاقاته بجميع محاميين قلين وله احترامه بينهم
ثانيا الأستاذ محمود يمتلك موهبة وقدرة فعالة فى النقاش المثمر وتحليل الأمور باسلوب موضوعى
ثالثا شهادة الماجستير فى القانون
رابعا يجيد ثلاث لغات اى يستطيع ان يكون صورة مشرفة لنا فى المؤتمرات الدولية
خامسا مطلع واسع الأفق
وشكرا لكم جميعا على تعليقاتكم الرائعة

محمود بيه ونعم الشباب
مثال للفكر الراقى والشخصيه المحترمه المحبه للخير والعمل الاجتماعى

على بركة الله يا متر

موافقة

سر على بركة الله يا سعادة المستشار

انتخبوا خير من يمثلكم
انتخبوا استاذ القانون الدستوري

الله عليك يابو امال
منور الصفحة

فينك يا متر انت ما بتدخلش المنتدى ولا ايه

بدون أي مجاملات أو نفاق أنا أسمع عن الاستاذ محمود أنه من الناس المحترمين جدا واللى يحب المصلحة العامه لكن لسه محصليش الشرف إنى أقابله شخصيا أو أتكلم معاه ونكون متحابين فى الله إن شاء الله.
أبو الزهراء قال ( اما اشرف الصعيدى كلامك موضوعى ولكن ليس مساله معروف او غير معروف وانما ايمانا بالشخص لما يمتلكه من قدرات نستطيع ان نقنع بها نحن غيرنا ........... إلى أخر الكلام) .
اللى هقوله ده وجه نظرى و الله مش إعتراض على الاستاذ محمود ولا حبا فى أي فرد من البلد آخر . زى ما إحنا قاعدين نفكر ونخطط عشان عضونا القادم وإن شاء الله يكون من بلدنا برده . أكيد فيه شباب مثقفين فى كل أنحاء الدائرة بنفس طريقتنا قاعدين يفكروا ويخططوا وممكن يكونوا مختلفين معانا تماما وشايفين واحد عندهم يصلح إحنا دايرتنا كبيرة مش صغيرة ودى وجهة نظر.
أما الاخ أشرف مع العلم بأننا مختلفين فى التفكير و الآراء تماما إلا أنا شايف إن كلامه صح فى إنه لازم حاجة من الاتنين تحصل .
إما نعتمد على كبراء العاءلات اللى لازم يجتمعوا مع بعض ويذهبوا قلين او بلد كبيرة أوكلهم ويحصل تفاوض على العضوية وممكن يمشوها دورات يعنى كل دورة فى بلد .
إما يكون دا دور الشباب هما اللى يقوموا بنفس الدور وهما اللى يقوموا بعمليه التفاوض على العضويه سواء للفئات أو العمال وأنا متأكد إن كبراء العائلات يقدروا لما يمتلكونه من خبرات فى هذا المجل ومتأكد برده إن الشباب بالحماسة والفكر الجديد يقدر .
ودا و الله العظيم ماهو إعتراض على الاستاذ محمود بالعكس لو هو اللى هيمثل البلد والكل أجمع إنه هو اللى هيمثلنا أنا معاكم.
و الله الموفق الى مافيه الخير

ملف حساس جدا ولم أكن اتوقع ابدا ان الأخ سيد حجاج ( أبو الزهراء ) يكن لي هذه المشاعر الطيبة الفياضة التي أشكره عليها طبعا والحقيقة إن كل كلامه عني تظهر فيه العاطفة أكثر من العقل للأسباب الآتية :
1- أن فترة عملي في المحاماه كانت مليئة بالأخطاء والزلات وهو وضع احسن المحامين حالا في مجتمع ريفي لا يعرف الكثير من المسائل القانونية ولحظي العاثر اني عملت في الفترة من خمسة وتسعين لألفين وخمسة وهى فترة الظلم والقهر في البلد واللي كلنا طبعا شاركنا بنسب متفاوتة وبمبررات مختلفة فيها ( في الفترة وليس في الظلم ) ولكن الحمد لله رب العالمين أن هذه الفترة مرت على خير لكن والله يا أخ سيد المحاماه مهنة سامية جدا وممتازة جدا وممتعة وحلال لو مشيت صح .
2- بالنسبة لترشيحي في مجلس الشعب فهذا أمر رغم وجاهته فهو ملئ بالمخاطر في الدنيا والآخرة والرسول صلي الله عليه وسلم يقول يا أبا ذر انك ضعيف وانها لأمانة وإنها يوم القيامة لخزي وندامة بالإضافة الي أن عائلتي صغيرة جدا وإمكانياتي المادية ليست بالمستوي الذي يصلح لتمويل حملة دعائية أنا جئت الى دبي بعد ما افلست ههههههه. وطبعا حضرتك والشباب تعرفوا ظروفي الصحية كويس .
3- أنا الحمد لله على كدة وإن شاء الله اعود للبلد قريبا وأهتم مع شباب البلد كواحد منهم بالعمل الخيري وأنا دائما اجدد الدعوة لهذا العمل وترك المطامع والصراعات والطموحات الدنيوية عموما .ولكن أيضا مع الحذر وأداء الواجب ومنه الواجب السياسي .
4- ليس معني ذلك عدم الإهتمام بالعمل السياسي حتي تذهب الأمانة الي غير أهلها ( على جثتنا المرة دي ) لان ملناش حجة . آدي الصندوق وآدي الأصوات وآدي حسني مبارك راح في ستين داهية إذن لازم نختار اختيار حر وعلى أسس شرعية حتي أن الله إن سألنا عن اختياراتنا نستطيع أن نجيب يوم تشهد عليهم ألسنتهم وايديهم .
5- إن شاء الله بمجرد حزب العدالة والحرية ما يتم قبولة ويباشر عمله سوف انضم له ان شاء الله رب العالمين إن إنطبقت علي الشروط . وسوف التزم به التزاما حزبيا راسخا بمعني الوقوف الي جانب الحزب في الإنتخابات مع احترام بقية الأحزاب طبعا والتشكيلات وأهالي شباس عمير ان فرقتهم السياسة فإنهم يجب ان يجتمعوا في أعمال الخير وهو باب ليس لدخول مجلس الشعب او المجالس الشعبية المحلية ولكن دخول الجنة مع الصديقين والنبيين والشهداء والصالحين وحسن اولئك رفيقا .
6- أحيي الأستاذ سيد على شجاعته التي فاقت كل شجاعة على اتخاذ خطوة جرئية علي هذا النحو ورغم أنه اخطأ في اختيار الشخص إلا أنه أظهر شجاعة تجعل منه قيادة حقيقية في القرية التي تنقصها كثيرا هذه الجرأة فنحن اعتدنا منذ مائة عام على المفاضلة بين عائلتين فقط أو بين أشخاص تحركهما عائلتان فقط حتي في أوقات الحرية التي لا نخاف فيها الا الله تتردد نفس العبارات ونفس انماط الحديث وتلوح الأغلبية بالنبابيت وتغيب الأفكار وعندما تغيب الأفكار في قرية لا تستغرب أن الحنفية تأتيك بمياه المجاري .
7- طبعا اساتذتي واخواني الأستاذ احمد عقل والأستاذ محمد عز العرب والعمدة الأستاذ شريف وأستاذي الكبير الأستاذ حمدون والأستاذ أشرف الصعيدي والأستاذ عبد الرحمن وأخيرا الأستاذ الفاضل كمال الدين الذين كان لي الشرف أن أحظي بتأييد بعضهم وأبدي بعضهم تحفظات على شخصي في ترشيح محتمل فإنني أتوجه لهم بخالص الشكر والإمتنان على شجاعتهم في إبداء الرأي وهذا هو المكسب الحقيقي أن في شباس عمير رجال لا يخيفهم تهديد ولا ترهيب ولا تقنعهم وعود ولا ترغيب ولا يحركهم سوي قناعة شخصية ومراقبة وجه الله الكريم واشكر اخواني الذين مروا علي الموضوع ولم يعلقوا عليه سواء من اقنعه ومن لم يقنعه من الأعضاء طبعا لان الزوار لا تظهر لهم هذه الموضوعات .
8- أدعو إخواني في المنتدي الذين لهم اهتمامات بالشأن السياسي في شباس عمير أن يرشحوا من يرون من الأشخاص حتي تنتظم في شباس عمير هيئة من عشرة أو عشرين شخص ( وطبعا انا لست واحد منهم ) يصلحوا للترشيح ليكونوا نواه لترشيحات مجلس الشعب ولشباب الأحزاب وترشيحات المجالس الشعبية وحكومات الإدارة المحلية ومنظمات المجتمع المدني سواء جمعيات أهلية او خيرية . انا سمعت مرة المهندس السعيد عكاشة قال اسم المهندس مصطفي العسلي وده واحد من أفضل الشخصيات التي انجبتها شباس عمير ولكن مع ذلك لم اسمع اي تعليق عليه بل ولم يظهر هذا الموضوع على الشريط المتحرك حتي يراه الزوار ( فقط رآه الأعضاء ) أنا أضم صوتي للأخ المهندس السعيد عكاشة وأرشح المهندس مصطفي العسلي . ولكن هذا أيضا سوف يكون في إطار الإلتزام الحزبي .
وطالما ان الموضوع شاغل بال أساتذتي واخواني في المنتدي فإنني سوف احاول أن أكتب مقال أو اثنين أعرض فيهم وجه نظري السياسية والقانونية من موضوع مجلس الشعب في شباس عمير وفي مركز قلين عموما كقراءة تحليلية ونقدية بحثية وعلمية بحتة .
في النهاية أكرر شكري للأخ سيد على شجاعته الزائدة ولإخواني جميعا وجزاكم الله خيرا .

للعلم دائما يسعدني ويفرح قلبي وينضج عقلي ويتسع افقي كلما قرات لك سواء كنت متفق معك في الراي او مختلف
فخسارة ان يكون واحد بمثل هذة العقلية لا يمثل شباب شباس في المجلس
نرجوا منكم المزيد والتوضيح
يعني ايه مجلس شعب
يعني ايه قائمة نسبية
يعني ترشيح فردي
يعني ايه حزب العدالة ولماذا اخترته لتنضم اليه
ومين ابرز الشخصيات العامة فيه
قراتك ايه للاحداث الجارية محليا على مستوى شباس واوسع على مستوى الجمهورية
يعني ايه الخمس مواد اللي سوف يتم تعديلها في الدستور
افيدونا
اذهبوا ظلام الجهل عنا
فتاكد يا سيادة المستشار اننا نثق فيك ثقة عمياء

يا خبر يا أستاذ شريف والله انت ادمعت عيني بكلامك ده يا أخي والله انت و اخواننا اللي أساتذة وما سوف اعرضه ان شاء الله هو مجرد وجهة نظر وقراءة سوف اتبع فيها الأسلوب العلمي البحت إن شاء الله اكتبها الليلة أو غدا على الأكثر
حد يقدر يخالف العمدة برده ؟ ده اول عمدة بالإختيار الحر في تاريخ مصر

اخى العزيز محمود ليس ترشيحى لك بناءا على العاطفه ولكن انت تعرفنى منذ البداية وكثيرا ما تحدثنا فى هذا الأمر وما يتوجب ان يكون فى عضو مجلس الشعب وماذا يستطيع ان يقدمه للأمة ولابد ان يكون مثقف متعلم بسيط مثل اغلبية الناس ولكن من يطل علينا كل خمسة سنين هم اقوياء لدرجة لا نستطيع تحملها وكنت لا احب التملق سواء لهم او منهم فهم ليسو منا ولو اقسموا انهم عاشوا دنيا غير دنيانا واستغلوا كل طاقاتنا فى خدمة اغراضهم فلا يعرفوننا ودائما ما ينسون اسمائنا واشكالنا او ظهرون انهم ينسوننا حتى يفقدونا الثقة بانفسنا فلا احبهم
اما ترشيحى لك كان بناءا على بعض المواصفات التى من وجهة نظرى ضرورية وكنت حددتها سابقا
وهى ان يكون عضو مجلس الشعب يفهم فى
القانون وذلك حتى يقف بوجه اى قانون جائر قد يسلبنا حقوقنا
الصحة والتعليم لما لهما اهمية قصوى فى حياتنا وهما معيار تقدم الشعوب
مثقف يجيد لغة اجنبية على الأقل وكنت عرضت بعض الأسماء ومنهم انت
اما الوجوه القديمة فى مجلس الشعب او من كانت تريد ان تدخل تحت عباءة الحزب فانهم باعونا وباعو كل ثمين فى البلد ومن لم يستطيع اللحاق بركب الحزب الوطنى فانه كان على استعداد بان يقدم ارواحنا قربانا لأسيادهم فلا والف لا لأصحاب الوجوه العديدة واصحاب النفوس المريضة
فيوجد اسماء كثيرة يجب ان تمحى من ذاكرة مركز قلين ونبحث عن وجوه مشرقه تدخل عقولنا قبل قلوبنا

الله عليك يأبو الزهراء أولا سلامى لعبد الرحمن
ثانيا أنا متفق معاك فى اللى إنت قولته لكن لما قصدت كبراء العائلات دا كان بدافع الاحترام لأبويا أو لعمى أو لقريبى من بعيد المهم يكون كبير عائلتى اللى أنا برشحة يكون كبير بفكره وتصرفه وحكمته ومش لوحدى اللى هرشحة يكون كبير عائلتى لا دا أنا وأخويه وأولاد عمامى وقرايبنا كلهم بالاتفاق لانه هو اللى هيمثلنا قدام الناس و العائلات الاخرى وصدقنى تجمع العائلات على فرد هيكون هو الفيصل فى نجاحه .
أما فكرة تعدد المرشحين زى ما قولت سابق زى ما إنت وأنا مقتنعين بالاستاذ محمود فيه غيرنا كتييييير برده مقتنعين بمرشحهم وتخيل دلوقتى مثلا لو إحنا عندنا مرشحين كتير فى البلد وقلين فيها مرشح واحد يبقى مين هيفوز فى الانتخابات دى حاجة بالعقل ولازم طبعا نحكم العقل فى كل حاجة.ودا برده مجرد رأي و الله بعرضه مش بفرضه .
وبرده ياأستاذ سيد كل الناس اللى فى المنتدى مش هما البلد ولا إحنا ممثلين لعائلاتنا يعنى لو الموضوع جدى فعلا لازم يتعرض الموضوع على مجال أوسع وخد بالك عشان الاستاذ محمود ميجييش يوم ويدعى عليك ويقول إنت اللى ورطنى .هههههههههههههههههه دى أمزح فيها و الله .
عموما الاستاذ محمود فكره عالى وطريقة تعبيرة ممتازة جدا وأحسبه من الصالحين إن شاء الله .وربنا يوفقة الى مافيه الخير .
وأشكرك يأبو الزهراء على زوقك فى الحوار و هو دا اللى أتمناه من من كل إخوانا فى المنتدى . وسامحنى إذا كنت أخطأت بكلمة أو أي شئ بدون قصد طبعا.

الأستاذ كمال لسة على مايبدو فكرة مرشح البلد فى الأذهان وحكاية حربنا مع قلين انا لما قصدت تعدد المرشحين هو تفوق الأفضل واكدلك ان قلين مش هتتفق على مرشح ولا شباس هتتفق على مرشح
وكمان انا اؤكد على فكرة العمومية يعنى ليه منفكرش فى مرشح قلين يمثلنا وشباب قلين برده يفكروا ما دام نحن واثقين اننا سنختار الأصلح ونضع مسالة مصلحة البلد مصر فوق مصلحة البلد شباس ونناقش بعضنا البعض طالما عندنا ناس على مستوى عالى من الحوار والثقافة امثالك وامثال اعضاء المنتدى
وشكرا وسلامك هوصله لعبد الرحمن

استاذي الفاضل محمود تعرف جيدا أني أكن لك كامل الإحترام والحب والود لكن أختلف معك ف نقطتين وهما _ أولا كيف ستنتمي لحزب العداله والحرية وتفضل ترشيح الباش مهندس مصطفي العسلي ؟ وأظن أنهم لو قبلوا الحزب ده سيكون له مرشحين ف الدائره
ثانيا_ من وجهة نظري الفقيره لا أؤيد أن يطرح أحد علينا مرشح بعينه ثم يقول لنا مميزاته!
ولو أردنا أن نكون فعالين فلنطرح مثلا وليكن خمس شخصيات من القرية ف المنتدي ثم نرشح في منتدانا واحد منهم ونأخد التصويت عليهم ثم نذهب و نطرح عليه الفكره مثلا!
لأنه ليس من الطبيعي مثلا أن نضيع وقتنا ومنتدانا ف شخصية ثم نتفق أو نختلف عليها ثم بعد ذلك ترفض هذه الشخصية الفكره من جذورها_

انت يا عبد الرحمن مغلبنى فى البلد ومغلبنى فى المنتدى وعلى العموم انا اقترحت اسم ومنتظر اقتراحاتك انت هتروح السنة ولا قاعد عندك

قاعد مش نازل غير بعد 3 سنين و هغلبك برده ومش هقترح

وبعدين يا أبو الزهراء أنا ممكن أنتخب المتر بس بشرط يمضي ع وصل أمانة إنه يدخلني شرطه ولا أقولك عشان الشرطه هيبتها راحت خلاص يدخلني حربيه وأمري لله
فيا أخ أبو الزهراء شور ع المتر كده وع فكره أنا عارف رأيه

ماشى ياعم الشيخ الفلوس هتهبلك ولا انت اتجوزت عندك

الفلوس هتهبلني ؟
أنا يا أبوالزهراء إتهبلت عشان مش لاقي الفلوس دي
هههههه
وإطمن ياسيدي مش هتجوز هنا لو قعدت الف سنة
وبعدين فكر تيجي هنا وياريت الأستاذ محمود حشله يفكر يجي تاني عشان كان منور جنوب افريقيا كلها و بالأخص كيبتون

يعنى لو جيت هتقف معايه ولا هتبيعنى
انا عارفك راجل يا عبد الرحمن انا ممكن اجى بس المتر احنا بنحضره للمنصب علشان يمثلنا تحت القبة وبعدين يروح الجنوب فى الوفد المصرى

طبعا هبيعك
هتشتغلني وتقول إنك عارف أن أنا راجل
هههههههههههههههههههههههههههههههه

طبعا هبيعك
هتشتغلني وتقول إنك عارف أن أنا راجل
هههههههههههههههههههههههههههههههه

كما وعدت أستاذي العمدة وإخواني الأعزاء فإنني أكتب هنا وجهة نظري في مسألة انتخابات مجلس الشعب القادمة وبعد القادمة ولنبدأ بالقادمة:
1 - كما تعلمون حضراتكم بأنه قد جرت تعديلات دستورية ما يخص فيها مجلس الشعب تتمثل في عنصر هو الأهم وهو عودة الإشراف القضائي بعبارة ان تكون عملية التصويت تحت سمع وبصر أحد أعضاء الهيئات القضائية ، والثاني هو أن إعطاء الأصوات سوف يكون ببطاقة الرقم القومي ، لو طبقنا هذين التعديلين على شباس عمير فسوف تخرج لنا نتيجتين هامتين :
أ- أن التصويت لن يكون بالتعارف الأمر الذي يهدر آلاف أو علي الأقل مئات من أصوات النساء في شباس عمير اللاتي لم يستخرجن بطاقة رقم قومي حتي الآن .
ب- أن أصوات شباس عمير غير المنقاه علي مدي السنوات الماضية للحفاظ على عدد يتعدي الثمانية عشر الف صوت أيضا قد أصبحت أيضا من تراث الأيام الخوالي .
ج- أن القري الأخري التي كانت تجري فيها انتخابات نزيهة وفيها منافسة بين مرشحين من داخل القرية أو من خارجها في الأغلب جداولها منقاه أكثر على مدار السنين بسبب التنافس والشكاوي بما يجعل قري اصغر من شباس عمير تمتاز بتنظيم جداولها لتصبح عند التصويت ذات قوة تصويتية اكبر من شباس عمير لاننا سوف نستبعد من جداول شباس عمير الأموات والمسافرين في الخارج وحركة تنقلات محل الإقامة
د- إذا افترضنا ان 500 شاب في جنوب إفريقية و 1500 في السعودية و 500 في دول اخري أويعملون في مصر ولكن في اماكن بعيدة فإننا نتحدث عن عدد من الفين الي ثلاثة آلاف من أهم القوي التصويتية الجاهزة من ناحية المستندات والحركة والدعاية والحماية تغيب عن البلد وكأن مخ البلد وعضلاتها شبه مغيبة وأن العملية السياسية في شباس تعمل بنصف طاقتها ولكن ذلك لا ينطبق على شباس فحسب وإنما ينطبق إلي حد كبير على سائر مصر .
ه- من نافلة القول ان ظاهرة التقفيل قد إمحت إلي الأبد ان شاء الله والحكم النهائي على المرشحين من قبل الناخبين سوف يصدر من صندوق الإنتخابات في لجنة التصويت وقبل أن يغادر القاضي مقعده .
و- أن ظاهرة البلطجة ليس من مصلحة أحد في شباس عمير مباشرتها لان الذين كانوا يحتمون بالحكومة من المرشحين السابقين قد أصبحوا وهم يتقون الحكومة وبعد أن كانوا يتباهون بظهور اسمائهم في الجرائد أصبحوا يتجنبون ظهور اسمائهم في الجرائد وبعد أن كانوا يستعرضون قواهم يهمهم الآن الظهور بمظهر الفقراء المساكين ، وستصبح القوة لله ثم للأصوات والأصوات لا تحب البلطجة ولا تستجيب لمظاهر الكبرياء وكما قال الأخ سيد حجاج ان الناس أصبحت لا تطيق رؤية مظاهر القوة المفرطة هذه وقد كانت فيما مضي من دواعي الإنتخاب ومن دواعي النفاق والتملق وذلك لإرتباطها بالمصالح من جهة وبمنع المصالح من جهة اخري أي عنف وعنف مضاد .
ز- إن ظاهرة مد الجسور بين جهاز الشرطة ومجلس الشعب التي انتهجها نظام حسني مبارك تحت رعاية امن الدولة واقصد به أن يفكر كل ضباط الشرطة السابقين في الترشح لمقاعد البرلمان سواء بعد تقاعدهم أو عن طريق الإجازة المؤقتة للترشح أصبحت ظاهرة غير مقبولة على مستوي الشارع المصري كله وأصبحت صورة ضابط الشرطة السابق سبة يحاول أن يتخلص منها من كانوا يلوذون بها في السابق وهذا معناه بالضرورة أن مرشحي شباس عمير من ضباط الشرطة السابقين لم يعد لهم قبول خارج البلد ( مع كل احترامي لهم وتقديري الشخصي ) ولا يقدح في ذلك ظهور مسألة تصفية الحسابات القديمة بتأييد منافسين بذواتهم نكاية في آخرين لان هذه الظاهرة لن تكون مقنعة في اوساط الشباب خصوصا مع ظهور احزاب سياسية وتنظيمات أهلية وجماعات دينية ومع خفوت ضوء الوساطة وزهد الناس في النائب لانه لا يستطيع ان يحقق شيئا شخصيا .
2- بعد انهيار النظام الإجرامي في مصر وسقوط رموزه وانفتاح الحياة السياسية بعد عملية الإنسداد الكامل التي شملت المجالس النيابية والمجالس الشعبية المحلية وقد شاهدنا جحافل الأمن المركزي تحاصر مجلس المدينة في قلين لكي تمنع الناس من التقدم بأوراق ترشيحهم للمجالس الشعبية المحلية ، إن حالة الكبت المطبق هذه عندما ترفع في يوم وليلة لابد أنها بطبيعة الحال تنتج حالة من الإندفاع ناحية الترشح نتيجة تراكمات الكبت والمنع والقهر وهذا امر مؤكد وشرعي ومقبول ، حقا إن الإتحاد قوة ولكن في ظل الظروف القانونية القائمة لا يمكن فرض الإتحاد بالقوة وهو ما يعني بالضرورة توقع ترشح من عشرة الي عشرين شخص في شباس عمير أتوقع ان يكون نصفهم من المثقفين ونصفهم من غير المثقفين و لا يمكن أن يملك احد أن يقنع أي منهم ان يتنازل لان القانون سوف يكون في صفهم وكيف يمكن اقناع شخص بعدم ممارسة حقه القانوني ؟ طبعا في مجال المناقشة سوف يكون هو الأقوي وأؤكد ان الحل العنيف للمسألة لن يكون منتجا ولا مناص من الإعتراف لكل من يريد الترشح بالترشح طوعا أو كرها سوف يترشح من العائلة الواحدة أكثر من شخص حبا وكرامة أو كرها وإنتقاما وسوف تصبح المصطلحات التي استعملها فيلم فوزية البرجوازية متداولة على السنة العامة .
3- إن ظاهرة التمركز القبلي في شباس عمير قد أنتجتها ظروف الإعوجاج القانوني فالشخص لا يعتمد على القانون في حماية نفسه وإنما يعتمد على التجمع في إطار اتفاقيات دفاع مشترك بينه وبين افراد عائلته وساعد على هذه الظاهرة ضيق الرزق بما يستتبع احيانا التمركز في تجمعات اقتصادية يحرسها فقراء العائلات باستعدادهم للتضحية بأنفسهم ليضمنوا للأغنياء منهم أمنا كاملا وفي المقابل يستوليهم أغنياء عائلاتهم باستئجارهم في مواسم الحصاد والزراعة أو بأنصبتهم في الزكاة والصدقات . فلو تقدم النظام القانوني ووصل إلي مرحلة توفير الحماية للضعفاء ولو إزدهر الوضع الإقتصادي للفئات الكادحة فإن هذه التجمعات سوف تتفكك مع الوقت ولكن هذا في المدي البعيد ، في المدي القريب فإن أفواجا من الشباب الناضج المتعلم لن يقبلوا بالأفكار البالية القديمة داخل عائلاتهم ولن يقبلوا علي النصائح التي تتعلق بالمشي جنب الحيط بل على العكس اتوقع ان العائلات بأجيالها السابقة تجد نفسها مضطرة إلي الوقوف بجانب الشباب بإعتبار ان الأتجاه العام في مصر يفرض ذلك
خلاصة القول بأن القول أن شباس هى مركز الثقل الرئيسي في إنتخابات قلين ليس صحيحا الآن بل علينا ان نستعد لقبول فكرة سوف تفرض علينا الآن وهى أن النائبين الذين تخرهما دائرة قلين ليسا من شباس عبر اقتراع حر ولكن سرعان ما تعود اليها عندما تقسم الدوائر لكي تنتج كل دائرة نائبا واحدا وهو أمر متوقع في الدستور الجديد .
وللحديث بقية .
محمود حشلة عجمان في 11 – 02 - 2011

فكر محترم وعرض ممتاز يا متر

تحياتي الى كل اخواني بالمنتدى واخص بالذكر الاستاذ محمود حشلة رغم انني لم اتقابل معه منذ فترة طويلة ولكنه من الناس المحترمين جدا وعن الدعم المادي لا تقلق نهائيا وراك رجالة واتمنى مقابلتك في اقرب فرصة انا نازل مصر في اخر شهر 6 ونتقابل انشاء الله وعلى فكرة انت اول العارفين بمهمات عضو مجلس الشعب بعد الثورة اتمنى لمصر الخير ولاهلها الحياة الكريمة .

السلام عليكم
و تحياتي للجميع
اريد ان اواكد على عبارة اخي الاستاذ محمود حشله
** ليس معني ذلك عدم الإهتمام بالعمل السياسي حتي تذهب الأمانة الي غير أهلها** ** اختيار حر وعلى أسس شرعية** حتي أن الله إن سألنا عن اختياراتنا نستطيع أن نجيب يوم تشهد عليهم ألسنتهم وايديهم**

1-فواجب علي كل مسلم ان يؤدي الامانه لمن يستحقها على اسس شرعيه
2-المناقشه علي اختيار عضو مجلس الشعب سواء كان من شباس او غيرها لاستبيان الاصلح و الافضل هو من اسس الاسلام فعندما اختير سيدنا عبدالحمن بن عوف رضي الله عنه للمفاضله بين علي بن ابي طالب و عثمان بن عفان رضي الله عنهم قال "والله لقد استشرت اهل المدينة كلهم حتي الغلمان اللذين يلعبون في الطرقات"
3-هنا ادلى بدلوي ببعض الاسماء المحترمه اللذين لا ازكيهم علي الله ولكن احسبهم اهلا لذلك " اد مصطفي محمود ابوبكر-د عبدالله عبدالجواد -اد تاج شهاب الدين - ا احمد عبد الفتاح البسيقي - ا محمود حشله - - اد نصر البغدادي - ا احمد شهاب الدين - د محمد ابوالمجد سليم "
هذا ما يسع ذاكرتى الان بين القدامي و المحدثين في من اراه يصلح للعمل العام
4- من كان عنده اسماء اخري فاليدلى بدلوه
5- نرجوا عمل سيره ذاتيه لكل منهم & استضافتهم في المنتدي & مناقشه مستفيضه لكل منهم& تصويت

اللهم هيء لهذه الامه امر رشد يعز فيه اهل طاعتك ويذل فيه اهل معصيتك
ويؤمر فيه بالمعروف و ينهي فيه عن المنكر و يحكم فيه كتابك

نسيت تقول إسمي يا دكتور
هههههههههههههههههه

كلام ممتاز يا متر وتحليل يفوق تحليل هيكل وانت تعرف انك تقول دائما ما بعقلى

يا عبدالرحمن انا شايلك للكبيره

ماشاء الله عليك يا استاذ محمود تحليل قمة فى الروعة


دكتور احمد فعلا لازم يتعمل سيرة ذاتية ضرورى لان للأسماء اللى انت ذكرتهم لانى بينى وبينك أنا أول مرة اسمع عن ناس فيهم وأهم حاجة تهمنى ياريت توضح حضرتك فى سيرة أي دكتور منهم ايه اللى قدموه للبلد .( للغلابة ).

يا أخ كيمو أخر جزء ف تعليقك السابق أنا شايف إنه لو إتعدل من إيه القدموه للبلد ويبقي إيه ال هيقدموه للبلد _ عشان أظن إن أي حد من الناس دي أو غيرهم ماكانش عضو مجلس الشعب ف الحزب الوطني عشان يقدر يقدم خدمات للبلد وأظن لو عقدنا ندور ف البلد كلها مين قدم خدمات لأهالي البلد مش هنلاقي غير محي و مراد والراجل بتاع الجيش ال من عيلة غلمش ال كان بيساعد الشباب ف الجيش صح ولا إي يا كيمو ؟

الأستاذ عبد الرحمن
رغم اني لست من شباس عمير إلا اني تابعت كلام الأستاذ محمود كويس جدا ومن الواضح انه شخص غير عادي وان اسلوبه في السرد والعرض يعطي فكرة عن ثقافة غير عادية حتي لا تتوفر في كثير من المثقفين هذه الايام .
لكن يا أخ عبد الرحمن أنا لاحظت من كلامك انك تقول لا يجب ان نضيع وقت المنتدي في اختيار شخص ثم يرفض الترشيح ، أنا ملاحظة أنك من أكثر الناس مزاحا عى المنتدي ومزاحك غير منتج بالمرة وانما هو مزاح من النوع الذي يفقد اي موضوع حيويته ، يا أخي العزيز إذا لم يكن لك رأي معين فلا تضيع منا الموضوع . مثلا كلامك عن السفر الي جنوب افريقية وانك سوف تأتي الي مصر بعد ثلاث سنوات مال الكلام ده ومال الموضوع الذي نتكلم فيه .
أنا أعتقد انك عندك موقف نفسي متوتر من ناحية الأستاذ محمود ربما يكون فيه شئ انت تضمره له في نفسك .
ورغم اني لست من شباس إلا أني أؤيد الأستاذ محمود بعد ما قرأت تحليلاته أعتقد ان هذا انسان فعلا يشرف مركز قلين كله .
تقبل نصيحتي بصدر رحب يا أخ عبد الرحمن فلا اقصد منها سوي وجه الله

يا أخت زفراء واضح إنك متابعه جيده للموضوع بس خساره خانك فهمك لأي حاجه ف الموضوع أولا يا أخت يا فاضله لايخلوا المنتدي من الهزار ومن النكت ودي حاجه عادية ثانيا يا زفراء الأستاذ محمود كان معايا هنا ف ج افريقيا و هو لوحده يعرف مدي العلاقة ال بينا ثالثا يا زفراء أنا قولت هقعد 3 سنوات ودي كانت إجابه لسؤال الأخ أبو الزهر اء هتنزل إمتي وفي سؤال بس ياريت تتقبليه بصدر رحب ولو مش عاوزه تجاوبي دي حرية رأي _ إنتي تعرفي الأخت ريم ؟
وأخيرا أحترم وجهة نظرك و هبقي أحاول أعالج نفسي من التوتر ال بتقولي عليه ده

الأخ عبد الرحمن والله انا ما أعرف الأخت ريم وهل هي كويسة ولا غير كدة .
أنا بس أردت اني أقول ملاحظاتي لان الموضوع بيكتسب ثقل مع التعليقات ومحل الهزار بين اتنين هو الرسائل الخاصة طالما انها خارجة عن الموضوع وعموما أنا آسفة لو كنت زعلتك .
dr.ahmed alhashash حضرتك عرضت بعض الأسماء وواضح انه يغلب عليها أساتذة الجامعات وهذه فكرة خاطئة عن العمل الشعبي أو البرلماني لان ممكن يكون الشخص ممتاز في تخصصصه فقط ولكن لا يعلم الكثير في السياسة أو في الإتصال بالجماهير ودي الميزة الأساسية في عضو مجلس الشعب هى قدرته علي التعامل مع قضايا سياسية وشعبية واقتصادية . انا معرفش الدكاترة الأفاضل اللي حضرتك طرحت اسماءهم تخصصاتهم ايه وايه علاقتهم بالسياسة او العمل السياسي أو القدرة على التعامل مع قضايا مختلقة عن التخصصات بتاعتهم
أنا شايفة بصراحة ان الأستاذ محمود هو اواضح منه انه يستطيع التعامل مع قضايا مختلفة منها السياسي والقانوني وقرأت له أثناء الثورة بعض المقالات بصراحة يمتاز بقدره تحليلية هائلة وتقبلوا مروري

يا أخت الزفراء لو لاحظتي إعتراضي ع الأستاذ محمود الوحيد إنه هيرفض إنه يترشح لأني أعرفه جيدا _ ثانيا _ هل محمد خطاب بتاع سنهور المدينة ده رجل سياسه أنا شايف إن أي حد لو نجح هيستطيع أن يتعامل مع واقع الحياة السياسية _

لا لا لا ياعبده أنا قصدت ايه اللى قدموه للبلد .
أظن وإنت عارف ياعبده ياحبيبى فى الله إن الدكاترة وخصوصا لما يكون أستاذ دكتور واصلين فى البلد ويقدروا يقفوا قدام جهات عليا ويقدروا يحققوا حاجات الناس العادية متقدرش تعملها واديك قولت مثلا مراد القطان ساعد ناس وأنا أعرف شخصيا ناس برة البلد ساعد أبناءهم يكونوا أمناء شرطة ومن بس أعرف إنه كان بيعمل خدمات .
يعنى لو الدكاترة وأنا على حسب المسميات أعتقد إنهم دكاترة جامعة يعنى مسمعتش مرة إنهم ساعدوا واحد بإعفاءة من المصاريف ولاساعدوا واحد فى دخولة مستشفى يعنى من الحاجات دى.
سبحان الله . أما الاخت زفرات الوفاء لماقالت ( يغلب عليها أساتذة الجامعات وهذه فكرة خاطئة عن العمل الشعبي أو البرلماني لان ممكن يكون الشخص ممتاز في تخصصه فقط ولكن لا يعلم الكثير في السياسة أو في الإتصال بالجماهير ودي الميزة الأساسية في عضو مجلس الشعب هى قدرته علي التعامل مع قضايا سياسية وشعبية واقتصادية .........ال آخر الكلام ) وأنا قولت سبحان الله لأنها عرفت توصل المعلومة بطريقة سهلة ومفهومة وهو دا نفس الكلام اللى كنت حابب أقوله .
وبردة ياعبد هى قالت رأيها زى الاخت ريم ماقالت رأيها و اللى الواضح إنه أثر فى الجماعة قوى لدرجة خلتهم ميدخلوش المنتدى . وبحييكى يا أخت مع صغر سنك إلا ماشاء الله عليكى لكى مستقبل رائع فى السياسة إن شاء الله.

يا عبد الرحمن بطل جدال تعبتنى
وشكرا للأخت زفرات غلى موقفها المساند لى وبالراحة على عبد الرحمن اصل هو ما يعرفش مصلحته اما بالنسبة للأسماء فليس منهم استاذ جامعة الا واحد والأخ احمد الحشاش نسى ان يذكر شخصية مثل الدكتور حمدى النشرتاوى ماهو استاذ جامعه وكمان طبيب وله خدمات كتير لأبناء البلد على حدود مقدرته ومجاله ومع احترامى للأسماء التى ذكرتها فانا اؤيد
محمود حشله
حمدى النشرتاوى
لو اى فرد منهم قبل الترشح

انا أولا اشكر الجميع علي تقديم فكر يؤكد دائماً ان شباب مصر واع مثقف قادر علي التواصل مع المتغيرات الجديدة التي أحدثها الشباب في ثورة التحرير يوم 25 يناير ، هذه الثورة التي هزت كياناتنا جميعاً لنجد أنفسنا فجاة امام مستقبل علينا جميعاً أن نشارك في صنعه بالرأي وبالعمل وبالعطاء، ونحن غير مستعدين لذلك.
ليسمح لي أولاً الأخ أبو الزهراء ( وأرجو الا يغضبه رأي ) أن أختيارك للأستاذ محمود حشله ليترشح لعضوية مجلس الشعب أسمح لي هو عودة للماضي الذي لابد أن نحاربة جميعاً لسبب بسيط جداً أن الترشيح لابد أن ينبع أساسا من الأستاذ محمود حشلة نفسه وبعد أن يعلن هو ترشيحه ندلي نحن ندلونا في الموافقة علي ترشيحه أو العكس كل حسب وجهه نظره ( ده طبعا يا استاذ محمود مع كامل احترامي وتقديري لشخصك وعلمك وادبك وذوقك ) ولكن الترشيح للخدمة العامة ( رغبة ذاتية ) لاتفرض علي أحد وانما تنبع من الشخص نفسه والقيادة الشعبية قدرة في الشخص لايراها إلا هو يعرضها علي الناس وللناس الحق في الاختيار ( مش زي اللي حصل في 95 معايا يامتر )
أما د أحمد الحشاش اتفق جداً مع الأخت ( زفرات الوفاء ) أن المرحلة القادمة في مصر لا تحتاج اساتذة جامعة أو أطباء بقدر احتياجها لعناصر قادرة علي العطاء السياسي الرقابي والتشريعي ذلك ببساطة لأن هذه الفترة سوف يتم فيها وضع أطار كامل لمصر كدولة (مدنية) ستتغير قوانين وتشريعات لا تحتاج لفقهاء قانون فقط ولكن تحتاج كل عناصر المجتمع وفئاته حتي لاتطغي فئة علي أخري في الحقوق ( وسوف انوه لفقرة في التعديلات الدستورية الجديدة طغت فيها فئة علي أخري لمجرد وجود 3 أعضاء من المحكمة الدستورية في لجنة التعديلات الدستورية ( 3 من 6 )عدلوا اختصاص محكمة النقض في نظر الطعون الانتخابية وصحة العضوية وأعطوه دون وجه حق للمحكمة الدستورية وجعلوا رئيس محكمة النقض تحت رئاسة رئيس المحكمة الدستورية وهذا مخالف لقانون القضاء ) لذلك لسنا في حاجه إلي فئة معينه دون أخري نحن في حاجة لكل التخصصات طبعا رغم احترامي الشديد لرايك الذي كان مفاجأة بالنسبة لي وسعيد بيه جدا وكذلك احترامي الشديد للأشخاص المحترمين جداً الذين قمت بطرح أسمائهم وغيرهم كثير في شباس عمير
وافق في الرأي بشده مع الأستاذ الفاضل محمود حشلة في أن أصوات شباس عمير في الانتخابات القادمة سوف تكون اقل من حيث العدد ولكن اؤكد لك يا استاذ محمود أن الشباب سوف يعوض اقبالهم علي التصويت الفارق بين التصويت القديم والحالي ( انا بقول التصويت مش التقفيل ) اتوقع ان تكون اصوات شباس عمير في حدود من 15 الف الي 17 حين ان تعداد شباس عمير حاليا حوالي 25 الف نسمة لو طرح منهم نسبة 40% اطفال لم يبلغوا سن 18 سنه يكون ده المتوقع لعدد الاصوات وده مش وحش هتكون شباس برضه محل تاثير في الدائرة واختلف ايضا معاك ان عدد المرشحين هيكون في حدود 4 او 5 بالكتير
اما الاستاذ كمال ياريت نظرتنا تبقي ايه هيديه العضو لمصر مش لشباس بس
في النهاية ياريت نستني نشوف مين هيترشح وبعدين نختار الافضل علي مستوي الدايرة لمصر مش لشباس أو قلين
وياريت محدش يزعل ......... والامر قابل للمناقشة

اسف جدا على انى قلت ليس منهم استاذ جامعه فمعظمهم اساتذة جامعه ومتنساش يا احمد الدكتور محمد الحشاش
وشكرا اكرر اسفى

هل تعتقد لو أن هناك ديمقراطية وعدم فساد ف الدولة ومبقاش فيه محسوبيه ولا وسايط إيه ال يقدر يخدم بيه عضو بلده وآيه الخدمات ال يقدر يقدمها لنا ف ظل عدم الفساد ؟

نسيت أقول حاجه ل أخي ف الله كيمو
شد إنتباهك عدم دخول الشارد وأبوصهيب ولم يشد إنتباهك عدم دخول ريم _ ومش بعيد تظهر بعد ماتقرا كلامي ده عشان تقول إنها موجوده !
وسؤال تاني بس ده لأي حد يعرف
هل فيه أحد ف القرية أعلن بالفعل ترشيحه ولا لسه ؟