الفلاحين والبندريين
- " الحق .... دا بيتكلم بندري " كلمة تلاحق احدنا ان حاول أن يلفظ القاف والجيم باللهجة البندرية وتبدوا المشكلة كبيرة جدا إن حاول ذلك مع أبيه أو أمه الذين ربياه على الأدب والرجولة فإن هو نطق بأي كلمة بندرية تلحقه من أبيه نظرة سخرية ومن أمه نظرة تعجب ويا حبذا لو طلبا منه أي طلب وتأخر في قضائه فذلك يرجع بلا شك لتغير أصاب تفكيره ونواياه ( ما هو خلاص بقي بندري بقه ) .
- تصيب هذه المشكلة عدة فئات في بلدنا أولها العائدون من الجيش بعد مدة طويله ، خلالها يجتهدون ويجتهدون للحديث بالبندري مع زملائهم الجنود وإلا تعرضوا للسخرية اللاذعة واتهامهم بأنهم فلاحين بيتكلموا بلهجة غريبة وأحيانا يوجه اليهم سؤال .. انت صعيدي ؟ وهم في الغالب يكونون في مواقف لا تحتمل هذه السخرية خصوصا من رؤسائهم فيجتهدون ويجتهدون للتحدث بالبندري وتكون الأيام الأولي لذلك في منتهي الصعوبة لأنها أيام التدريب وربما ينطق نصف الكلمة بالبندري ونصفها الآخر بالفلاحي فتخرج الكلمة نصف بندرية ومع التكرار ينجحون في اجادة نطق الكلمات التي تحوي الجيم والقاف . والفئة الثانية هى الطلبة الذين يلتحقون بالجامعات خارج كفر الشيخ وبالإضافة الي استغرابهم السفر والسكن الجديد والزملاء الجدد فإنهم أيضا يضطرون للحديث بالبندري ليس فقط من أجل زملائهم وانما أيضا حتي لا يسخر منهم المعيدون في السكاشن فيختصرون الطريق و"يلغوا " بالبندري وهم أيضا يواجهون نفس المشكلة التي واجهت المجندين فكلمة حقوق مثلا قد ينطقونها بندرية في قافها الأولي وفلاحي في القاف الأخيرة ، والفئة الثالثة هى فئة الموظفين خارج البلد خصوصا جيل الوسط (50 -60 ) فهؤلاء شربوا ثقافة ( جيل البندريين ) سمعوا افلامهم ولبسوا لبسهم وأحبوا على نفس طريقة عبد الحليم حافظ في فيلم الوسادة الخالية وأصبحت خلفياتهم خلفيات بندرية والفئة الرابعة هى فئة العائدين من الخارج فهؤلاء أقاموا مع بندريين وحتي لا يسخروا منهم فقد تحولوا في لمح البصر الي اللهجة البندرية خاصة إن كان الأمر يتعلق بالعمل أو بتقديم خدمات للغة فيها اثر واضح والفئة الأخيرة هى البنات وهن يتبندرن من أجل اثبات التمدن ونوعا من التجمل واثبات الرقة والحنية .
وغالبا ما يواجه البندريين الجدد مشكلتان الأولي تواجهم عند ( البندرة ) وهى عدم قدرتهم على ملاحقة التعبيرات البندرية بعد أن تغلبوا على الحروف البندرية فمثلا يقولون ( ممكن اقعد فريحك ) بدلا من ( ممكن اقعد جنبك ) ولا شك ان كلمة فريحك هى كلمة فلاحي لا ينتبه الأخ البندري الجديد لها وهكذا تبدوا هذه التعبيرات عقبات لا يتغلب عليها البندري الجديد إلا بعد فترة طويلة من التبندر والمشكلة الثانية هى عدم معرفتهم بالمصلحات البندرية المستحدثة كل يوم والتي يعرفها البندريين بسهولة مثل فكني واخلع .... الخ .
- أخذني أبي بالدراجة الي البكاتوش عام 79 لأشاهد هبوط واقلاع طائرة الرش في مطار البكاتوش وأقمت لدي خالتي عدة ايام في شقتها المخصصة لسكن الزراعيين في البكاتوش المحطة ، كنا نري السيارات كل يوم ونري القطار كل يوم عشر مرات وكان يسكن في الشقه المجاورة المهندس مصطفي شكري واولاده الأستاذ حاتم والأستاذ محمد واخواتهما وكانوا يتكلمون بالبندري ، كانت كل المظاهر تؤكد أنني اعيش في مجتمع بندري حتي "الدهبية "التي كانت تحمل الركاب من على محطة البكاتوش لشباس كان كل ركابها من شباس وقزمان ولكنهم يتكلمون بالبندري ، وبعد أن عدت تكلمت بالبندري لعدة أيام كانت اعين اصحابي تتسع وهم يتأملون في وجهي بعد أن انطق كلمة بندرية ويسألونني أين كنت فأجيب بكل فخر وغرور ..... في البكاتوش .
- في كيب تاون يتحدث البيض والكلر اللغتين الأفريكانس والإنجليزي وعندما يتحدثون مع أجانب يتحدثون الإنجليزية بلكنة افريكانسية ( وهذه هى اللغة البندرية ) أما السود والهنود فيتحدثون الإنجليزية بلكنة مستمدة من لغة الكوسا وهذه هى الفلاحي ولطالما يجتهد الهنود والسود للتحدث بالإنجليزية باللكنة الأفريكانسية أي بالبندري الجنوب افريقي ، أما الفلسطينيون من سكان الأرياف فيتحدثون فلاحي حيث ينطقون القاف كاف بينما سكان المدن يتحدثون المدني ( البندري ) ولطالما يجتهد سكان المناطق ليتحدثوا بالمدني ونفس الشئ في لبنان وسوريا ، في الإمارات تعتبر اللهجة الشحي لهجة محلية لسكان الجبال فالباب يسمي بيب والصلاة اسمها صليه . غير أن أكثر اللغات التي لاحظت أن البندرة فيها ليست واحدة فهي الأسبانية ، فالأسبان في مدريد يخرجون لسانهم في حرف c دائما وهى بصراحة عملية شاقة جدا وهذه هى اللغة البندرية العليا يليهم في البندرة الم*******كيون والأرجنتينيون أما بولفيا وشيلي فهم فلاحي اللغة الأسبانية .
لعل الأيام التي قضيتها في البكاتوش قبل ثلاثين عاما كانت كافية لإشباع رغبتي في البندرة والكلام البندري فمنذ ذلك التاريخ لم اشعر ابدا برغبه في تغيير لهجتي التي أعتبرها جزءا لا يتجزأ من هويتي وتكويني وافكاري وذكرياتي واحلامي وجزءا من لحظات الألم والسعادة ، انها لهجة ابي التي تحدث الي بها دائما ولهجة أمي التي أشبعتني بها عطفا وحنانا ولهجة ستي فهيمة وستي رئيفة ، أنها اللهجة التي استمتع بالحديث بها مع عصام ابو يوسف ونحن نشرب الشاي على ترعة الخمسين .

يا سلام عليك يا سعاده المستشار
ابدعت وابدعت فبكلامك البسيط السهل
قد ارجعت لي
ايام عشقتها وما زلت اعشقها ايام
من الزمن الجميل
زمن الحب والبساطه
زمن الفلاح الاصلي
مش فلاح زي ما انت بتقول
فلاح بندري
بيصحى الساعه 11 ولابس جلابيه بيضه
ومشغل اغاني ومزاجهه عال العال
باشافلاح بندري عجبتني الكلمه دي
مشكور سيادة المستشار
وننتظر جديدك الشيق الممتع

استاذ محمود حقيقة يعجز القلم عن وصف ما اشعر به من متعه وانا اتجول بين سطور كتاباتك سواء فى الحاله السياسيه او الاجتماعيه اوحتى المقالات الادبيه فانت تكتب فى موضوعات شيقه جدا وجميله لا تخطر على بال احد
دائما تفاجئنا بالمتعه والابداع
يحضرنى فى هذا السياق موقف حدث معى ايام الجامعه كنا مسافرين فى القطار الى القاهره وكنا بنفطر الصبح فيه واحد صاحبنا عاوز مخلل فطبعا عاوز يلغى وفيه امم من الناس قاعده فقال محمد ادينى حتة ( محدء) طبعا انفجر الاخوان فى الضحك والتريقه على اخينا و فضل طول فتره الدراسة حاسس انها وصمة عار
ولزومها ايه الفزلكه ما تخليك على طبيعتك ناهيك عن الكلمات اللى دايما تفضح الفلاحين زى الاجنده والجيبه والجاكيت لانه الجيم فيها معطشه ولا تنطق جيم مش قيم

تحياتى يا مستشار والله انا بقيت بدخل ادور على اسمك فى الشريط بجد اسلوب بسيط وجميل وسهل وممتع وشيق واضحكك بقه كان واحد صاحبنا ايام ما كنا متبندرين جديد بردك قاعد فى كافتيريا السندباد فى كفر الشيخ وكان عاوز كوكتيل راح يطلب بقه قاله لو سمحت ( هاتلى كونتنيل ) قاله اسمه كوكتيل ي ااستاذ ههه قاله ماشى هاته بس شويه بقه وافتكر الشاليمو راح يجيب قاله اتنين شمبليون لو سمحت قاله اسمه شاليمو يا استاذ قاله ياعم هات شفااطه ههههه

قشدة

اخي الحبيب محمد يوسف السعدني الغالي بن الغالي جزاكم الله خيرا على الكلام الجميل .
أستاذنا الكبير الأخ محمد ابو بكر وأخي وحبيبي الأستاذ محمد عز العرب جزاكما الله خيرا على الكلام الذي تمتعوني به دائما وهناك مواقف كتيرة لم أذكرها ولكني هنا اتذكر موقفين مشابهين لموقف محدء وشامبليون الاول حدث مع واحد صاحبي اول سنة دخلنا فيها الجامعة وكنا في جامعة القاهرة دخلنا محل بقالة وصاحبي قاله عايز "جعبة " فصاحب المحل قضب وجهه وقاله نعم قاله جعبة من ام بريزة قاله مش فاهم قال آه اوكيه ونطقها بالبندري جعبة وفين وفين على ما افتكر كلمة كيس . والموقف الثاني من واحد من قرية "كفركلا" مركز السنطة وكنا في قهوة بتاع واحد مصري في كيب تاون والظاهر ان اخونا بتاع كفركلا ده كان اول مرة يطلع من مركز السنطة وجاء المصري صاحب القهوة ففيه اللي طلب شاي وبسكوت والبعض طلب شاي وكيك أو جاتوه والظاهر ان صاحبنا فكر ان كل شئ موجود في القهوة فطلب " شاي بالقبور " فصاحب القهوة قاله خلي امك تقرصه واحنا نعمل لك شاي بالقبور .
لكن بصراحة أكتر واحد ممكن يقولك نكت على المسائل دي يحيي مغازي بتاع البطيخ

روعة روعة يا فنان
اكتب وسطر تاريخ الزمان
بتاع الزربية والمراح وعزبة العبيد وصباح
وسطر واكتب انغام واحكي حكاية العصاروة والحشاشين وعيلة القطان
ومتنساش ابو العباس والفاكهة والخضار من عند اسمهان


احلى اديب واغلى مستشار وكاتب المفاجئات وحبيب الغلابة والاخوان

حبيبي العمدة الكبير والله موهوب جدا ب ارك الله فيك على الكلام الجميل والشعر الرقيق يا أبا امال يا غالي

والله الموضوع جميل جدا وكان نفسي اتكلم فيه من زمان خصوصا اني رحت كليه في القاهره وحاسس اني وانا باتكلم عادي اني غريب عن الناس دي بس الواحد خد قرار انه ما يغيرش الهجه الا في الظروف الصعبه زي السكاشن فقط .
والله مش عارف هما بيعيبوا علينا ليه مع اننا صح في النقط وكل حاجه .
هة تعطيش الجيم غلط .
طيب احب اسال واح بندري يكتب لي كلمه قلم زي ما بينطقها ولا كلمه قمر . طيب يعرف يكتب حرف الجيم زي ما بينطقه انا الصراحه مش لا قي له معني ولا عارف اكتبه .
الخيبه لما اي واحد فيهم بيقرا قران بيقراه عادي خالص زي ما يقولوا بالفلاحي .
والله لو كانت اللهجه بتفرق ناس عن ناس وتبين الحلو والوحش كان الناس كلها اتبندرت من زمن والله الواحد بيشوف الشباب اللي في المدن ما بيبقاش عارف دي ولد ولا بنت من صوته ويقولك بندري . هما دول اللي جابونا وراء

أخى محمود .... تماشيا مع البندرة مرسييييئ

ومتنساش (الأخ راكب من البأتوش ( البكاتوش) ..) وأخونا الثانى فى المطعم بعلو حسه ( ياعم شوية أرئير(جرجير ) لو سمحت ) وهات ياإحراجات


لكن بالمقابل اللهجة المحلية دى أحيانا تكون عائق فى بلاد الخليج لظنهم أنها لهجة البدو بتوع مصر

أسعدك الله ومن حولك ......وحفظك لمن تحب

فله شمعه منورها رائع ولا اروع

الأخ المهندس عبد الرؤف الدرس جزاكم الله خيرا على المشاركة الأميلة دي ههههههههههه
فعلا اهالي الخليج خصوصا اللي متزوجين من مصريات بيفهموا في اللهجات المصرية إدا إدا يالله نصيبنا كدة بأة

اخي الحبيب المرشد السياحي الكبير الأستاذ اشرف : جزاكم الله خيرا على الكلام الجميل والله واحشني خالص وأنا سعيد خالص اني بأعرف عنك اخبار كويسة . جزاكم الله خيرا

اجمل سلام لاعظم مبدع فنان سياده المستشار دائما ترسم البسمه وتفكرنا بلايام الحلوه وتصحى الحنين جوانا للبلد والصحاب ومواقف الفكاهه والقفشات ومنها
موقف لواحد من اعز اصحابى واحد قاهرى بيساله هو من فين خاف يقوله طبعا من كفر الشيخ عشان ميقولش عليه فلاح فقاله من طنطا رد عليه قاله يعنى جنب فلاحين كفر الشيخ
واحده تانيه واحنا فى طنطا بنعمل اختبارات تربيه رياضيه طبعا كان ابعد سفر نروحه فى الفتره دى رحنا نجيب سندوتشات والمعهود الفول والطعميه لانها كانت لسه شحيحه شويه فى البلد يمكن اول ظهور العشماوى وكده فواحد من الى معانا اتفنط بقى ماهو راح طنطا وهيروح يحكى فطلب جبنه مع تعطيش الجيم بما انه بندرى والمشهور عنها انها بالفلاحى جمنه ومستغرب قوى ان الراجل بيكررها عليه ويضحك ويقول للراجل ايه منتش فاهمها شكلك فلاح لازم اقولك جمنه يعنى وناهيك بقى عن الاقنده والقيبه والشامبليون الي هو المصاصه والعجله الى فست
ده كله كوم وحكايه فلاحين الغيط كوم تانى ومنها لله وصله الدش والمصارعه بتاع يوم التلات الساعه سبعه والجوله الحريمى بالزات هى الى فتحت عنيهم بعد ماكان بيقوم يصلى الفجر ويفطر الشويه الطبيخ البيتين اويسخن له شويه رز بحته سمنه بلدى وياخد عتاده الى هو غداه والى مبيزدش عن كونه رغفين عيش بلدى وحته جمنه قديمه دلوقتى غير اسلوب حياته لمواكبه ركب التطور فاعتمد هو الاخر على التيك اواى يسمع المصارعه ويتاخر يقوم يطلع وهو ماشى على العشماوى او انور ماسوره اوالسعيد ياخد بجنيه طعميه و3-4 ترغفه عيش من الاحمر والغداء باشتراكات طبعا بيجى من قلين سواء كان سمك اوفراخ مشويه اما رى الارض فاستعمل بدال الساقيه والبهايم التليفون المحمول وربنا يستر على الى جاى
والله انا لااعيب عليهم فمهما يحدث هم يستحقوا منا كل تقدير لان مهنتهم من اكثر المهن مشاقه وتعب ولكنى اعيب على تغيير اسلوب الحياه وبعدهم عن اهم مايميزهم لاهم وصلوا للبندرى ولاهم بقوا على الفلاحى فهم فى اعتقادى يستحقوا عن جداره الوسط الى لاالى فوق هيشفوهم ولا الى تحت هيسمعوهم
مع خالص تحياتى

يووووه فين ايامك يا خلف وعمك سعد اللى عند الجناينى والفول الحار بتاعه وابو غريب يقله ( سته يا حاااج ) ههههه والله تسلم ايدك يا مستشار يا مفجر الزكريات مره كنا فى الاسماعيليه فى معسكر كشافه وكنا قاعدين فى كافتيريا وكده المهم نلاقيلك المعلم اللى جاى ينزلنا الطلبات البدله بقه كامله وكرفتا ومنديل على دراعه قلنا قشده دالشاى هنا من ابو خمسايه علطول الرجاله بقه عاوزين يعملوا شباب موديرن وانجعصوا لورا كده وده عاوز سحلب والتانى نيس قافيه والتالت كونتنيل المهم القائد حسام الغريب بقه كبير القاعده قالهم هوسس وقال للراجل مالاخر كده انته عندك ايه غير الشاااى لقيناه بيقول حضرتك عندنا ( كلاسيك و موجه و و و و قبل ميخلص حسام قاله تمانيه شاى بسرعه يا حج ههههه وحته مودرن بقه وخلى السكر بره

قشدة

يا أخى الواحد أصبح مدمن لكل ما تكتب
تحياتى

اته اكل الفلاحين في البندر والللي قالها عارف نفسة وبلاش فضائح على المنتدى

سقط سهوا ان اشكر اخي الحبيب الأستاذ بسام عطالله على مروره الكريم ، انت يا أخ باسم فكرتني بأيام اول ما دخلنا الكلية وبقينا محتارين خالص وواحد صاحبنا بيقولي عايز اكل حاجة حلوة قلت له تعالي نشوف في الدكان اول ما دخل قاله عندك أرملة ؟ يعني كرملة
اخي الحبيب الأستاذ محمد فهمي جزاكم الله خيرا على المرور ، دا موضوع المصارعة ده حاجة مهمة جدا ويا سلاااااام لو قلت لواحد ده تمثيل ، لو اديته قلمين على وشه ارحم من أنك تقوله دي تمثيل ههههههههههههه
اخي الأستاذ محمود سعد جزاكم الله خيرا يا عم انا مش قد الكلام ده ، بارك الله فيك ، انت فين مش باين من زمان ،

طبعا يا متر وانا بقرا موضوعك باضحك وافتكر احداث حصلت وحاولات منا للالتحاق بقطار التمدن وكنا فى كلية التربية بكفر الشيخ جميعنا فلاحين الا اننا كلنا بنتبندر على بعض وواحد صحبى دخل محل بيسال صاحب الدكان عندك (جعبة )بالبندرى طبعا الراجل فتح بقه وقاله هاه يقوله جعبه يا عم الراجل ده فلاح ولا ايه

ازيك يا استاذ \سيد اخبار حضرتك ان شاء الله تكون بخير
هيه الجعبه من 2001 اللى 2003 كانت كيسه وجعبه فى بعض الحالات وكان فيه واحد عنده فى الشارع كان ديمان يقوالى ياااااااا فلانتينوا ارمى شنطه متنساش تجاب العجله عشان تجبالى كروت من عند الصافى
عشان تجاى تجلى طالب
فاااااااااااااااااا كرررر الايام ياعمى سيد الله يرررررررررررحم كانت ايام جميله
ياريت ترجع تانى وعلى راى كوكب الشرق بتقوال عايزنه نرجع زى زمان وقوال للزمان ارجع يا زمان ايام حلواه عمررها ماتتعوض

اذيك يا اشرف اخبارك واخبار الوالد سلامى للاسرة واستاذى واخى الكبير

وبتسمع كمان كوكب الشرق ده احنا اتطورنا قوى