تنور شمسها تاني
يا مر مررت البق ومرك علقم
عشناك سنين طويلة ناكل ولا نهضم
نملوش ولا نمضغ قبل السان ما يحس
ولما ييجي الزفت بعد المر نقول أطعم
ليلت يومنا بقي نهارنا يا ليل غامق
نصحي ننام نمشي ما عاد فارق
نجري ورا اللقمة كما الكلاب تلهث
ابقاق جعانة وعطشانة تسطل الفايق
يا عمر عدي سنين وراها سنين
حسيتوا بيها زيي ولا انتوا مش حاسين
أصل الشقا علي وشي بيعلم
تجاعيد عريضة مرصصة شمال ويمين
كلتوا لحومنا وسبتوا البواقي عضم
رمتوها ف الشارع نازلة الكلاب قضم
لملمها يا ربي يوم الحساب تنطق
فتفوتة فتفوتة أنينها يصحي الصم
لو نمنا ليلنا جوعنا يصحينا
بردك يفت العضم أملنا يدفينا
مين يا تري راح يمسك الراية
لما الأوان ييجي الشهم هيجينا
لسه جنين في بطن الأم لم يظهر
حاسس وسامع حزننا بيكبر
بيرضع مرنا عضمه يستقوي
عايزين لسانك وقلبك حصننا الأكبر
طلبنا فارس طلعولنا مليون فارس
طلوا ف يناير وكنت أظنها مارس
زهايمر حط فوق مخي مسح فايلاته
تلات أو سبت عقلي مش حاسس
يمكن من الفرحة أو حتي من الصدمة
معقول يا ناس هنخرج من العتمة
قلبي رقص جوة الصدر يتنطط
ولساني بعد الصمت ينطق الحكمة
الله عليكم يا شباب وقتكم هيطل
وتزرعوا أرضنا بالقمح ويا الفل
ومصر الحبيبة تنور شمسها تاني
وخيرها الكتير راح يكفي الكل
***************
سامح لطف الله – بشلا – ميت غمر
