- أعلن عمر سليمان قرار تخلي المخلوع عن منصب رئيس الجمهورية وقال أن الله الموفق بفتح الفاء ، وظهر جنرالات الجيش في حجرة كبيرة جدا أكبر من أي حجرة رأيتها في حياتي ، قال الجنرالات انهم سوف ينظمون انتخابات ما في وقت ما لا يزيد على ستة اشهر وسوف يجرون انتقالا ما للسلطة إلي سلطة مدنية ما ، ثم اعتدنا على مداخلات بين اللواء ممدوح شاهين الفقيه القانوني الوحيد في الحجرة الكبيرة جدا وبين ريم ماجد وزميلها على قناة اون تي في حتي اننا كنا نشاهد تلك القناة خصيصا حتي نعرف ما هى الموضوعات التي تشغل فكر الفقيه القانوني الوحيد في الحجرة الكبيرة ، إلي ان فاجأنا ممدوح شاهين في مؤتمر صحفي ما بعد مليونية ما وقبل انتهاء فترة الستة اشهر بعدة ساعات بأن الإنتخابات الما سوف تبدأ قبل نهاية نوفمبر بعدة ساعات وتستمر إلي منتصف يناير ثم يكون اجتماع ما لمجلس الشعب والشوري بعد ذلك بشهرين وبعد مليونية ما قرر المجلس العسكري أن يدعو مجلس الشعب للإنعقاد قبل نهاية يناير بعدة ايام ، ثم لتبدأ مرحلة وضع دستور ما بعد انتخاب جمعية تأسيسية ما تستمر ستة اشهر على الأكثر ، ثم لتبدأ إنتخابات ماااااااااااااا لرئيس الجمهورية بعد الإنتهاء من وضع الدستور ( ولا شاله عنها ما بدأت ولا كانت ) . هذه هى الخطة التي وضعها لنا المجلس العسكري ، والتي تستحق بلا شك محاسبة ما على فساد سياسي ما تسبب فيه مجلس عسكري ما كان في مصر بعد 11 فبراير الفين واحد عشر .
- ذكرني موقف المجلس العسكري بصديقي الذي خرج توا من قريته الي دبي ليبحث عن عمل ولم يك يعلم أبدا ما هى ( الشاورمة ) ودخل الي احد محلات بيع الشاورمة واستفسر عن عمل فسأله صاحب المحل ان كان يستطيع تقطيع الشاورمة فأجابه بنعم طبعا وبمنتهي الثقة فاصطحبه صاحب المحل الي المطبخ واعطاه قطعة لحم كبيرة جدا وقال له قطعها شاورمة فقام صديقي بتقطيعها الي مكعبات كبيرة بينما هو وصاحب المحل يتبادلان النظرات اثناء التقطيع ولما انتهي سأله صاحب المحل : إيه اللي انت عملته ده ؟ فأجاب صديقي : شاورمة ، فقال له صاحب المحل يا بني الشاورمة لازم تكون شرائح رقيقة مش ( الهبر ) اللي انت عاملها ، فأجاب صديقي : يعني هى حتنزل بطنهم سليمة ؟ مش كلها لحمة وخلاص .
- انتهت بنا شاورمة المجلس العسكري إلي وثيقة السلمي التي حاول بها الجيش ان يضع لنفسه مجموعة من المطالبات الفئوية على طريقة ( اشمعنا احنا ) والتي انتهت الآن بالمجلس العسكري وبالشعب وبالأحزاب وبمستقبل الدولة إلي الوضع الذي نحن عليه الآن .
- إنني اتخيل الحوار الذي دار بين المشير والجنزوري كالآتي :
المشير : أنا جاد في ترك السلطة للمدنيين
الجنزوري وأنا أعتقد انهم جادين في انتزاع السلطة
المشير : بس انا اخترتك انت بالذات علشان تشرف على خروجي من السلطة .
الجنزوري : يا سيادة المشير انت اخ عزيز ودي عشرة وعيش وملح .
المشير : أنا عايزك تضع مسألة الخروج الآمن كأولوية في المشهد السياسي الآن . أنا مش عايز اسيب مصر ومش عايز بهدلة ، كل اللي انا محتاجة عفو كامل عن كل أفعالي قبل ترك السلطة في اتفاق توقع عليه كل القوي السياسية في البرلمان ويصدر به قانون ملزم .
الجنزوري : سيادتك فقط ولا كل أعضاء المجلس العسكري .
المشير : طبعا كل أعضاء المجلس العسكري لكن لو د حيكون عقبه يبقي انا بس .
الجنزوري : إذن انت محتاج للبرلمان كسلطة منتخبة علشان تصدر هذا القانون .
المشير : نعم مش حينفع ان القوي السياسية غير المنتخبة هى اللي تتفق على ذلك لازم قانون علشان الدستور نفسه يحمي القوانين خصوصا في المسائل الجنائية القانون الأصلح للمتهم بيسري بأثر فوري ، ده اللي قالي عليه أحد المحامين الكبار الموثوق فيهم .
الجنزوري : إن شاء الله اوعدك ابذل جهدي .
المشير : فيه طلب تاني
الجنزوري : اتفضل
المشير : خلال الفترة الإنتقالية لو فيه فرصة اني استمر في الحكم لازم تساعدني
الجنزوري : وبعدين يا سيادة المشير انا كدة مش عارف الطلبات بالظبط
المشير : ولا انا عدت عارف ولا فاهم أي حاجة ، اسمع يا كمال إعمل اللي تعمله انا تعبت خلاص ، لكن انت بتكح ليه كتير يا كمال ؟ اوعي تموت يا كمال قبل موضوع الخروج الآمن ، ارجوك .
كمال ما تخافش يا سيادة المشير ،اوعدك اني مش حأموت إلا معاك
- بعد مرحلة من تخيل الحوار بين المشير وكمال أعتقد بصفتي واحد من الشعب إنها فرصتنا الآن لإستلام السلطة من المشير عن طريق صناديق الإنتخابات البرلمانية ثم لا نعطيها لأي مشير ولا أي فريق ولا أي لواء بعد ذلك .

اللهم اعصم مصر من الزلل
و اكفها شر المتامرين
و الحاقدين
و الطامعين
و رد كيد الكائدين الى نحورهم
و اجعل تدبيرهم تدميرهم
و اجعل دائرة السوء تدور عليهم

اعتقد يا متر رغم الاختلافات فى اختيار الجنزورى ورغم ان الجنزورى ده سبب فى رفع التكليف عن خريجى التربية وقعدهم فى الشارع زى حالاتى الا اننى مع تكليفه بالوزارة والاستفادة من خبرته وهى حكومة مؤقتة يعنى مش ابدية وربنا يولى من يصلح

حبيبي الدكتور الكبير والمفكر المحترم تامر الخطيب آآآآآمين
أخي الحبيب والأستاذ الكبير الأستاذ سيد حجاج ابا الزهراء جزاكم الله خيرا ، ربنا يستر والست شهور دول يعدوا على خير ان شاء الله ، حتي الجنزوري اعتقد ان شخصيته لابد تكون اتغيرت كتير عن ذي قبل كمان الضغوط حوله حتهذب كثيرا شخصيته ، وان كنت عتقد ان اختياره بالذات حتي ينهي ملف المشير على خير وهو ما اتمناه فعلا حقنا للدماء وكفاية اللي حصل للناس الاسبوعين اللي فاتوا

الأخت الفاضلة الأستاذة نادية عمير
جزاكم الله خيرا على الكلام المهذب الرقيق ، فعلا المسرحية دي شفناها قبل كدة ، أنا لما قريت كلامك افتكرت عبد الفتاح القصري لما قال : دبابات ... طيارات .... سواريخ .... كتاكيت .... وبعدين في الآخر قال ما فهمتها يا كروديا ، والحقيقة هو كان بيعيد نفس المشهد . جزاكم الله خيرا على المداخلة الرقيقة

http://www.kfrelshikh.com/news_Details.aspx?Kind=7&News_ID=12617
هذا المقال نشر على موقع اخوان كفر الشيخ

روعة يا مستشارنا
شكلك ناوي تالف مسرحيات
على العموم لما نشوف الجنزوري هيختار مين يا ندعمة يا نروح التحرير

تحياتى يا مستشارنا على تصورك اللى يجوع ده ههههه ولكن انا اتفق على الجنزروى كرجل للمرحلة يعنى كل الحكاية ست شهور نستحمل ونقضيها شاروما بقه مش مشكلة ولا ايه يا ريس

شاورما بقه المرده دى

أخي الحبيب الأستاذ الكبير شريف / عمدة المنتدي
جزاكم الله خيرا على المداخلة الجميلة دي ، الحقيقة انا معرفش أؤلف لكن لما المسرحية تكون واضحة فالحوار بيكون واضح عموما سواء الجنزوري أو غيره لن يستطيع عمل أي شيئ خلاف ارادة الشعب لأن الشعب خرج من مكمنه ولن يعود مرة اخري .
اخي الفاضل الأستاذ الكبير محمد عز العرب
جزاكم الله خيرا على الشاورمة الحلوة دي وخلي يا عم الست شهور يعدوا زي ما يعدوا
الغريبة اني وجدت أمس ان المقالة دي منشورة على موقع اخوان كفر الشيخ معرفش ازاي . واضح ان المنتدي بتاع شباس عمير بدأ يلفت النظر ودي ظاهرة صحية .