سامح لطف الله : اللي علي راسه البطحة ...

12/7/2011 7:24 PM


اللي علي راسه البطحة
هيمد الأيد ويحسس
حتي لو يشطح شطحة
ع المصري ما حد يِمَيسْ
ولما يثور هتخافه
عصبي ومزاجنجي عويص
ولا حدش شاف إيه شافه
هتلاعبه يقول خلاويص
ف القلب يشيل ويخزن
سبعات تغزيل ترقيص
ولما يقوم القومة
ويودع تلاتين نومة
لا رصاص هيخاف ولا شومة
علي بلده تملي حريص
راح نلبسلُه اليونيفورم
لو قالوا محاكمة ف شرم
عيان في القلب بخرم
محبوس جوة التقفيص
ومحامي بصوت يترافع
عن قتلة يقول ويدافع
ومصحصح قاضي و سامع
بالحكم الكليهيص
هتبرد نار ف قلوب
بقصاص عدل ومطلوب
برصاص يضرب وبطوب
وقناص جايبينه تخصيص
بينشن قال بالليزر
وجِمَال والجوكي ببليزر
وفلوس مع إنه معيذر
غلبان مطلوب له فلوس
إسمعني سيادة القاضي
تأخير عنه مش راضي
تضييع وقت وفي الفاضي
ومحامي نازل تهييص
دي عصابة ظلمة وفجرة
وبقول و ابصم بالعشرة
لو طالوا نسف الشجرة
يقطعوا دابر إبليس
إبليس تلميذ ف ميدانهم
أقصر ما يطولش ودانهم
بيوطوا عليه ببدنهم
ويوسوسوا ليه وساويس
اللي علي راسه البطحة
هيمد الأيد ويحسس
حتي لو يشطح شطحة
ع المصري ما حد يِمَيسْ

سامح لطف الله

http://www.elfagr.org/Detail.aspx?nwsId=92777&secid=19&vid=2