الثورة مستمرة وجمعة الغضب وجمعة التحرير وليبرالى وامبريالى ووسطى ويسارى وحزبى ومستقل وسلفى واخوانى وفلول وحزب الكنبه ودستورى وغير دستورى وحركات وحبشتكانات ومسميات ابدع الشارع المصرى فى تداولها وشرحها شرحا دقيقا مفصلا حيث ان الشارع المصرى هو المسرح السياسى الواعى والذى لابد وان تفهم منه هذه المصطلحات ان اردت ان تفهم ولكن حين تريد فلن تجد من يرشدك حيث انها كلها شعارات يرددها الكثير دون وعى الا من رحم ربى فالكل يفسرها ويشرحها كل على هواه وعلى حسب ميوله او تطلعاته فالكثير يريد ان يثبت لنفسه والاخر انه مثقف وفاهم وايضا الكثير يريد ان يثبت ولائه لحزب معين آلت له الامور تطلعا لمنصب شخصى فى المستقبل والكثير مش فاهم حاجه هاااااااالص ’’’’’’’’’’’’’’’’’’’’’’’’’ ما علينا !!!!
اخر المصطلحات الا وهو العصيان المدنى على اختلاف تعريفه او فهمه لكن بالمفهوم العام للكلمه هى مقاطعه الحكومه او التمرد على الحاكم والتوقف عن العمل او مخاصمة الحكومة بالفلاحى والجمييييع يعلم اننا شعب مصرى معندناش ثقافة التظاهر والاعتراض والدليل واضح فى جميع الاعتصامات والتظاهرات والجمع بتنتهى ان كل واحد زعلان من مراته بيروح يقعد فى الميدان ويقول مش مروح الا لما تتنفذ المطالب
طيب ماشى ياحج مطالب ايه
يقله هه اهو كده وخلاص
طيب يا عم ايه مطلبك معرفش اهو مش مروح وخلاص الا لما ينفذوا المطالب
طيب يا عم بالراحة بس مش تقول انت عاوز ايه

عاوز مطالب الثورة تتنفذ ويا كده يا مش هنمشى
وشوية بلطجية متاجرين مع شوية قنابل مسيلة للدموع وهكذا الحال وشباب زى الورد كل يوم يموت ويروح دمه هدر

اهو ده الحال اللى هنعيش عليه لفترات الثورة مستمرة عاوزين انتخابات مجلس شعب ولما تتعمل لا ده الشعب مش فاهم واختار التيار الاسلامى ده احنا عاوزين ديموقراطيه تقوموا تختاروا الاسلاميين يعنى الناس عاوزين ديموقراطية ماللى هى بتحقق اهدافهم بس لكن لو متحققتش الاهداف دى يبقى عصيان مدنى واعتصام لما تتحقق طيب هى فين الديمقراطيه يا ولاد التييييييييت بتنادوا بحاجه انتوا مش فاهمينها اصلا ولما المجلس العسكرى قالك انتخابات اخر يونيو لرئيس الجمهورية بعد الانتهاء من انتخابات مجلسى الشعب والشورى يقلك الله طيب وليه مش اخر ابريل يا اخى احا منك ليها ليه له ( مع الاعتزار للمظفر النواز طبعا ) هههههه حاجه بقت ممله ومقرفه يقلك اعتصام مدنى ومقاطعه لكل مظاهر الحياه الحكومية فى البلد طاااايب يا عم منك له متشتريش بقه اكل من السوبر ماركت اللى صاحبه هيشتغل ولا تشترى عيش من الفرن ولا تتكلم فى التليفون ولا تسمع التليفزيون ولا تركب التاكسى وانت رايح هو انت هتانتخ حضرتك عشان مثقف وواعى وباقى الشعب يشتغل عند اللى خلفوك ؟؟؟

مصطلحات ومسميات وحركات هى استمرار لمخطط تقسيم مصر ونشر الفوضى فى العالم العربى وهو مسلسل الهيمنة الذى كان ولا يزال يكتب فصوله وحلقاته نظام صهيوى صليبى طالما ما ابدع فى اختيار ابطال حلقات من خونه وعملاء من قادة عرب وبعد سقوطهم على غفله منهم لصحوة الضمير العربى سرعان ما جند حركات ومنظمات وابطال اخرين لضمان استمرار مخططاته فى المنطقة
لك الله يا مصر

قشدة

تسلم ايدك يا بو حميد
المجلس العسكرى لبس الناس فى حيطه ومبقاش حد عارف يصدق مين
لحد امتى يا مصر هتفضلى مذلوله
محروقه منهوبه مسلوبه وايديكى مغلوله
حكم العساكر فيكى خلاكى مسلوله
مش قادره تخدى النفس وصحتك معلوله
مش قادرة تتحركى رجليكى مشلوله
مع ان كنتى فى يوم فى المرتبه الاولى
ايه جرى ما تردى ولا انتى مزهوله
فوقى صحصحى ردى وقوليلنا عالفوله
السر كله معاكى وانتى اللى مسئوله
مين يا بلدنا اللى عايزك تفضلى دلدوله

عاااش يا بكر وتسلم ايدك على الشعر الجميل بس كتير والله يا صاحبى عاوزينها دلدولة وللاسف من ابنائها وشاربين من نيلها

قشدة

تستاهل سقفه سباعيه

سباعيه سباعيه إبتدي

تحياتي يا حاج محمد ، لا بجد أبدعت كثيرا في هذا المقال ، وعبرت عن كثير مما يدور في قلوبنا وعقولنا ، بس على فكرة الحاجات دي رغم عدم المشاركة فيها لان المقصود بها اسقاط المؤسسة البرلمانية لأنها غايظة نجيب ساويرس جامد إلا انها تحرك المياه الراكدة وتخفف الضغط على الإسلاميين سواء في الداخل أو الخارج ، عموما ربنا يستر وتعدي على خير ، انا شخصيا رجلي شبه مكسورة وكدة كدة قاعد في البيت ، تحياتي مرة أخري للكاتب العبقري وجزاكم الله خيرا

سلمت وسلمت يداك أخي الحبيب الاستاذ محمد ....رائع كعادتك دائما ووالله لقد لقد وضعت يدك علي الجرح
انا لا اخاف علي شباب مصر الاصيل عندما اجد مثل هذه العقليات بينهم فكر ثاقب وطموح بلا حدود وامل في مستقبل افضل
تحياتي لكم واتفق مع اخي الاستاذ عبد الرحمن تستاهل (سقفه) سباعية ههههههههه
تقبل مروري اخي الكريم
ولا للعصيان المدني

احلى سباعية ليك يا عبود تحياتى يا قائد يا كبيير

الف الف اف مليون سلامة يا مستشارنا وحشنى جدا والله وربنا يسترها ويعديها على خير
حبيبى الغالى ابو محى مشكور يا ريس على كلماتك الرائعة والتى اسعدتنى جداااا

قشدة

يا سلاااااااااام هو ده الكلام السليم
وده برده رأى الإعلامى الكبير توفيق عكاشة

تحياتى ليك اختى الفاضلة لكن اسمحيلى انا مش متفق معاك فى حكاية الاعلامى الكبير دى

قشدوة

تسلم يا ابو حميد الم ترى الاخت الفاضلة هذا الاعلامي الكبير وهو يقبل ايادي صفوت الشريف

على فكره دى مش اخت ؟؟ دا اخ

أنا ماعرفش ازاى اعدله اصل مش انا اللى سجلت