ناس بلدنا تنتخب

الناس في بلدنا محتارة
بيقولك بيّن لي أمارة
لو تصلح إديني إشارة
دي بلدنا عايزالها جريئ
***
أنا عندي حِلولِك يا بَطالة
وانا عندي برامج شغالة
والشغل هيرجع يا عِمالة
بخروجكوا نقفل صناديق
***
أصواتكوا أمانة إدّوها
وبكل أمانة أدُّوها
إنصروا لبلادكم ودُّوها
هينوَّر للحق طريق
***
إسمعوا برامجهم وخططهم
إنبشوا ف كلامهم وخيوطهم
ناصبين الشبكة ف زعبوطهم
نتأنَّي ونبص حقيق
***
لو جالك من فوقك تحتك
ويقوللك يا سلام علي بختك
دا سنينك جاية وأنتختك
نفَّض له وسَّع له طريق
***
غربلُّه كلامه وكلماته
وسجلُّه آهاته وأناته
سلاماته ف ريحاته جياته
وعاملِّي طاهر وبريئ
***
الفلْم لابد تكون قاريُه
لوحتي يغير ف سيناريو
والفقر لا شافه ولا داريُه
في طحينه يشدّك لغريق
***
هتبُص لعمله وأعماله
إيَّاك تِنْخَمْ في أشكاله
لتْطب ف حفرة أحباله
ف الغرقة ولا تلقي صديق
***
حذَّرتك ونصحتك يا ابني
إختار اللي يعلي ويبني
دالفاحت ولاعمره ناسبني
والقلَّة ما تبل الريق
***
ولا تسمع لو قال بحياته
دا راسملك حبله وخيَّاته
وف عسلُه السم ف طيَّاته
هيسيبك لو حتي ف ضيق

سامح لطف الله
http://c4wr.com/?p=18570