كان حلم كبير يا ليالى
أتقل من جبل الصبر
عشناها سنين ما بتخلص
والعقل يقول مش جاية
والضلمة السودة جبال
والصبر ف بقى ممرر
والجفن يدارى العين
والبصة الحزن ماليها
واللقمة طعمها علقم
والشط التانى غيامة
أفرول ملبوس بقيامة
وأجازة ملهاش طعم
والرمل يسد العين
ولا شايف ايه بيداري
بيقولوا قال بارليف
وجيوش ما بتعرف قهر
يا معوض رايح فين
نفسك تسبح للضفة
وتدمر جبل الخوف
أجلت يا روحى الزفة
وامك على طول شكاية
أملها تشوف لك عيل
والرد يا امى لا يمكن
والراس غطاها الطين
يا افرح وانا راسى لفوق
يا بلاها فيلم جواز
لفيت ع الوسط علمنا
وكتبت عليه بحروف
وبروجى بصوته يلعلع
يضرب نوبة صحيان
يترص طابور وصفوف
والشمس تركز نورها
وتدوب من نارها سحابة
إصرار ف القلب مصمم
يا حبيبتى طالعلك شمس
وأخيرا وصل الأمر
فى الودن بيهمس همس
وفى صدرى قلبى اتنطط
الفرح خلاص يا قنال
اليوم ده ولا ع البال
اليوم ده إسمه عبور
عدى واعملك همة
هيادى أى مهمة
أول خطوة للقمة
بإيديك اتعلق نصر
من عين الآلى ف إيدك
هيطل عليتا الفجر
والقافية ف إيدى تزهزه
وتلين للسانى حروف
والندر لربى ندرته
هدبح عجلين وخروف
وكتيبتى هتحضر فرحي
والرقص ع المكشوف
طيران والضرب بقوة
ورصاص طلقات وبارود
وقوارب فوق المية
وجسور دشنها جنود
والأرض للحظة ووقفت
تنهار خرافات وسدود
والشمس تعلى شعاعها
المصرى مالهش حدود
أرواح شهداءنا تزغرط
المصرى فاق يا جدود
والنصر راياته ترفرف
والأرض تملى تجود
وملايكة ربى هتشهد
المصرى مالهش حدود
سامح لطف الله
