طبق كشري


شغلي كتير و يهد الحيل
بعد اللقمة طواني الليل
رحت ف دنيا ما حسيت بيها
موجة شايلاني وراكب سيل
والسيل كانس كل كبير
جارف صخر وهات تكسير
نضف كل الدنيا ف ثانية
وبعد ما يهدي جاب الخير
ارض اخضرت هاتوا الكيل
نزرع صبح ونجني ف ليل
كله بياكل ما في حرمان
حتي المية صارت نيل
فقت شوية صحيت م النوم
مراتي بتنادي عايزة التوم
يلة بسرعة هنعمل كشري
بطل كسلك ضاع اليوم
عدس بعشرة يا عيب الشوم
ورز بخمسة و كمان توم
ارخص اكلة تفضي الجيب
جف النيل ولا احنا ف نوم
شد لحافك و احلم تاني
شغل راديو اسمع لأغاني
اوعي تمد ايديك للكشري
لحسن يخلص نطبخ تاني

كمالة
عدس وتوم جايين م الصين
بنص السعر يا نور العين
ضاع الطعم و اصبح شين
ومصر يا عيني رايحة لفين

سامح لطف الله