أنا وبلادي بنحبك


حبيبي الورد في خدك
وفي الدنيا مفيش أدك
وقلبي ليك ما حد معاك
وساكن فيه كده لوحدك
***
شربت الحلو من مرَّك
ونفسي الدنيادي تسرَّك
وبدعيلك وقلبي معاك
غرور الدنيا مايغرَّك
***
بحب النظرة من عينك
تغيب عني أقول فينك؟
توِد القلب يصفالك
تطير الروح بيني وبينك
***
يقولوا عليك خلاص باعني
غرام الدنيا ما يساعني
ولا يساوي نيران حبي
لِليلة معاك هتجمعني
***
بحبك يا حبيب روحي
يا بلْسم قلبي وجروحي
وفين هتروح وفين تيجي
هتمسح دمعتي ونوحي
***
بحبك لما نتواصل
وفي ميدانا بنتواصل
ونهتف عيش وحرية
ولابينا خلاص فاصل
***
بحبك ثورة في دمي
ببركانك يزول همِّي
ولما يغضبك دلعي
ولمَّا تقولِّي إتلمِّي
***
بحبك لمَّا بتقيَّر
ودم الوش يتغير
تحاسبني علي غلطة
بنظرة ولفته بتحيَّر
***
وحب بلادي علي قلبك
بيرفع في القلوب سهمك
بحبك إنت يا أملي
أنا وبلادي بنحبك


سامح لطف الله