نفسي مره لو تصيب
ييجي النصيب
واكسب ف سحب اليانصيب
مليوون دولار
دول مش كُتار
دي العيشه نار
ود مش هزار
مليون دولار
أدخل بهم جنة بلادي
مالجنه دي
يادوب بيدخلها الكبار
أما الصغار
مبروك عليهم الانتحار
علي الرصيف
او م الرغيف
أو الانتظار
حتي ف حروبك يابلد
دم الفقير هو المدد
والأغنيا هما يادوب
يجنوا الثمار
أما الفقير
فمايلاقيش تمن الكفن
واللي اندفن
عايش مع زميله اللي عايش
في مقابر للإيجار
علشان كده
مليون دولار
لو جُم يادوب
يبقوا السند
أصل البلد
اللي معاه
بتكون معاه
تتبع خُطاه
ويكون هواها
علي هواه
اما اللي حظه مادالوش
ومامعاهوش
فمالوش بديل
غير الانتحار
علي الرصيف
أو م الرغيف
أو الانتظار
