امين

يا بوحميد

استاذ حاتم . أولا شاكر جدا لردك واهتمامك بمجرد الرد .

..لكن لى بعض التعليقات اذا سمحتلى ..

وبجد انا فى قمه سعادتى انى لقيت حد اتناقش معاه بدون الاتجاه الى العصبيه فى حوار اتمناه هادف بااذن الله الى ما فيه الخير.

انا لما قلت انا معاه ان اقنعنى .حضرتك بتقول انى بعيد طيب نتكلم بالعقل .. هل يجرؤ شخص ما ان يجلس مع محى ويقله انا مش معاك واقنعنى بيك ؟؟؟
أعتقد انت عارف ردود الأفعال من فئه الهمجيه هتكون ازاى .دى وصلت مشكلتنا اننا اصبحنا .فى شباس بنتكلم بمبدأ ..حريه الرأى غير مكفوله لأحد لأن اللى بيظهر فى العلن ينتمى لفئه أخرى بيكون النظر له نظره المرتد وليعاذبالله.
يمكن كلامك لانك بعيد عن الشارع يااستاذ حاتم .

سؤال ...كل مرشح فى الكون يتبعه جميع الفئات ... ليه حضره النائب من الاشخاص اللى تتبع فتره الدعايه له .المشاكل والخناق وأوقات كتير تصل الى الدم؟
اجابتى الشخصيه عن قناعه .... لانه شخصيا كل اللى يهمه عدد اصوات لا اكثر .لا يمتلك الشخصيه القياديه بالمعنى الواضح لها انه يكون له التأثير على اخلاق مناصريه . هو للأمانه واشهدله انه ذو تأثير ماشاء الله على العقول . واعتقد انه شتان بين الاتنين .تأثير على عقول وتأثير على اخلاق .
عموما ما علينا من النقطه دى .

هفنط كلامى القادم فى نقاط خفيفه وأتمنى تجاوبنى بحياديه بشهاده أمام الله ..

1... محى القطان فى الدوره الأخيره .بلاش نقول اللى فاتت ... لكن هنتكلم فى الحاليه .. ظهر فى شباس عمير كام مره ؟؟؟
..للأسف فى المناسبات فقط .وطول الفتره بعيد عن اهله اللى هو بيطالبه يناصروه .هتقلى مشغول . هل ده حال كل اعضاء مجلس الشعب؟؟؟

2... محى القطان وعن معرفه لصيقه . الله يرحمه الشيخ فتح الله لم يترك العمارات ولا الاراضى ولا الاطيان . محى بكشف حساب الأن واتحدى ان حجم ثروته تعدت الملايين . من أين له هذا؟؟من راتب مجلس الشعب اللى على حد علمى تفاهات ؟عارف ان النقطه دى ليس لى التطرق اليها ولكن احنا بننظر لشخص هيمثلنى ويمثلك ويمثل بلد كامله . يعنى لازم تكون النظر والحكم شامل حتى من الناحيه الاخلاقيه .

3.. مشروع الصرف على حد معلوماتى المتواضعه .ان المشروع ل 26قريه على مستوى المحافظه ليه شباس اصبحت اخرهم .ولا التأخير كان متعمدالى قرب الحمله الاعلاميه للدروه الجديده؟؟؟

4... ليه كل اللى بنشوفهم بيتوظفو او نقول معظمهم .. من الاعيان واصحاب العائلات الكبيره .هو مبقاش فيه غلابه فى البلد ؟ولا لازم اللى بيتوجع يقول اااااه بأعلى صوته والا يتهم باانك مشتكتش.

5.. حضره العضو . تناسى تمام الناحيه الاجتماعيه . بمعنى . عمرك شفت حضره العضوراضى حد زعلان منه او اتنين اخوات حرموا بعض بسببه او واحده اتطلقت من جوزها علشانه او صاحب ضرب صاحبه ...الا قبل الانتخابات بفترات بسيطه ؟يعنى الغرض واضح .وكأن لسانه حاله بيقول انا عاوز الكل بعيد عنى ميلزمونيش وقبل الانتخابات هلف لفه اراضى الكل .وللأسف اهل شباس طيبين .

6 .. موقف حصل أدامى شخصيا وأقسم بالله العظيم انى صادق فى كلامى ومن يوميها نفسى اسأله ليه يامحى عملت كده ؟كنت خاطب واعتقد السيد عطاالله كان حاضر الموضوع .نسيبى عمل حادثه راح مستشفى طنطا .السيد مشكورا لأنه صديق مقرب ليا وأكثر من أخ . اتصل بحضره النائب .يبلغه بمدى سوء الحاله . للعلم.رجليه كانت بايظه كلها والعظم مدغدغ . شوف بقى اللى حصل وقلى انت الحكم بعدها .
العضو مشكورا جه الى مستشفى طنطا ودخل للمدير والازم اتعمل . ظهر أدام كل الحاضرين ودول كانو عشرات المتواجديدن من الأهل والاقارب مظهر البطل اللى حضر يلبى نداء استغاثه .
لكن اللى حصل بعد كده كان خلف الكواليس للأسف لم يراه غيرى .
بعد اسبوع تقريبا كان المفروض ان حد يروحله البيت يديله ورق القرار عشان يخلصه .وذهب نسيبى المصاب محمولا من قبل اخين .الى بيت حضره العضو. والمفجأه .الكلام اتغير تماما عن كلامه فى المستشفى ...
الباب اتفتح حضرته نازل بعد اكثر من ساعه انتظار .كلامه موجه الى المريض العاجز ... بنفس اللفظ .... انتو مش عاوزين تبعدو عنى بقى ..انا مش عامل لحد حاجه .
صابتنى حاله من الذهول وكأنى لامست سلك كهرباء اكتر من الفين فولت .

اقسم بالله للمره التانيه انى صادق فى كل حرف قلته . بعد ده يبقى ايه يااستاذ حاتم ؟؟؟
للأسف .كل ندمى الوحيد انى غصب عنى ذهبت له برغم رفضى المسبق ولكن حاله المريض استدعتنى ادوس على كرامتى الشخصيه .لان ببساطه حاله كانت تصعب على الكافر.
من باب العلم بالشئ ... انا بنفسى بعد كده جريت فى ورق القرار وخلصته الحمد لله .
تيجى تتكلم بقى مع حد وتقله الباشا عمل ايه؟؟يقلك .. بيعمل قرارات علاج ويجيب حالات الوفاه ..وكأن دى بقت المهام الوحيده المكلف بيها عضو مجلس شعب .
عارف هتقلى انه الضغط عليه كبير والطلبات كتير . اظن ان اى نائب لازم يكون عارف حجم المسؤليه اللى على اكتافه . مش يكون الوضع .ان حضره النائب راح وحضره النائب جه ..والا هو ليه داخل من الاساس اذا كان عاوز يرتاح وميتعبش روحه بطلبات الناس الغلابه.

انا تطرقت ل اشياء ربما الكثيرين لا يمتلكو الشجاعه لذكرها ولكن احنا بنتكلم بالتزام بأداب الحوار ولم نتطرق الى اى عصبيه او مشادات لكن من حقى اقول مساوء شايفها .

طيب اقترح حاجه صغيره وتتقبلها ؟؟مع انى واثق مليون الميه انها هتلاقى الرفض..
انا ذكرت انى ضد محى القطان ولكن ليس معناه انى مع شخص بعينه .وللأمانه مازال بحثى جارى عن شخص تقنعنى افعاله قبل كلامه .يعنى مش لازم اقعد معاه .
وبما ان المبدأ لدى الكثيرين ..عاوزين واحد فئات من البلد ...
طيب عندنا اتنين مرشحين حاليا على حد معلوماتى .
ليه ميتعملش مناظره بين الاتنين كل واحد يعرض برنامجه الانتخابى .
وبعدها نشوف مين كلامه هيعجبنا ومين يتمتع بثقافه الحوار اللى نقدر نقول انه يكون ممثل لينا .
على شرط المناظره تصور فيديو . ولا يحضرها الشباب . الحضور يكون افراد معدوده من اصحاب العقول المستنيره .تفاديا للهمجيه فى المناظره .
مع تعمدى لفظها بلفظه المناظره .

وبكرر انا مازلت غير معلوم الاتجاه الى الان .لأن مبدأى هو شخص خلوق قبل اى اعتبارات اخرى .شخص يجبرنى على احترامه ليس بااقوال او شعارات تقال فى مؤتمرات .ولكن بمواقف وافعال .

وفى الختام .خالص ودى وتقديرى للجميع .وشكرا استاذ حاتم على سعه صدرك.واسف بجد على الاطاله .وان كانت القائمه بكل اسف مازالت مليئه ولكنى ذكرت ما يحضرنى حاليا فى الذاكره .

السلام عليكم

الاخ المحترم / خالد القطان
اقبل تحيتى....

اسعدنى اكثر اسلوبك الذى وان اختلفت معك على بعض النقاط لكنى احيى فيك اسلوبك الرشيق المهذب الهادف.

اولا يا اخى وعن قناعة شخصية محى القطان مستعد لأن يجلس مع اى شخص وان يوجه له هذا الشخص ما يشاء من اسئله او اراء وهذا يا صاحبى اضمنه لك لأنها حدثت فى الانتخابات الماضية وجمعنا الشباب كل يسأل ما يحلو له ويوجه ما يشاء من انتقادات وكان محى يجيب بسعة صدر والخيار الاخير للشخص نفسه سواء اقتنع ام لا ثانيا لماذا تصر يا اخى انى بعيد عن الشارع وما يحدث به
على العكس تماما اعرف ما يدور على الساحة وما خلف الكواليس واجلس وسط الشباب يوميا كما ذكرت سابقا واجلس مع الكبار لأنهل من خبرتهم وارائهم.

بالنسبة للصرف الصحى
كما ذكرت سابقا شباس عمير القرية الاولى على مستوى المحافظة التى يتم تشغيل فيها مشروع صرف صحى متكامل من خطوط انحدار ومحطات رفع ومحطة تنقية على احدث مستوى ستستوعب ان شاء الله هذا العام ما يزيد عن 40فرصة عمل وتعالى يا خالد وانظر بنفسك ان قلين البلد اللى تعتبر مدينة لسه شغاله لحد دلوقت على مشروع خفض مياه جوفيه ومحطاتها وشبكاتها الجديدة لسه قدامها وقت.
وبعدين شباس مش عزبة صغيرة ولا بلد عادية شباس بلد كبيرة والمشروع خد فيها وقت للتخطيط والتنفيذ هذا يا اخى ما اعلمه على الاقل من خلال عملى ووظيقتى

بالنسبة يا اخى لفكرة المناظرة
اعتقد من خلال فكرى المتواضع ان ان المناظرة بتكون بين اتنين مرشحين متقاربين فى الشعبية والناس مش عارفة ترجح كفة حد فيهم فبيعملوا المناظرة علشان يقربوا فكرهم اكتر للناس
لكن الوضع فى شباس يختلف وهو ان النائب الحالى معاه الاغلبية المطلقةوعلى الطبيعة وشباس معاه ويتأيده يبقى اظن ان المناظرة دى مالهاش لازمة.
وانا كنت اول واحد هأيد المناظرة لو كان فيه حتى شبه تقارب فى الشعبية لكنها محسومة ان شاء الله داخل شباس.
وكما ذكرت قبل كده يا خالد محى قال بنقص عضوية مجلس الشعب ان كانت هتتسبب فى جرح اى حد او جلب المشاكل .
انت ذكرت يا اخى ان محى تناسى الناحية الاجتماعية............ بالعكس والله انا بس مش عايز اذكر اسماء بس اللى متأكد منه ان محى عايز اصغر طفل فى شباس يكون راض عنه.

والله الموفق

واقبل وافر تقديرى

يااستاذ حاتم .مع كامل احترامى وتقديرى لشخصك الكريم . ولكن ان لم تخنى ذاكرتى عن مناظره محى الدوره الماضيه واللى اتذكر انها كانت امام بيتكم تقريبا .من غير اللائق للأمانه اننا نقول انها كانت اى شئ وليس لها علاقه لا من قريب او من بعيد بالشباب .لان فى اليوم ده انا كنت حاضر وكان من المفترض انها هتكون بالمعنى البسيط او الشعبى ...قعده بينه وبين الشباب . فوجئت انا شخصيا باأعمار تجاوزت ال60عاما دول كانو شباب؟؟؟ ولا زى مبيقولو الشباب يبدأ بعد الستين . وغير كده انت نفسك يوميها شفت . لما احد الأخوه وجه سؤال قد يكون صعب الاجابه عليه بالنسبه له تهرب من الاجابه واهتاج الجميع من انصاره .اذا كانت الفكره منظمه نوعا والغرض منها مؤتمر شعبى وليس جلسه مع الشباب . عشان كده انا لما بقول بلاش شباب لانى عارف اللى بيحصل فى الحالات دى .
ثانيا انت بتقول الشعبيه ...اولا اقسم بالله انا معرفش الطرف التانى فى الانتخابات شخصيا ولا ليا اى انتماء له الى الأن لأنى ذكرت مازلت لم أجد من يقنعنى .وكلامى مش عن شعبيه . والا اذا كانت محسومه فى شباس زى منته بتقول يبقى كلامنا ده ملهوش اى لازمه .
وبعدين احنا بنختار الاصلح اللى يقنعنا اللى يوعد ويوفى .اللى نتفق عليه كلنا . لكن تقدر تقلى لأمتى هنفضل كل واحد فى وادى ؟؟
ومع كامل احترامى ليك بكررها ....... منين جبت كل الثقه دى بضمان الاغلبيه داخل شباس .. مع انى أرى العكس للأمانه .
يمكن نظرتى من بعيد عن محى تختلف عن نظرتك من قريب بمعنى .. انت عشان قريب شايف كل اللى بيسلم عليه مثلا يبقى بيحبه ..انا بالعكس ..شايف كتييييييييير جدا من اللى بيسلمو عليه اما خوف او نفاق ..المعظم وليس الكل.

عموما ..ما علينا ...

لكن لى بعض الأسئله اذا تكرمت بصفتك من المقربين او على حد قولك لك الوصل انك تقعد معاه ....

.... لما قالو كل عضو مجلس شعب تابع للحزب الوطنى جاب 250الف جنيه .عرفنا من الجرايد والاخبار ان المبالغ دى نازله لخدمات عامه و دعم الحمله الصحيه اللى كانت نزلت ..فوجئنا فى شباس يحدث اشياء مغايره تماما لما اعلنته الحكومه . وهى ان بيتم توزيع 50جنيه لكل فرد .
اعتراضى هنا مش على سياسه التوزيع فى حد ذاتها اعتراضى على مين استفاد .بالفعل فيه غلابه استفادو فعلا بخمسين جنيه ,لكن لو تحب اذكرلك اسامى استفادت باألوفات وهيا ماشاء الله كما نقولها من الاعيان ... ده يبقى العدل يااستاذ حاتم ؟؟؟
لما قالو قصه ال12مليون وامن الدوله وتحريات وقرارت علاج وخلافه .. تقدر تقلى ايه اللى حصل؟؟؟ أقلك انا ..لمو بطايق الغلابه عشان يثبتو عدد حالات .
الناس بكل تلقائيه وطيبه . افتكرت انهم بيلمو بطايق عشان يوزعو فلوس تانى .بقت الناس بتتخانق على اللى يودى صوره بطاقته ..ده يبقى العدل يااستاذ حاتم ؟؟؟العدل انهم يغلط وانت على يقين بده وندارى غلطه ؟؟؟

لما تلاقى اكثر من 90% من قرارت العلاج اللى هو جابها واتقدمت فى تقرير أمن الدوله ..كلها كراسى معاقين .فى حين الواقع مغاير لده ..ده يبقى العدل يااستاذ حاتم .؟؟؟؟

لما تبقى فى بلدك مكتوم الصوت وخايف تقول كلمه لتتحسب عليك يبقى ده العدل يااستاذ حاتم؟؟؟

لما بلدك تلاقيها فجأه اتحولت لساحه حرب ابطالها الهمج والبلطجيه واللغه المعتمده لغه السلاح والدم والصوت المسموع صوت اللى صوته أعلى . وكل عضو بيحاول يجمع اكبر كم من شباب الشوارع أسف فى اللفظ ...العواطليه اللى هيتخانقو ويولعو ....يبقى ده العدل يااستاذ حاتم ؟؟؟

سؤال شخصى ليك يااستاذ حاتم . وبالله عليك تجاوبنى عليه بكل صراحه ..

انت راضى عن الحكومه ؟؟وبتكلم عن الحكومه ككل .. بمعنى أدق .حكومه نظيف ..وبرنامج انتخابى للريس لم يكتمل الى الأن منه ولا 5% حتى .انت راضى؟؟؟راضى عن ضرايب ؟ وروتين عقيم ؟واسعار فى السما؟ووظائف متوفره بالواسطه ؟ واقسام شرطه عباره عن مجازر؟راضى؟؟؟
لو كانت الاجابه نعم ..يبقى من حقك تقتنع بعضو من انصار هذا الحزب ومن ابرز شخصياته . لو كانت الاجابه لا ..يبقى انت بتناقد نفسك .واعتقد انت هتفهم مقصودى من كلامى ...

أقسم بالله العظيم يااستاذ حاتم انى اتمنى انه يكون كويس ومش بكرهه .عشان كلامى ميتمش اخذه بمحمل التعصب . لكن انا وضحت . انى يهمنى .عضو مجلس شعب ..على خلق .فى المقام الأول وملتزم بوعوده على المقام الثانى.

طيب هقلك كلمه ممكن تكون أول مره تصدر منى لمخلوق لكن بقولها على الملأ .لو عبد العزيز فتح الله اللى مترشح انا معاه . لانى عارف كويس انه شخص احترامه يفوق الوصف . ومهذب جدا مع الكبير والصغير ..من هنا المنطلق ... شخص يحترم الجميع العدو قبل الحبيب .. بالمعنى الشعبى ده يكون فيه الخير.

لما طلع بعد صلاه الجمعه وقال مش هترشح .تقدر تقلى كان المقصود بكده ايه؟؟؟انا محضرتش الموضوع لانى كنت فى سفر لكن وصلنى التفاصيل . بس اللى افهمه حاجه واحده ودى يراها الأعمى المقصود حاجه من اتنين ..
اما كسب عطف الجموع وبرهنه انه لا تعنينى العضويه .
او محاوله منه لتقييم الوضع .يعنى كان المفترض حدوثه خروجه من المسجد محمولا على الاعناق .صح كلامى ولا انا غلطان ياااستاذى الغالى ؟؟

اصل بديهيا انا مش عاوز اترشح فدى سببها ..

اما انى شايف ان شعبيتى قلت . وفى الحاله دى الطبيعى احافظ على كرامتى الشخصيه . وابعد فى صمت .

او انى مستغنى واستكفيت .وفى الحاله دى . مطلوب مننا الندم على مناصرته .

او انى تعبت من خدمه الناس . ودى برضه يبقى مينفعش نناصره . لأنى قلتها قبل كده عضو مجلس شعب . دى فى حقيقتها تكليف وليس تشريف يعنى اللى داخل عارف انه هيشيل حمل مش أده دى تبقى مشكلته مش مشكلتنا .الناس غلابه يااستاذ حاتم .

فى فرح فى البلد من يومين او تلاته . حصلت مشاداه كان سببها احد انصار العضو المنافس مع احد انصار محى فى وجوده طبعا فى الفرح . والفرح كله اهتاج لمجرد حركه طفوليه من شاب عمره قد لا يتجاوز ال19عام .

ما علينا لكن غالبا انت كنت موجود ..وشفت القصيده اللى اتقالت بعد كده من أحد ابائنا المحترمين بدون ذكر اسامى .دى كان المفروض تتسمى نفاق ؟ ولا تأكيد ولاء وطاعه ولا ايه بالظبط ؟انا لو مرشح ذو تفكير رشيد .كان موقفى كالتالى للأمانه همسك المايك وهدى اللى اتعصبو بكل حب واخاء . وبدون ذم فى الاخ اللى عمل المشكله . وفى نفس الوقت أأكد انه فرح ومينفعش نبوظ للناس فرحها .هل ده حصل؟؟طبعا لا اللى حصل شويه نفاق على شويه بلطجه مش أكتر من كده ..من بعض الانصار..

وجهه نظر أخرى ...قد يكون محى فى شخصه مش وحش .لكن وحاشته فى بعض انصاره ...وتصرفاته مقابل افعالهم .
بمعنى .. خلى واحد ابن حلاال مثلا قابلنى فى الشارع ضربنى وادينى بضرب المثل على نفسى برغم انها حصلت كتير جدا ... لكن فرضا واحد ضربنى وانا مثلا مش معاه .
حصل ان بوكس خدنا احنا الاتنين .مين هيطلع ومين هيبات ؟؟؟؟؟جاوب بصراحه يااستاذ حاتم مع العلم انها حصلت قبل كده كتير ولو عاوز امثله بالاسماء اذكرها . وقد يكون التابع له هو المخطئ .
ممكن يكون تصرفه بتلقائيه لكن تصرف يحرض اكثر على العنف . مهو انا بقى مطمن الباشا هيطلعنى لا ده انا هولع واموت براحتى . صح ولا انا غلطان ؟؟
طيب ميخلى اللى يغلط ياخد جزاءه .
شفت بقى ان رجعنا لسياسه العزل والفئات اللى اتكلمنا عنها قبل كده .

انا عضو مجلس شعب مفيش حاجه اسمها مش ذنبى ..
انا مسؤل على الاقل امام الله . عن أخ قاطع اخوه بسببى .
عن ست اتطلقت بسببى.
عن شخصيات محترمه اتهانت بسببى .
عن شباب ضايع وعاطل بسبب اهمالى له .
عن بلد ودايره كامله تحولت الى حرب عصابات بسبب بعدى عنها .

هقول شهاده حق أمام الله ..
محى القطان سياسى مخضرم وعارف لعبه الانتخابات كويس وازاى ينجح دى محدش يقدر ينكرها .لكن بكل أسف مش عارف لعبه ارضاء الله عز وجل فى كل من هو مسؤل عن رعيته .

لقى ان الصوت الأقوى فى الانتخابات .ولعبتها ..هى..

تظبيط من فوق ...عشان الحزب . يبقى ضمنا الحكومه وبقينا قرايب مشمهم بقى اظبط باأى طريقه ايا كانت .المهم اسند نفسى من فوق.

واظبط قيادات البلاد المجاوره عشان اضمن فيها عدد اصوات .

وارجع اراضى البلد قبل الانتخابات بشهر ولا اتنين . ودول غلابه طبله بتجمعهم . ومسيره بتلم شملهم مقدور عليهم .

عرفت اللعبه يااستاذ حاتم ؟

عمرك شفت محى القطان طلع من ماله الشخصى وهو ماشاء الله ربنا يباركله . عمرك شفته طلع من جيبه وادىلفقير محتاج؟
عمرك شفته وظف غلبان مش لاقى غير يوميته لو تعب يوم وريح من الشغل بينام جعان ؟
عمرك شفته دور على رضى ربنا عز وجل بدون هدف عدد الاصوات

عموما انا بعتذر لو كلامى كان فيه اى اساءه لأى شخص .

لأن ربنا وحده يعلم انى بحترم الجميع الكبير والصغير والمثقف والبسيط . لأن كلنا اخوات . حتى مع وجود اختلاف فى وجهات النظر .لا انا اقدر استغنى عن اهلى واصحابى ولا العكس .
وأكبر دليل صداقتى باأخويا ابو محمد الغالى ولى العهد الجديد .... السيد عطالله .برغم اختلاف كامل ما بينا فى الانتماءات لكن الصداقه تدوم .

أخيرا وليس أخرا . اتمنى مكنش ضيف تقيل عليكم وبعتذر عن الاطاله .

خالص ودى واحترامى وتقديرى للجميع .

شكرا خالد والله ما قصرت

اه ياعم حسام اه الاخبار تمام

صح لسانك يا خالد والله كلام جميل جدا وياريت الناس تفهم اللى انت كتبته وانا اتفق معك فى الموضوع كلى وجزئى وانا طرحت فكرة الحوار دى من زمان (المناظرة ) وللحديث بقيه

الاخ حاتم
السلام عليكم
ذكرت اشخاص من البلد نكن لهم كل احترام وتقدير
ولن اتحدث عن اي منهم غي اللي يخصني
الاستاذ عبدالقادر الجرن
للمعلومية الاستاذ عبدالقادر في خط محي من يوم ماقوالو انتخبات او عضوية مجلس شعب من ايام المرحوم الشيخ فتح الله القطان
تقدر تقول للاستاذ عبدالقادر ماهي الفائدة اللي انت حصلتها من وراء هذا الخط
خدمت واحد في عائلتك عن طريق هذا الخط
الاجابة والله لا محي ولا الشيخ فتح الله خدم اي شخص في عائلة الجرن
اذا ماهي الفائدة من هذا الخط
قول مصلحة عامة ولو تعمل مصالح للغلابة اكيد هتعود بمصلحة عامة
انما المصالح للعائلات الكبيرة فقط
فالاستاذ عبدالقادر ليس من عائلة عصر او القطان او الحشاشين
عشان محي بيه يخدمة او يخدم احد من عائلته
اذا النتيجة ما مفيش فائدة ان نسمع كلام الاستذ عبدالقادر ونمشي وراء واحد كل همه فقط مصلحته ومصلحة العائلات الكبيرة فقط دون النظر لمصالح الغلابة او المصالح العامة
واذا كان الاستاذ عبدالقدر لم يقتنع بعد بعدم فائدة محي القطان فنحن لدينا اليقين بعدم نفعه وكل انسان حر في اختيار من يمثله فلا تفرضوا على الناس ارائكم الغير مقنعه للاطفال مش اناسا متعلمة ومثقفين

احيك استاذ شريف

بنضيف حاجة انصافا للحق
تم امس احالة سبع اعضاء للنائب العام في قضية قرارات العلاج
خمسة خزب وطني و اتنين اخوان
الخمسة 2 من البحيرة 3 من القاهرة والجيزة
وكدة الكابتن محي مش فيهم وبرده بناكد
نحن ضد محي الدين فتح الله القطان

كلهم خانوك فـ لحظة

وسلموا راسك لجلادك بلاش

ما تسيبش للريح البلد لتبعتره

واثبت فـ طينك بالقدم ما تهزهاش

وإن طلعوك م القبر

دقنك شبر

منكوشة

وعينك ننها بيشوف طشاش

خليك جدع واثبت على المبدأ

وموت وحدك ولا تهنشي

من مات وراسه في السما يا حبي عاش

أنا مش معاك في كل حاجة عملتها

لكنّ اسمك أعرفه

أما اللى جاي ليها

ما يتسماش

صباح الخير ياجماعه . معلش احنا صحيح بعد العصر لكنه الصبح عندى .لأنى يادوب لسه صاحى من النوم .
محدش يستغرب .من انى صاحى متأخر أوى كده .الغريب بقى انا نايم الصبح

بس للأسف لا كنت بعد النجوم ولا قاعد بفكر فى اللى ناسينى ولا أعمل اى حاجه مفيده غير انى للساعه 8الصبح بحاول احضر للماتور عشان الميه وللأسف برضه مجبش ميه . نطلع بقى دلوقتى نشوف تكتك نملى جركن نشرب منه وياعالم هنلحق الميه بكره ولا هنموت من العطش .

معندكش حل يااستاذ حاتم او وصفه سحريه من حضره النائب يخلينى اتعلم اصحى بدرى ؟؟؟ قصدى الاقى ميه اشرب؟

على العموم يأستاذ خالد ممكن نعمل مكرر أو ندق طرنبه ذي ايام زمان

ونجمع أهل البلد علشان يشربوا منه

ولانائب ولاحاجه

هاهاهاهاهاهاها تصدق فكره يااستاذ فتح الله .بس فيه مشكله صغيره ..

احنا هنعمل طرنبه واحده للبلد كلها ولا كل بيت طرنبه ؟؟؟

لو طرنبه ميه واحده للبلد كلها يبقى المشكله مازالت قائمه .

انا بقول يبقى شعارنا فى المرحله القادمه ... طرنبه ميه لكل مواطن .

هاهاهاهاهاها وعلى رأى المثل .اللى يتلسع من الشوربه يتصل بالمطافى

ههههه لا والله حلوة اوى طرنبه لكل مواطن دى يا استاذ خالد بس يا ترى طرنبه لكل مواطن عشان يشرب منها ميه ولا عشان يعرف يمشى فى شوارع البلد مالمجارى اللى طافحة ولا يعرف يمشى بيها فى الشتا

قشطة

مع احترامى لجميع الاراء وجميع الاعضاء انتو فكريين الراجل الى جاء واتبرع لمدارس الازهر فى شباس كان اسمه صلاح عطيه لا كان عضو مجلس ولا غيره ولكن كان بيتاجر مع الله ليه ميكنش فينا 100 صلاح عطيه يسازى فى نظرى 100000 عضر مجلس شعب
ملحوظه الى ما يعرفه يسال عنه

والله يااستاذ خالد مشكلة مية الشرب عمومية والله انا بكلمك دلوقت الساعة 10 بالليل ولسه واصل الشغل حالا وكل ليله على كده ومروح امبارح السعة اتنين بالليل وده كله علشان فيه ازمة فى المحافظة كلها وفيه لجنة ظوارئ مجتمعة على طول ليل ونهار .
وفيه فريق صيانه يقفل الميه على بلد معينه او مجموعة بلاد لمدة 6 ساعات مثلا ويرجع يفتحها ويقفلها على بلاد تانية لاننا فى الوقت ده فى شهر سبعة اوقات ذروه ووكل يوم بيتبنى محطات جديدة وبرده مش مكفيه .
بس صدقنى فيه بلاد بتنقفل عليها الميه باليومين الا شباس لها وضع خاص والميه ما بتنقفل عليها صحيح ممكن نقلل الضغط شويه بس ما نقفلوش خالص.

بس عايز اقولك اننا كنا فى شارعكم الاسبوع ده يوم السبت اللى فات تحديدا وكان والدك معانا وفيه مشكلة ميه فعلا فى الشارع ده على وجه الخصوص لأن الوضع الطبوغرافى لشباس قلب البلد زى الرحبه والجسر والنواحى دى اعلى من اطرافها فدايما يحسوا بمشكلة الميه اكتر من غيرهم
عموما اتوصلنا لحل هييجى خط 6 بوصة من المشروع لحد الجسر بطول 515 متر ويرجع يدخل من الجسر لحد جامع النقطة بطول 260 متر علشان يحل المشكلة فى المنطقة دى ويكون التنفيذ خلال الشهر ده ان شاء الله

طبعا نعرفه يا استاذ يا استاذ محمد الدكتور صلاح عطيه عمل جامعة تفهنا الاشراف من الجهود الزاتيه من خلال جمعية تنمية المجتمع المحلى ولكن الراجل لما اشتغل اول حاجه عملها انه خلى البلد عيلة واحده تسمى الاشراف وعمل جمعيه بفكرة الاستاذ خالد تقريبا وكل واحد بيساهم فيها حسب دخله حتى لو كان هيدفع جنيه واحد واشتغل بنظام الخطة الخمسيه وابتدى بمشروع تربية دواجن بتخصيص 20% من الربح لبيت مال المسلمين وفى الخطة الخمسية الثانيه اصبح مشروع الدواجن عبارة عن مصنع اعلاف ومجموعة مزارع دواجن ملك لاهل القريه وانشا كلية الدراسات الاسلاميه فى القريه من الجهود الزاتيه والا ن على حد علمى اصبح فى القريه خمس كليات ازهريه اتمنى ان يكون فى بلدنا مشروع مثل هذا لان فعلا ان الله لايغير ما بقوم حتى يغيروا ما بانفسهم الموضوع مش مجلس شعب ولا غيره لو عاوزين فعلا نعمل حاجه يبقى لازم احنا اللى نتغير الاول تحياتى لحضرتك وتقبل مرورى

قشطة

السلام عليكم
الأخ / محمد الكاشف
أحب أطمنك و أطمن الأخوة الأفاضل إن فيه أفكار و دراسات لمشروعات صغيرة و متوسطة موضوعة و مدروسة بشكل علمى تناسب و تخدم الوضع الحالى فى البلد .
بس مطلوب من حضرتك توضح آلية تجميع رأس المال و بسرعة لو تكرمت .
مع دعواتى بالتوفيق و السداد

اسعدنى جدا ما قراته من الاخ القاضل الاستاذ محمد عز العرب والاستاذ محمود سعد
اولا فى بدا ية الامر محتاجين مجموعه من الشباب داخل البلد ويكونو على درجه عاليه من الثقه طبعا ودراسة مشروع معين وكم تبلغ تكلفت المشروع
ثانيا نقوم بجمع التبرعات كل واحد على حسب مقدرته بعد اشهار المشروع والموضوع على جميع المغتربين مثلا انا مقيم فى مكه ويوجد فى مكه اكثر من 15 شخص من شباس ساكون مسؤال عن ابلا غهم بالموضوع وجمع التبرعات منهم وغيرى يقوم بنفس الشى كل واحد من مكانه

كلامك تمام يا مهيا ولكن ضع نفسك مكان حسام
ستفعل الاتى * غضب /زعل/ مقاطعة /واكثر من ذلك
فى سبيل مصلحتك فقد يابو حميد الضمير مش تمام ولو ضمائرنا صادقة مع انفسنا لما تحدثنا فى هذه المواضيع بهذه الطريقة
ولكن الواضح امام الجميع ان من لم ينال مايريد من هذا العضو ينقلب ضده ليحصل على مرادة مثلما فعل (اقرباء حسام) 0
متزعلش ياحسام ولكن الواضح انك تبغى مصلحة
على فكرة ابومهيا تم تعينة بهذة الطريقة اللئيمة
ياحسام عيش حر تحير الكل
وعلى رأى المثل (أقلب القربة على فمها تطلع البنت لامها)

الاختلاف فى الرأى لايفسد للود



الحر/محمد قطب

بسم الله الرحمن الرحيم
(وقل اعملوا فسيرى الله عملكم )
انا سعيد جدا بالانضمام الى هذه الباقة الجميلة من ابنا اهل شباس عمير المثقفين الذين يسعون من اجل مستقبل بلدنا الغالى لكن هل يفيد هذا الكلام محدش يزعل منى انا بحب بلدى جدا لكن احنا اتفقنا على تغير مستقبل البلد نحن المثقفين لكن اهم نقطة هى المواجهة والتعبير عن الراى صوت وصوره حيث يشعر المسئول بالقلق احنا لهذا اليوم عاجزين على فهم هذا العضو والعيب فينا مش فيه انا دايما مع الحق وعلى فكره انا مش موجود فى مصر حاليا انا مهندس خارج مصر لكن لازم نعطى فرصة للمواجهة ان لم يستجيب لمصلحة هذا البلد بعد المواجهة فانه لا يستحق ان يكون مسئول عن دائرة باكملها ارجوا من الاعضاء عدم تعليقى هذا مسى لافكارهم ولكن المصلحة فوق الجميع عذرا.

السلام عليكم جميعا يا شباب كل الكلام ده جميل بس الكلام ده مش عايز كتابه دا عايز افعال حقيقيه لازم ده يكون قاعده حقيقيه على هيئه اجتماع مثلا ونتكلم ونبدا فى التنفز

الموضوع ده هايل انا مع حسام لانو بيحلم ببلده تكون اجمل مع حد تانى مش مع الشخص نفسو اهم حاجه الشباب بايدهم يغيروا كل حاجه ياريت بلاش السلبيه دى كلها مفيش حد بيتقدم بالكلام

اكيد انا بردو بحلم

بسم الله الرحمن الرحيم
سلامى لكل اهلى واخوانى فى البلد الكريم شباس عمير
احيكم بتحية الاسلام السلام عليكم ورحمة الله
بخصوص الموضوع المجرى الحديث عنة ان كان حقا صادق وخالص لله من الاخ الاكريم فهذا يذكرنى بقول الله تعالى < وَآخَرُونَ اعْتَرَفُواْ بِذُنُوبِهِمْ خَلَطُواْ عَمَلاً صَالِحاً وَآخَرَ سَيِّئاً عَسَى اللّهُ أَن يَتُوبَ عَلَيْهِمْ إِنَّ اللّهَ غَفُورٌ رَّحِيمٌ ) اسئل الله الخير لكل امة محمد عامة ولاهل بلدى خاصة كما اسئلة سبحانة ان يصلح بكم العباد والبلاد وان يفتح بينكم بالحق وهو خير الفاتحين
اخوانى احبكم جميعا فى الله
فعلا حسيت ان جالس بينكم شكرا للجميع
السلام عليكم

اهلا وسهلا بيك يا ابوحميد ونورت المنتدى
واحبك الله الذى احببتنا فيه

قشطة

اهلا وسهلا بكل ابناء شباس عمير تحياتى ليكم جميعا وان كان اعجبنى جدا طريقة خالد فى طرح المشكلة واعجبنى جدا رد ا/حاتم على مشكلة المية ولكن لم يعجبنى ثقتة الزايدة فى ان شباس كلها مع ك/محى لازم نعترف ان فية ناس زعلانة من ك/ محى وهم كتير وكانوا بيحبوة جدا يبقى لازم نتكلم معاهم ونحاول نقرب وجهات النظر ونعرف لية بقى الحال كدة وكمان لازم نفرح قوى ان بلدنا بقى فيها ناس مثقفين بيفكروا جديا فى مصلحة بلدهم وكمان لازم نحترم اراء بعض ومنزعلش لان دة ظاهرة صحية وجميلة قوى ونفسى اشكر القائمين على المنتدى على المجهود الاكثر من رائع دة ويارب اكون ضيف خفيف

اهلا بيك يا منصور ونورت المنتدى وربنا يستر فى حتة ضيف خفيف دى
قشطة

ياأخى كيف عرفت حلمى فأنا الاخر كنت اغط فى نوم عميق ولكنك ايقظتنى على هذا الحلم كم أتمنى ان تكون هذه البلد فى أيدى المخلصين من ابنائها لا فى ايدى الباحثين عن الثراء على حساب ابنائها الضعفاء احيى فى الاخ حسام شجاعته فىقول الحق فى اطار تهكمى رائع لك منى خالص الاعتزاز واستمر علك تستطيع ان تغير بعض الاشياء فى نفوس ابناء بلدك الغلابة

انا كنت فاكر انى كنت بموت نفسى علشان العضو المحترم وكانت الدنيا بتشتى ونادى ونهتف وبالروح والدم وننضرب ونضرب وبيت فى شباس عند احد الاصدقاء ومنروحش المدرسة وام صديقى تقول دا انتم تعبانين ياولداة من مشيكم (فى المسيرة) المهم واحد ابن حلال اتبرع بقطعة ارض وقال نعملها وحدة صحية (جزاة اللة كل خير)يلانروووووووووح للى سهرنا معاة ومشينا وراة وتعبنا معاة يااااااااااااة عمل المستشفى وبقت عندنا ههههههههههه وحدة صحية (ادينى بحلم) ولية لا هو الحلم عيب يلا ياعم بحلم معاك تسلم ايدك وحلمك اسامة عجلان

اخ اسامة حاول لا تخوض ف مثل هذة المواضيع لان المنتدى مش هدفه الانتخابات فقط
واهلا وسهلا بك اخ في وسط اخوانك

بصراحة هيا الحكاية كلها أكذوبة ولعبة كبيرة وخلاص . عشان نحس ان احنا بنشارك ، بس في النهاية اللي ولاد الايه عايزينه هوا اللي بيحصل

اولا بشكر السيد المحترم اللى طرح الموضوع رغم ان كل صغير وكبير يعرف مدى الخدمات اللى بتقدم لة كمواطن بالبلد وبالنسبة للقرارت العلاج اللى اتوصف بيها السيد المرشح بانة ما عمل غيرها فانها ياسادة اكذوبة بس كبيرة اوى لا شباس عمير عافى وعافاكم الله من اكثر قرى المحافظة بل مصر بالوباء الكبدى والفشل الكلوى وكل الناس عارفة دا ومعروف دا من اية من فاى راى مع او ضدد لا يمثل اللى الشخص نفسة ومن حق كل شخص انة يقول رائة باللى شايفة واللى حاسة ياجماعة فية شوارع بالبلد الى الوقت الحالى لم يتم وضع حتى سن حجارة بيها عارفين لية مش مؤيدين للسيد العضو لى رجاء واحد ومن الله انوا يريحنا من الكراسى لانها هى السبب كراسى الحكومة يا سادة من الحرير الطبيعى هيسبوها ويقعدوا على الارض والله عيب لكم تحياتى جميعا

الاستاذ المحترم /حماده مهيا
كان من الاولى والاجدر ان يخدمك هذا العضو لما قدمت له انت وعائلتك فى الدورة الاخيرة من اخلاص وتفانى ودفاع مستميت يا عزيزى اترك هذا الدفاع لغيرك ممن نالهم الرضا السامى بالتعيين وتقديم الخدمات الاخرى لاتنتظر ان يقدم لك جميلا او رد لبعض الجميل الذى قدمته وما زلت تقدمه رغم تجاهلك انت وعائلتك العريقة نصيحتى للشباب المتحمس لمثل هذه القضايا ان يبحثوا عن من يقدرهم ويقدر ادوارهم البارزة التى يقدموها من اجلهم لكم الله يا شباب شباس المخلصة

عمى العزيز مصطفى
ليس هدفنا الأساسى المصلحه الشخصيه حتى لو كانت حقى ولكن الهدف الأساسى هى مصلحه البلد...فما تربيت عليه هو الأخلا ص وليس النفاق والبحث عن المصلحه الشخصيه.....

السلام عليكم ورحمتى اللة وبركاتة على جميع الاخوة الاعضاء مش عارف لية الانتقاضات الكتيرة للاشخاص وللافراد سالتوا نفسكم انتوا محتاجين اية اية اللى ناقص عليكم لكل الانتقاضات دى مش عارف واحد يقولك المية وحشة وواحد يقول الصرف الصحى واخر الاسفلت طيب اية مشكلتكم عندنا اجمل وارق اسفلت واجمل واوسع شبكة مجارى لا موتت حد ولا بتغرق البلد واية يعنى المية مفتوحة عالصرف مش احسن مايكون مفيش واية يعنى انك بتروح تكشف على اى حد بالاسرة اوجيرانك تروح قلين طيب بتروح متلاقيش حدولا حتى النباطشى وهى فسحة انتى بتروح المركز اية المشكلة دحنا البلد الوحيدة اللى بالشتا تمشى فيها حافى لا تتوسخ رجليك من حلاوتها ويااااااااااااااااااااااااااااااااااا حلولى اصلى كنت نايم ولسة صاحى
يناس ياااااااااعسسسل

مشكورين كلمن ساهمتم في الموضوع ونرجو التفدم للانام لمصلحة البلد

مش عارف بتضيعوا وقتكم فى موضوع محسوم ياريت تفكروا في أي حاجه تفيد شباس وبطلوا ترشيحات وده قدركم وقدر شباس ولكم رحمة الله

indomax كتب:

مش عارف بتضيعوا وقتكم فى موضوع محسوم ياريت تفكروا في أي حاجه تفيد شباس وبطلوا ترشيحات وده قدركم وقدر شباس ولكم رحمة الله

ياريت توضح كلامك

بصراحه كلامه واضح
وكمان عنده حق

والله ناس





عسل

حسبى الله ونعم الوكيل فعلا احنا بندن فى مالطه على راى شريف ولنا رحمة الله

بطيييييييييييييخ

كلام زي الفل وميه ميه

السلام عليكم وحمة الله وبركاتة الاخوة العزاء هذه أول مشاركه لي ليه اكتر الاشخاص فى الدايرة بيقول انى محى القطان لا يصلح وبعضنا بيسئل نفسة ايه الى اتعمل فى شباس شويه قرارات اتعملت اة لوماتعملتش القرات كان فيه ناس كتير ماتت .....واحنا عارفين (1) اما تعليقى على الاستاذ الى بيقول البلد لية مافيهاش ظابط ولا وكيل نيابة عارف ليه مافيهاش .......؟ اقوللك ليةلانى البلد الى هى بلدى وبلدك احنا فى بعضينا مش كويسين مابنحبش المصلحة لبعض لانى لو بنحب مصلحة بعض مكنش اى شخص فى البلد اتكلم انى فلان اتوظف وانى فلان اشتعل وبقا ظابط ياجماعة انتو لسه مش عارفين انى شباس مش هاتتغير الواحد الى بيسافر السعودية ويجى بنقول علية دا معاه فلوس اشترى ارض واشترا والخ ناس كتير فى البلد والاى هم ضد محى القطان كانو بيقولو احنا مش عاوزين الا انى الصرف الصحى فى شباس يخلص مش عوزين حاجه تانية خلص الصرف عاوزين ايه بتقولو اختاروا واحد غير محى القطان مين فى البلد يصلح الاعضاء الكرام شباس مافيهاش واحد يعتمد علية كلو بيفكر فى مصلحتة الشخصية فقط واى شخص يقول غير كدة كداب ومنافق اما الى المناقشات الى بتكلموا عليها كلام فاضى ومافهوش فايدة انا مابتكلمش كدة علشان حد يزعل انا بتكلم الكلام الصح واى مصلحتة الشخصية مخلصتش اول واحد بيتكلم على محى مش انتا الى هاتخاف على مصلحة البلد البلد ماتهمكش فى حاجة بس احنا مش لقين كلام نتكلم فيه احنا مابنحبوش بعض شكرأ  

الاخ الفاضلadmin النائب الحالى بغنا انه يعرف نفسه المصالح العامة الى بتكلم عليها الصرف فقط اما المصالح الشخصية لازم ولابد منها البلد جايى فيها رصف ايه الى هانستفادة منه وعندك فى البلد بهايم حتى لو البلد اتفرشت سجاد مش هانشكر قولى الزباله الخاصه بيك بترميها فين اكيد طبعا انتا عارف اخر الليل فى الشارع علشان مافيش حد يشوفك لوسمحت دور على كلام مفهوم وينسمع اولا لاتعلم شى عن مصلحة البلد ولاغيرك كلو بيقول نفسى بدليل انتا لوجاتلك وظيفة من النائب الحالى اقرب الناس ليك هاتكلم عليك ليه فلان اتوظف ولو ماتكلمتش عليك بتكلم على غيرك ؟ حبيبى فيه بلاد كتير بره شبابها فى الخارج بيبعتو لبعض وبيوقفا جمب بعض اما بلدك الناس فيها مابتحبش بعض وانا اسف لو فى كلامى شى يجرح اى شخص بس انا بوضح نظريتى

الاخ محمد يسري انشاء الله طول ما فيه ناس بتفكر زيك كده عمرنا ما هنتقدم خطوه واحدة للامام وتقبل مروري

مصطفى مهيا كتب:

ياأخى كيف عرفت حلمى فأنا الاخر كنت اغط فى نوم عميق ولكنك ايقظتنى على هذا الحلم كم أتمنى ان تكون هذه البلد فى أيدى المخلصين من ابنائها لا فى ايدى الباحثين عن الثراء على حساب ابنائها الضعفاء احيى فى الاخ حسام شجاعته فىقول الحق فى اطار تهكمى رائع لك منى خالص الاعتزاز واستمر علك تستطيع ان تغير بعض الاشياء فى نفوس ابناء بلدك الغلابة

يا عم مصطفى
حسام خلاص مكنشى بيحلم ولكن كتب المووع لمصالح شخصية
وبعدين اخوه كمال محى القطان وظفه خلاص

لا داعى لشكره على المووع
باركوله على وظيفة اخوه وعقباله

ان المنافقين كانوا فى الدرك الاسفل من النار

محمد يسرى كتب:

الاخ الفاضلadmin النائب الحالى بغنا انه يعرف نفسه المصالح العامة الى بتكلم عليها الصرف فقط اما المصالح الشخصية لازم ولابد منها البلد جايى فيها رصف ايه الى هانستفادة منه وعندك فى البلد بهايم حتى لو البلد اتفرشت سجاد مش هانشكر قولى الزباله الخاصه بيك بترميها فين اكيد طبعا انتا عارف اخر الليل فى الشارع علشان مافيش حد يشوفك لوسمحت دور على كلام مفهوم وينسمع اولا لاتعلم شى عن مصلحة البلد ولاغيرك كلو بيقول نفسى بدليل انتا لوجاتلك وظيفة من النائب الحالى اقرب الناس ليك هاتكلم عليك ليه فلان اتوظف ولو ماتكلمتش عليك بتكلم على غيرك ؟ حبيبى فيه بلاد كتير بره شبابها فى الخارج بيبعتو لبعض وبيوقفا جمب بعض اما بلدك الناس فيها مابتحبش بعض وانا اسف لو فى كلامى شى يجرح اى شخص بس انا بوضح نظريتى

يا اخ محمد كلامك غير معقول فانا اعرف المصالح التى أتى بها النائب اكثر منك شخصيا فانت لاتعرف شئ فلاداعى ان نفتح موضوع الصرف وخلافه وهناك مواضيع اخرى كثيرة فلاداعى ان نتكلم عنها فانا شخصيا احب محى القطان اكثر منك ولكن نحن نتكلم منطلق كلمة حق ومصلحة البلد فمحى القطان هو اقوى نائب فى محافظة كفرالشيخ ونعرف قدره جيدا لدى قيادات الحزب ولكن شباس عمير لم تستفيد به سوا فى المصالح الشخصية وانا واحد من الناس الذين استفادوا ولكن هذا لايجعلنا نتغاضى عن مصلحة البلد التى وعدنا بها الكابتن محى نحن الشباب فى بداية انتخابات 2005 التى وقفت شباس بجانبه وقفة تكاد لاتتكرر مرة ثانية ..

شكرا ادمن على ردودك الفعالة والمحترمة والمقنعة

الاخ العزيز /حاتم الكاشف اولا ممكن اعرف ايه اللى انت استفده من مصلحه عامه من محى القطان واشكر الاخ خالد القطان لان كل المعاناه التى تعانيها من نومك متاخر نعانيها كلنا بس المشكله الزيادة عنك ان الميه جات عندنا وشربنا بس كانت ميه مجارى واحب ان اقول لحاتم الكاشف صح النوم نحن فى عام 2011 وانا كما يقول خالد لست مع شخص بعينه لان كل المرشحين ليسو فيهم من يصلح

هلا والله بيك ياadmin
وأن بشكرك على الاهتمام
ولكن أنا براقب الموضوع
من على بعد . وليس خوف
ولا تكاسل ولكن زمان كانوا
بيقولوا النفس باتت ولكن الحين
النفس ماتت . لاتعليق

ليه يا سمسم
ضاقت ضاقت
ولما استحكمت
حلقاتها فرجت
تفأل يا سمسم
مافيش حاجة بالسهل
كل حاجة عايزة
مجهود وسعى

ادمن اقترح عليك فتح فصول محو الامية في المنتدى
عشان واحد مثل الاخ الذي كتب في احد تعليقاته البلد مليانه بهايم
اللي على راسه بطحة بيحسس عليها واللي عارف نفسه 0000 يعتقد الناس كلها مثله
عنده أخطاء إملائية كتير لا استطيع فهم الكثير منها
وبعدين ركز ان كل واحد نعرف هو مين بالظبط عشان نفهم فكره رايح فين ونعرف نرد عليه ونعرفه حجمه الطبيعي
وان كان فكره لا يحتاج الى ايضاح فهو مثل 000

المفروض والله يا ابو أمال بس مليش خلق وانت عارف ان شباس مليانة ناس كتير امثال 000 وبقا فيه ناس كتير امثال عبدالمجيد بعرور وبرده الحدق يفهم ...